អាកាសយានដ្ឋានអន្តរជាតិតេជោគ្រោងបញ្ចប់ការសាងសង់នៅដំណាច់ឆ្នាំក្រោយ

គម្រោង​វិនិយោគអាកាសយានដ្ឋានអន្តរជាតិតេជោ ក្រុង​តាខ្មៅ មាន​ទុន​វិ​និ​យោគ​ប្រមាណ ១ ៥០០​ លាន​ដុល្លារ​ពី​ការវិនិយោគ​រួមគ្នា​រវាង​ក្រុមហ៊ុន​វិនិយោគទុន​អា​ណិ​ក​​ជនកម្ពុជា ​(OCIC) និង​រដ្ឋា​ភិ​បាល​កម្ពុជា​បាន​ចំណាយ​ប្រាក់​អស់​ជិត​ ៧០០ ​លាន​ដុល្លារ ​សម្រេច​ការសាងសង់​បាន​ជាង ៥០​ ភាគរយ​ហើយ ខណៈ​ការសាងសង់កំពុង​ដំណើរការ​ទៅមុខ​។

​លោក ស៊ីន ចាន់​សិរី​វុត្ថា ​អ្នក​នាំ​ពាក្យ​នៃ​រដ្ឋលេខាធិការដ្ឋាន​អា​កាស​ចរ​ស៊ីវិល បានប្រាប់កម្ពុជាថ្មីនៅថ្ងៃទី ​២៨ ខែកក្កដានេះថា ​ការសាងសង់ព្រលានតេជោតាខ្មៅសម្រេចបានជាង ៥០ ភាគរយ ​ហើយគ្រោងនឹងបញ្ចប់នៅដំណាច់ឆ្នាំ ២០២៤ នឹងដាក់ឱ្យដំណើរការនៅពាក់កណ្ដាលឆ្នាំ ២០២៥។

គម្រោងព្រលានយន្តហោះអន្តរជាតិភ្នំពេញថ្មីដំណាក់កាលទី១ កំពុងសាងសង់ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល និងមួយផ្នែកស្ថិតនៅស្រុកបាទី ខេត្តតាកែវ។

គម្រោងនេះ មានវិសាលភាពលើផ្ទៃដី ២.៦០០ ហិកតា ដោយប្រើប្រាស់ទឹកប្រាក់វិនិយោគចំនួន ១ ៥០០ លានដុល្លារ សាងសង់ដោយក្រុមហ៊ុន OCIC។ អាកាសយានដ្ឋានអន្តរជាតិភ្នំពេញថ្មី ស្ថិតនៅចម្ងាយប្រមាណ ២០ គីឡូម៉ែត្រពីរាជធានីភ្នំពេញ។

អាកាសយានដ្ឋានអន្តរជាតិភ្នំពេញថ្មី មាន៣ដំណាក់កាល គឺដំណាក់កាលទី១ សាងសង់រួចរាល់នៅឆ្នាំ ២០២៤ ខាងមុខអាចទទួលអ្នកដំណើរបានប្រមាណ ១៣ លាននាក់ក្នុងមួយឆ្នាំ ដំណាក់កាលទី២ នឹងបញ្ចប់នៅឆ្នាំ ២០៣០ ដែលអាចទទួលបានអ្នកដំណើរប្រមាណជា ៣០ លាននាក់ក្នុងមួយឆ្នាំ និងដំណាក់កាលចុងក្រោយ នឹងបញ្ចប់នៅឆ្នាំ ២០៥០ អាចនឹងទទួលបានអ្នកដំណើររហូតដល់ ៥០ លាននាក់ក្នុងមួយឆ្នាំ៕