ព័ត៌មានជាតិ

អ្នកភូមិទ្រាត្បូង ផលិតចង្ក្រានឡូវ សឹងមិនទាន់ឲ្យម៉ូយ បើទោះជាមានវិបត្តិកូវីដ

បានផុស

៤ years មុន

នៅ

ថ្ងៃព្រហស្បតិ៍ ២៨ មករា ២០២១

ដោយ

ក្នុងពេលប្រទេសកម្ពុជាកំពុងមានវិបត្តិជំងឺកូវីដនេះ អ្នកភូមិទ្រាត្បូង ឃុំស្រែថ្មី ស្រុករលាប្អៀរ ខេត្តកំពង់ឆ្នាំងបានខិតខំពង្រឹងមុខរបរសិប្បកម្មធ្វើចង្ក្រានឡូវយ៉ាងសស្រាក់សស្រាំប្រចាំថ្ងៃ ដើម្បីលក់ចេញផ្គត់ផ្គង់ជីវភាពរស់នៅឲ្យបានធូរធារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី អ៊ឹម ស្រីពៅ ជាម្ចាស់សិប្បកម្មធ្វើចង្ក្រានឡូវនៅភូមិទ្រាត្បូងម្នាក់ នៅរសៀលថ្ងៃទី ២៨ ខែមករា ឆ្នាំ២០២១ នេះបាននិយាយឲ្យដឹងថា ក្នុងពេលប្រទេសកម្ពុជាមានវិបត្តិដោយជំងឺកូវីដនេះមុខរបរធ្វើចង្ក្រានឡូវរបស់លោកស្រី ក៏ដូចជាអ្នកស្រុកក្នុងភូមិ គឺបានពង្រឹងការ ផលិតចង្ក្រានឡូវយ៉ាងសស្រាក់សស្រាំប្រចាំថ្ងៃ ដោយមិនរារែកឡើយ ព្រោះមុខរបរនេះ គឺជាឆ្នាំងបាយរបស់គាត់ ដើម្បីលើកស្ទួយជីវភាពរស់នៅឲ្យបានប្រសើរឡើង ។

ដោយឡែកការផលិតចង្ក្រានឡូវនេះ ត្រូវការថវិកាជាដើមទុនច្រើន គឺត្រូវទិញដីឥដ្ឋមានតម្លៃក្នុងមួយគោយន្ត ថ្លៃ១០ ម៉ឺនរៀល ទិញអុស មួយម៉ែត្រគីបថ្លៃ ៣៥០០០រៀលផេះអង្កាមមួយឡាន ៤គីប ថ្លៃ២៥ ម៉ឺនរៀល។ ដោយឡែកក៏ត្រូវជួលកម្មករចំនួន៥នាក់ ឲ្យជួយផលិតចង្ក្រាននេះ ផងដែរ ដោយត្រូវចំណាយទៅលើអ្នកចាក់ពុំចង្ក្រានមួយៗថ្លៃ៣០០រៀល អ្នកជៀរកាត់មួយៗថ្លៃ ៥០០រៀល អ្នកច្រកចង្ក្រានមួយៗថ្លៃ ៨០០ រៀល អ្នកវ៉ៃកន្ឋាំងចង្ក្រានមួយៗថ្លៃ ៥០០រៀល និងជួលកម្មករឲ្យជួយដុតចម្អិនចង្ក្រានផងដែរ ទើបបានចង្ក្រានយកទៅលក់បោះឲ្យម៉ូយ។ ចំណែកថ្លៃចង្ក្រានលក់បោះដុំវិញនោះ គឺប្រភេទលេខ១ថ្លៃ ៦៣០០រៀល ប្រភេទលេខ២ ថ្លៃ ៧៣០០ រៀលនិងប្រភេទលេខ៣ មួយថ្លៃ ៨៣០០ រៀល ។ ចំពោះម៉ូយរបស់លោកស្រីវិញ គឺគេបានយកលុយមកកក់ឲ្យមុនក្នុងមួយលើកៗរាប់លានរៀល គឺលោកស្រីមានកម្លាំងធ្វើមិនទាន់ឲ្យគេផង គឺមិនពិបាកលក់ចេញឡើយ។

លោកស្រី សឹម សា វី ជាម្ចាស់សិប្បកម្មធ្វើចង្ក្រានឡូវមួយទៀត នៅក្នុងភូមិទ្រាបាននិយាយឲ្យដឹងថា ចំពោះកម្មករផលិតចង្ក្រានឡូវនេះ មានជំនាញផ្សេងៗគ្នា មានអ្នកបោះពុម្ពចង្ក្រាន អ្នកវ៉ៃធុងចង្ក្រាន អ្នកជៀរកាត់ អ្នកច្រក អ្នកកិនដីនិងអ្នកដុតជាដើម ដែលក្នុងមួយថ្ងែៗ ពួកគាត់អាចរកប្រាក់ចំណូលបានពី៣ម៉ឺនទៅ ៤ ម៉ឺនរៀលផងដែរ ទៅតាមសមត្ថភាពជាក់ស្ដែង។

ប្រជាពលរដ្ឋជាអ្នកផលិតចង្ក្រាន សូមអំពាវនាវផងដែរដល់ប្រជាពលរដ្ឋខ្មែរ សូមជួយគាំទ្រផលិតផលចង្ក្រានរបស់ខ្មែរ ដើម្បីឲ្យអ្នកស្រុកមានការងារធ្វើសម្រាប់ផ្គត់ផ្គង់ជីវភាពរស់នៅឲ្យបានល្អប្រសើរឡើង។ ម្យ៉ាងទៀតការផលិតចង្ក្រាននេះ ក៏ជាការជួយអភិរក្សកេរមរតកពីដូនតាខ្មែរឲ្យបានគង់វង្សតទៅអនាគត ផងដែរ សម្រាប់កូនចៅជំនាន់ក្រោយ៕

អត្ថបទ៖ ឈៀង ថារិទ្ធ

សូមចុចអាន៖ ផ្លូវ៣៤ខ្សែនៅក្រុងព្រះសីហនុដំណើរការអ៊ុតកៅស៊ូបានជិត៥០%ហើយ

Related Topics:ខេត្តកំពង់ឆ្នាំង