ទោះជាប់ដៃធ្វើសង្គ្រាម តែសេដ្ឋកិច្ច រុស្ស៊ី ស្ទុះងើបទៅរកសភាពដូច ២ ឆ្នាំមុន

ប្រធានធនាគារកណ្តាលរុស្ស៊ីលោកស្រី Elvira Nabiullina បាននិយាយថា ពេលនេះសេដ្ឋកិច្ច​របស់រុស្ស៊ី​មានសន្ទុះងើបឡើងវិញខ្ពស់​ ដោយខិតជិតទៅដល់កំណើន​សេដ្ឋកិច្ចកាលពីចុងឆ្នាំ​ ២០២១ វិញ បើទោះបីជាប្រទេសកំពុងជាប់ដៃធ្វើសង្គ្រាមជាមួយអ៊ុយក្រែនក៏ដោយ ។

លោកស្រី Nabiullina បាននិយាយនៅក្នុងវេទិកាសេដ្ឋកិច្ចអន្តរជាតិ St. Petersburg ថា កំណើន GDP របស់រុស្ស៊ីនៅឆ្នាំ ២០២៣ កំពុងស្ថិតនៅក្នុងចំណុចពាក់កណ្តាល ឬពី ០.៥ ទៅ ២ ភាគរយ បើប្រៀបធៀបនឹងឆ្នាំ ២០២១ ខណៈលោកប្រធានាធិបតី វ្ល៉ាឌីមៀរ ពូទីន បានលើកឡើងថា GDP របស់រុស្ស៊ីកាលពីក្នុងខែមេសា បានកើនឡើងដល់ ៣.៣ ភាគរយឯណោះដែលច្រើនជាងការរំពឹងទុកទៅទៀត ។

យោងតាមទិន្នន័យរបស់មូលនិធិរូបិយវត្ថុអន្តរជាតិ (IMF) បានឲ្យដឹងថា ផលិតផលក្នុងស្រុកសរុប (GDP) របស់រុស្ស៊ីសម្រាប់មនុស្សម្នាក់ បានឈានដល់ ១៥,៤៤០ ដុល្លារកាលពីឆ្នាំមុន ដោយបានខិតទៅជិតកម្រិតខ្ពស់បំផុតប្រមាណ ១៥,៩៣០ ដុល្លារដែលបានកត់ត្រាក្នុងឆ្នាំ ២០១៣ ។

កាលពីដើមខែឧសភា ទិន្នន័យពីធនាគារពិភពលោក និងទីភ្នាក់ងារស្ថិតិដែលវិភាគដោយសារព័ត៌មាន Sputnik បានបង្ហាញថា រុស្ស៊ីបានត្រលប់ទៅជាប្រទេសដែលមានសេដ្ឋកិច្ចធំជាងគេទាំង ១០ កាលពីឆ្នាំមុន ហើយជាលើកដំបូងរាប់ចាប់តាំងពីឆ្នាំ ២០១៤ មក ៕

ប្រែសម្រួល៖ នាង រតនៈ

ប្រភព៖ Sputnik

ចុចអាន ៖ សន្ទុះសេដ្ឋកិច្ច ចិន ធ្លាក់ចុះខ្លាំងនៅក្នុងខែឧសភា