កាសែត អាល្លឺម៉ង់ ផ្សាយថា អឺរ៉ុប កំពុងអស់លុយទប់សេដ្ឋកិច្ចហើយ

យោងតាមការចុះផ្សាយរបស់កាសែត Handelsblatt បានឲ្យដឹងថា បច្ចុប្បន្ននេះសហភាពអឺរ៉ុប (EU) កំពុងអស់លុយទប់ទល់នឹងបញ្ហាសេដ្ឋកិច្ចហើយ ដោយសារតែអត្រាការប្រាក់កាន់តែខ្ពស់ ជាពិសេសការកើតមានវិបត្តិជាច្រើន រួមទាំងជម្លោះនៅអ៊ុយក្រែន ការធ្វើចំណាកស្រុក និងកង្វះការផ្គត់ផ្គង់ថាមពលជាដើម ។

កាសែតអាល្លឺម៉ង់មួយនេះបានសរសេរថា បន្ទាប់ពីការរាតត្បាតនៃជំងឺកូវីដ១៩ បញ្ហាទាំងនោះកំពុងគ្របដណ្តប់លើធនធានហិរញ្ញវត្ថុរបស់សហភាពអឺរ៉ុប ស្របពេលដែលទុនបម្រុងថវិកាសម្រាប់ឆ្នាំ ២០២១ ដល់ឆ្នាំ ២០២៧ ក៏កំពុងធ្លាក់ចុះដូចគ្នា​ ។

កាសែត Handelsblatt បានចុះផ្សាយទៀតថា ឆន្ទៈរបស់រដ្ឋជាសមាជិកសហភាពអឺរ៉ុបក្នុងការរ៉ាប់រងការចំណាយនៃថវិការួមតែមួយ គឺនៅមានកម្រិតទាបនៅឡើយ ជាពិសេសប្រទេសអាល្លឺម៉ង់ ដែលជាអ្នករួមចំណែកដ៏សំខាន់បំផុតរបស់ប្លុកមួយនេះ ។

របាយការណ៍នោះចង្អុលបង្ហាញថា ប្លុកអឺរ៉ុបមានការចំណាយចាំបាច់ជាច្រើន ពោលយ៉ាងតិចជាង ៣២ ពាន់លានដុល្លារ ក្នុងមួយឆ្នាំ ដើម្បីគាំទ្រដល់អ៊ុយក្រែន, ពន្លឿនការផ្លាស់ប្តូរថាមពល, ពង្រឹងឧស្សាហកម្មបន្ទះ​ឈីប, ជំរុញផលិតកម្មបច្ចេកវិទ្យាស្អាតក្នុងស្រុក, បើកប្រភពវត្ថុធាតុដើមថ្មី និងប្រឆាំងគំនិតផ្តួចផ្តើមផ្លូវសូត្ររបស់ចិន ។

ជាចុងក្រោយសារព័ត៌មាន Handelsblatt បានសន្និដ្ឋានថា សហភាពអឺរ៉ុបមិនអាចក្លាយជាមហាអំណាចភូមិសាស្ត្រនយោបាយបាននោះទេ ដោយសារតែរចនាសម្ព័ន្ធសេដ្ឋកិច្ចថវិកាបច្ចុប្បន្នរបស់ប្លុកនេះ គឺស្ថិតក្នុងកម្រិតមិនអាចប្រកួតប្រជែងបាននៅឡើយទេ ៕

ប្រែសម្រួល៖ នាង​​​ រតនៈ

ប្រភព៖ RT

ចុចអាន ៖ ចិន ស្នើឲ្យធនាគារធំៗកាត់បន្ថយអត្រាការប្រាក់បញ្ញើសាជាថ្មី