ថៃ ជំរុញការប្រើប្រាស់ប្រាក់យ័នរបស់ ចិន ដើម្បីទប់ស្កាត់ការប្រែប្រួលតម្លៃប្រាក់បាត

បើយោងតាមមន្ត្រីធនាគារជាតិថៃបានបញ្ជាក់ថា ប្រទេសថៃគ្រោងនឹងលើកកម្ពស់ការប្រើប្រាស់ប្រាក់យ័នចិន និងរូបិយប័ណ្ណអាស៊ីផ្សេងទៀតក្នុងពាណិជ្ជកម្ម និងការវិនិយោគ ដើម្បីទប់ស្កាត់ការប្រែប្រួលតម្លៃប្រាក់បាតធៀបនឹងប្រាក់ដុល្លារអាមេរិក ។

ជំនួយការទេសាភិបាលលោកស្រី Alisara Mahasandana បាននិយាយថា ធនាគារកណ្តាលជាតិថៃ រំពឹងនឹងប្រើប្រាស់រូបិយប័ណ្ណក្នុងតំបន់កាន់តែច្រើន ដើម្បីជួយកាត់បន្ថយហានិភ័យនៃការប្តូរប្រាក់ ខណៈដែលពួកគេតែងតែប្រែប្រួលតម្លៃ បើប្រៀបធៀបនឹងប្រាក់បាត ។

ថៃដែលពឹងផ្អែកលើពាណិជ្ជកម្ម និងទេសចរណ៍ គឺស្ថិតក្នុងចំណោមប្រទេសមួយចំនួនដែលកំពុងចាត់វិធានការកាត់បន្ថយហានិភ័យនៃប្រាក់ដុល្លារ ដែលកំពុងធ្វើឲ្យរូបិយប័ណ្ណក្នុងស្រុកចុះខ្សោយ ។ ទន្ទឹមនេះ ធនាគារជាតិថៃក៏កំពុងធ្វើការជាមួយប្រទេសចិន ម៉ាឡេស៊ី និងឥណ្ឌូណេស៊ី ដើម្បីផ្សព្វផ្សាយរូបិយប័ណ្ណក្នុងស្រុកនៅក្នុងប្រទេសរបស់ពួកគេផងដែរ ។

ផែនការរបស់ថៃ កើតឡើងមានឡើង ចំពេលមានប្រតិកម្មកាន់តែខ្លាំងឡើងប្រឆាំងនឹងអនុត្តរភាពនៃប្រាក់ដុល្លារអាមេរិកនៅទូទាំងពិភពលោក ស្របពេលដែលប្រាក់បាតបានឡើងថ្លៃដល់ទៅ ៣ ភាគរយក្នុងខែកក្កដា បន្ទាប់ពីបានធ្លាក់ចុះអស់រយៈពេល ៣ ខែជាប់គ្នា ហើយការប្រែប្រួលនៃប្រាក់ដុល្លារ និងប្រាក់បាត ក៏បានកើនឡើងផងដែរ ចាប់តាំងពីឆ្នាំមុនមកម្ល៉េះ ។

ស្របពេលជាមួយគ្នានេះ ធនាគារជាតិថៃបានផ្តើមការកែប្រែច្បាប់នៃការប្តូរប្រាក់បរទេសនៅឆ្នាំ ២០២០ ប៉ុន្តែ​ឱនភាព​គណនី​ចរន្ត​ដ៏​កម្រ​ ក្នុង​អំឡុង​ពេល​ជំងឺ​រាតត្បាតកូវីដ ១៩ ភាគច្រើនដោយសារតែការបាត់ចំណូលពីវិស័យទេសចរណ៍រាប់ពាន់លានដុល្លារ បានធ្វើឲ្យប្រាក់បាតធ្លាក់ចុះដល់កម្រិតទាបបំផុត ក្នុងរយៈពេល ១៦ ឆ្នាំកាលពីឆ្នាំមុន ប៉ុន្តែទោះជាយ៉ាងណារហូតមកដល់ពេលនេះ តម្លៃប្រាក់បាត បានត្រលប់មកវិញប្រហែល ១០ ភាគរយហើយ ។

ដោយឡែក ពាណិជ្ជកម្មជាប្រាក់យ័នជាមួយប្រទេសចិន ដែលជាដៃគូពាណិជ្ជកម្ម និងវិនិយោគដ៏ធំបំផុតរបស់ប្រទេសថៃកាលពីឆ្នាំមុន បានកើនឡើងត្រឹមតែ ១.២ ភាគរយប៉ុណ្ណោះពីប្រហែល ០.៣ ភាគរយនៃពាណិជ្ជកម្មសរុបក្នុងឆ្នាំ ២០១៥ ។ ប៉ុន្តែបច្ចុប្បន្ន ការប្រើប្រាស់ប្រាក់យ័នកាន់តែច្រើន គឺអាចធ្វើទៅបាន ដោយសារចិនបានបន្ធូរបន្ថយច្បាប់ ហើយក្រុមហ៊ុនកាន់តែបើកចំហរក្នុងការស្វែងរកជម្រើសផ្សេងៗដើម្បីកាត់បន្ថយហានិភ័យរូបិយប័ណ្ណ ៕

ប្រែសម្រួល៖ នាង រតនៈ

ប្រភព៖​ Bangkok Post