ព័ត៌មានជាតិ

កម្ពុជាជាប់លេខ ៨ លើពិភពលោក ខណៈមួយឆ្នាំអាចផលិតស្រូវបានជាង ១២ លានតោន

បានផុស

២ years មុន

នៅ

ថ្ងៃព្រហស្បតិ៍ ៣ សីហា ២០២៣

ដោយ

លោកបណ្ឌិត យ៉ង សាំងកុមារ រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការនៃក្រសួងកសិកម្មរុក្ខាប្រមាញ់ និងនេសាទ បានលើកឡើងថា កម្ពុជាជាប្រទេសដែលនាំចេញស្រូវអង្ករដ៏ធំបំផុតមួយនៅលើពិភពលោកដោយមួយឆ្នាំប្រមាណ ១២ លានតោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិតបានអះអាថា ជាមធ្យមកសិករកម្ពុជាផលិតស្រូវបានសរុបប្រមាណ ១២ លានតោនក្នុងមួយឆ្នាំ គឺលើសពី ៦ លានតោន សម្រាប់ការនាំចេញដែលធ្វើឱ្យកម្ពុជាក្លាយជាប្រទេសដែលនាំចេញស្រូវអង្ករជាប់លេខរៀងទី ៨ នៅលើពិភពលោក។

កសិករកម្ពុជាកំពុងក្លាយទៅជាអ្នកដែលចូលរួមចំណែកដ៏សំខាន់មួយក្នុងការជួយលើកស្ទួយបញ្ហាសន្តិសុខស្បៀងជាតិ និងពិភពលោក។ លោកបណ្ឌិត យ៉ង សាំងកុមារ ជឿជាក់ថា ប្រទេសកម្ពុជានៅមានសក្ដានុពលខ្ពស់ក្នុងការបង្កើនផលិតកម្មស្រូវនៅលើផ្ទៃដីដែលមានស្រាប់ និងពង្រីកទីផ្សារអង្ករនៅក្រៅប្រទេស។

លោកបណ្ឌិត យ៉ង សាំងកុមារ បានអះអាងថា កសិករកម្ពុជាកំពុងក្លាយទៅជាអ្នកដែលបានរួមចំណែកដោះស្រាយបញ្ហាស្បៀងជាតិ និងពិភពលោកយ៉ាងសំខាន់មួយ។ ជាពិសេសនៅពេលដែលពិភពលោកកំពុងប្រឈមមុខនឹងបញ្ហាស្បៀង បន្ទាប់ពីសង្គ្រាមនៅអ៊ុយក្រែន និងឥណ្ឌាដែលជាប្រទេសនាំអង្ករចេញច្រើនជាងគេលើពិភពលោក ហាមមិនឱ្យមានការនាំចេញអង្ករធម្មតាដើម្បីរក្សាសន្តិសុខស្បៀងក្នុងប្រទេសរបស់ខ្លួន។

រដ្ឋាភិបាលកម្ពុជាបានដាក់ចេញគោលនយោបាយពង្រាយមន្ត្រីកសិកម្មតាមឃុំទូទាំងប្រទេស ជាមួយការកសាងសហគមន៍កសិកម្ម ឬសមាគមកសិករផ្សារភ្ជាប់មកទីផ្សារតាមរយៈយន្តការកិច្ចសន្យាកសិកម្ម និងគោលនយោបាយហិរញ្ញប្បទានរបស់រាជរដ្ឋាភិបាលជាមួយកញ្ចប់ថវិកាជាង ១០០ លានដុល្លារ ដែលអាចនឹងដោះស្រាយបញ្ហាទីផ្សារ និងរក្សាលំនឹងថ្លៃស្រូវ រួមទាំងការការបន្តការអភិវឌ្ឍប្រព័ន្ធធារាសាស្ត្រឱ្យបានទូលំទូលាយ និងគោលនយោបាយពាក់ព័ន្ធផ្សេងទៀត៕