លោក ប្រាយុទ្ធ​ ចេញមុខបញ្ជាក់ពីស្ថានភាពសេដ្ឋកិច្ច ថៃ

លោកនាយករដ្ឋមន្ត្រីចាំផ្ទះថៃលោក ប្រាយុទ្ធ ចាន់អូចា ចេញមកបញ្ជាក់ថា ហិរញ្ញវត្ថុរបស់ប្រទេសថៃ គឺនៅតែមានភាពរឹងមាំ និងមានស្ថេរភាពជាមួយនឹងការរីកចម្រើនយ៉ាងខ្លាំងនៅក្នុងហេដ្ឋារចនាសម្ព័ន្ធ និងការវិនិយោគផ្សេងៗ ។

លោក ប្រាយុទ្ធ​ បញ្ជាក់ថា សមត្ថភាពហិរញ្ញវត្ថុរបស់ប្រទេសនៅរក្សាបានភាពរឹងមាំ មានថវិកាគ្រប់គ្រាន់សម្រាប់ឧបត្ថម្ភដល់ប្រជាជន​ ហើយអាចទប់ទល់នឹងស្ថានភាពអាសន្នណាមួយក្នុងរយៈពេល ២ ខែដែលនៅសល់នៃឆ្នាំសារពើពន្ធ ២០២៣ នេះ ដូចជាទឹកជំនន់ គ្រោះរាំងស្ងួត និងគ្រោះធម្មជាតិជាដើម ។

ទន្ទឹមនោះ ការវិនិយោគ​ពី​បរទេស​ ជាពិសេសក្នុងរយៈពេលឆមាសទីមួយនេះ មានទំហំជាង ១១ ពាន់លានបាតនៅក្នុងច្រករបៀងសេដ្ឋកិច្ចភាគខាងកើត ឬ ២២ ភាគរយនៃការវិនិយោគផ្ទាល់ពីបរទេស ។ ដោយឡែកការវិនិយោគ​លើឧស្សាហកម្មរថយន្តអគ្គិសនីវិញនៅតែមានកំណើន បើប្រៀប​ធៀបនឹងឆ្នាំមុន ។

ទន្ទឹមនឹងនេះ ក្រសួងហិរញ្ញវត្ថុថៃក៏បានប្រកាសផងដែរនូវការកែសម្រួលនៃការធ្លាក់ចុះការព្យាករណ៍កំណើនផលិតផលក្នុងស្រុកសរុប (GDP) នៅឆ្នាំ ២០២៣ ដោយទាបបំផុតគឺ ០.១ ភាគរយ និងខ្ពស់បំផុតចំនួន ៣.៥ ភាគរយ ។

ប៉ុន្តែការិយាល័យគោលនយោបាយសារពើពន្ធរបស់ក្រសួងបានប៉ាន់ប្រមាណថា ការនាំចេញនឹងធ្លាក់ចុះ ០.៨ ភាគរយ ហើយប្រាក់ចំណូលពីឧស្សាហកម្មទេសចរណ៍នឹងមាន ១.២៥ ពាន់ពាន់លានបាត ពោលធ្លាក់ចុះ ៥០ ពាន់លានបាតទាបជាងការប៉ាន់ប្រមាណពីមុន ដែលទទួលបានពីទេសចរបរទេសចំនួនជិត ៣០ លាននាក់ ៕​

ប្រែសម្រួល ៖ នាង រតនៈ

ប្រភព ៖​ The Nation Thailand