សេដ្ឋកិច្ច

ជនបរទេសនឹងរួមចំណែកជំរុញវិស័យអចលនទ្រព្យ ថៃ ឲ្យមានកំណើនដល់ត្រីមាសទី ៤

បានផុស

២ years មុន

នៅ

ថ្ងៃព្រហស្បតិ៍ ២៥ ឧសភា ២០២៣

ដោយ

បើតាមការព្យាករណ៍ពីសំណាក់សេវាកម្មអចលនទ្រព្យ និងក្រុមហ៊ុនវិនិយោគថៃ CBRE បានឲ្យដឹងថា វិស័យអចលនទ្រព្យរបស់ប្រទេសថៃ នឹងរីកចម្រើនរហូតដល់ត្រីមាសទី៤ ដោយសារតែការកើនឡើងនៃតម្រូវការពីអតិថិជនក្រៅប្រទេស ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានផ្នែកលក់លំនៅឋានលោកស្រី Artitaya Kasemlawan បាននិយាយកាលពីថ្ងៃពុធថា ការទិញរបស់ជនបរទេសក្នុងវិស័យខុនដូមានកំណើនដល់ ៣៨៣ ភាគរយ និង ២៣៣ ភាគរយទៀតនៅក្នុងការទិញលំនៅដ្ឋានក្នុងឆ្នាំកន្លងមក ។

លោកស្រីបន្តថា មាន ៨៩ ភាគរយនៃអតិថិជនពីឆ្នាំមុនដល់ដើមឆ្នាំនេះគឺជាជនជាតិថៃ ចំណែក ១១ ភាគរយទៀត ជាជនបរទេស ដែលភាគច្រើនមកពីប្រទេសចិន ហុងកុង តៃវ៉ាន់ មីយ៉ាន់ម៉ា សិង្ហបុរី និងជប៉ុន ។

ប្រធានផ្នែកលក់លំនៅឋានរូបនេះបញ្ជាក់ថា ចំពោះជនបរទេស ពួកគេចំណាយចន្លោះពី ១៥ ទៅ ៣០ លានបាត ក្នុងវិស័យទិញខុនដូនេះ ដោយចូលចិត្តរស់នៅក្នុងតំបន់សេដ្ឋកិច្ចរបស់ទីក្រុងបាងកក ដូចជា Sathon, Lumpini និង Sukhumvit ក៏ដូចជានៅតាមច្រាំងទន្លេចៅប្រាយ៉ាជាដើម ។

ដោយឡែក សម្រាប់អចលនទ្រព្យលំនៅដ្ឋាន មិនមែនជាខុនដូវិញ, ជនបរទេសជាធម្មតា ចំណាយពី ៥១ ទៅ ៨០ លានបាត ហើយចាប់អារម្មណ៍ទិញផ្ទះនៅភាគខាងកើតទីក្រុងបាងកក ខណៈផ្ទះដែលមានបន្ទប់គេងចំនួន ៤ គឺមានការពេញនិយមខ្លាំងពីសំណាក់ជនជាតិចិន ដែលមានថវិការហូតដល់ ១០០ លានបាត ហើយប្រហែល ៨៧ ភាគរយនៃអ្នកទិញខុនដូបរទេស និង ៧១ ភាគរយនៃអ្នកទិញអចលនទ្រព្យ គឺពួកគេមានបំណងចង់រស់នៅទីនោះជាជាងជួល ។

ក្រៅពីខុនដូ និងអចលនទ្រព្យលំនៅដ្ឋាននេះដែរ អ្នកស្រី Artitaya ប្រាប់ថា ផ្ទះលំហែក៏ទទួលបានចំណាប់អារម្មណ៍ពីសំណាក់ពួកអឺរ៉ុប រួមមាន រុស្ស៊ី អង់គ្លេស បារាំង និងអាល្លឺម៉ង់ ដែលសុខចិត្តចំណាយចន្លោះពី ១៥ ទៅ ៣០ លានបាតដើម្បីទិញ ខណៈខេត្ត Phuket និង Hua Hin គឺជាទីតាំងពេញនិយមបំផុត ។

ពាក់ព័ន្ធជាមួយមីយ៉ាន់ម៉ាវិញ អ្នកស្រី Artitaya បានលើកឡើងថា គឺបានរួមចំណែកជួយដល់ការលូតលាស់នៃអចលនទ្រព្យក្នុងប្រទេសថៃ ដោយកត់សម្គាល់ថា អ្នកទិញមីយ៉ាន់ម៉ាបានទិញអចលនទ្រព្យ ចាប់ពីតម្លៃ ៥ ទៅ ១០០ លានបាត លើផ្ទះមានបន្ទប់គេង ៤ ដែលមានទីតាំងនៅភាគកណ្តាល ឬភាគខាងកើតទីក្រុងបាងកក ៕