ត្រឹមមួយខែកុម្ភៈ អាមេរិក ចាយលុយ ៦៤២.៨ លានដុល្លារទិញទំនិញពី រុស្ស៊ី

ទិន្នន័យដែលចេញផ្សាយដោយក្រសួងពាណិជ្ជកម្មអាមេរិកបានបង្ហាញឲ្យដឹងកាលពីថ្ងៃពុធថា ការនាំចូលទំនិញរបស់អាមេរិកពីប្រទេសរុស្ស៊ីបានកើនឡើងជាង ២៥ ភាគរយនៅក្នុងខែកុម្ភៈ បើទោះបីជាអាមេរិកអំពាវនាវឲ្យប្រទេសផ្សេងៗដាក់ទណ្ឌកម្មលើរុស្ស៊ី ជុំវិញប្រតិបត្តិការសឹករបស់ទីក្រុងមូស្គូលើអ៊ុយក្រែនក៏ដោយ ។

កាលពីខែកុម្ភៈ សហរដ្ឋអាមេរិកបានទិញទំនិញពីរុស្ស៊ីក្នុងតម្លៃ ៦៤២.៨ លានដុល្លារ ដោយកើនឡើងពី ៥០៨.៦ លានដុល្លារ ។ នេះបើយោងតាមទិន្នន័យរបស់ការិយាល័យជំរឿនអាមេរិក ដែលស្ថិតក្រោមនាយកដ្ឋានពាណិជ្ជកម្ម ។

ទន្ទឹមនោះ ចំពោះការនាំចេញទំនិញរបស់អាមេរិកទៅកាន់រុស្ស៊ីវិញ បានកើនឡើងដល់ ៦១.២ លានដុល្លារក្នុងខែកុម្ភៈ ពោលកើនពី ៤៤.៦ លានដុល្លារពីខែមករា ដែលជាកំណត់ត្រាទាបបំផុតនៅក្នុងប្រវត្តិសាស្ត្ររុស្ស៊ី ចាប់តាំងពីឆ្នាំ ១៩៩២ មក ។

ពាក់ព័ន្ធនឹងតួលេខនាំចេញនាំចូលខ្ពស់បែបនេះ បានបង្កើនឱនភាពពាណិជ្ជកម្មរវាងប្រទេសទាំងពីរដល់ទៅ ៥៨១.៦ លានដុល្លារក្នុងខែកុម្ភៈ ខណៈខែមករាមានត្រឹម ៤៦៤ លានដុល្លារប៉ុណ្ណោះ ៕

ប្រែសម្រួលដោយ ៖ នាង រតនៈ

ប្រភព ៖ Sputnik

ចុចអាន​៖ លោក បៃដិន ថា បច្ចេកវិទ្យា AI អាចគ្រោះថ្នាក់ដល់សង្គមជាតិ