ធនាគារ អាមេរិក មួយទៀតអាចនឹងមានវាសនាដូច Silicon Valley

ធនាគារកម្ចីអាមេរិក The First Republic ដែលមានមូលដ្ឋាននៅទីក្រុង San Francisco អាចក្លាយជាធនាគារធំទី ៣ មានវាសនាដូចធនាគារ Silicon Valley និង Signature Bank ខណៈដែលធនាគារមួយនេះ កំពុងតែស្វែង​រកការជួយសង្គ្រោះពីសំណាក់ធនាគារផ្សេងទៀត ។

ធនាគារ The First Republish បច្ចុប្បន្ន​កំពុងតែជួបប្រទះ រងការវាយប្រហារដោយការរត់ប្រាក់បញ្ញើ ប៉ុន្តែអាចកែប្រែ និងគ្រប់គ្រងស្ថានភាពឲ្យមានប្រសើរឡើងវិញជាបណ្តោះអាសន្ន​ ដោយសារតែ​មានធនាគារធំៗមួយចំនួន រួមទាំង​ JPMorgan Chase ផងដែរ បានផ្តល់ទុន ៣០ ពាន់លានដុល្លារ ដើម្បីគ្រប់គ្រងស្ថានភាព ។

ប៉ុន្តែក្នុងលក្ខខណ្ឌមួយ បើសិនជាធនាគារមិនបង្កើនដើមទុនឲ្យខ្ពស់វិញទេ នោះធនាគារនឹងត្រូវស្ថិតនៅក្រោមការគ្រប់គ្រងរបស់សាជីវកម្មធានារ៉ាប់រងប្រាក់បញ្ញើសហព័ន្ធ ឬ FDIC ដែលក៏បានទទួលការគ្រប់គ្រងលើធនាគារ Silicon Valley និង Signature ផងដែរ ។

បញ្ហានេះ ប្រព័ន្ធផ្សព្វផ្សាយអាមេរិកបានរាយការណ៍ថា មន្ត្រីមកពី FDIC នាយកដ្ឋានរតនាគារ និងធនាគារកណ្តាលកំពុងសម្របសម្រួលកិច្ចប្រជុំជាមួយធនាគារផ្សេងទៀតដើម្បីស្វែងរកមធ្យោបាយសម្រាប់សង្គ្រោះធនាគារ The First Republish ។

ជាមួយគ្នានេះ CNBC រាយការណ៍ថា​ ទីប្រឹក្សារបស់ធនាគារ First Republic កំពុងរៀបចំលើផែនការដែលនឹងអនុញ្ញាតឲ្យអ្នកខ្ចីលក់មូលបត្របំណុល និងទ្រព្យសម្បត្តិផ្សេងទៀតក្នុងអត្រាតម្លៃខ្ពស់ជាងទីផ្សារ ។

គួរបញ្ចាក់ថា ភាគហ៊ុននៃធនាគារ The First Republish បានធ្លាក់ចុះជាង ៤០ ភាគរយកាលពីថ្ងៃសុក្រ បន្ទាប់ពីធនាគារបានខាតបង់ប្រាក់បញ្ញើជាង ១០០ ពាន់លានដុល្លារ ក្នុងអំឡុងត្រីមាសទី ១ ៕

ប្រែសម្រួល៖ នាង រតនៈ

ប្រភព៖ Sputnik

ចុចអាន ៖ ប្អូនស្រី គីម ជុងអ៊ុន ហៅលោក បៃដិន ជា “មនុស្សចាស់ដែលគ្មានអនាគត”