វៀតណាម សម្លឹងការនាំចេញអង្ករ ៨ លានតោននៅឆ្នាំនេះ

យោងតាមក្រសួងកសិកម្ម និងអភិវឌ្ឍន៍ជនបទវៀតណាមបានឲ្យដឹងថា វៀតណាមអាចនាំចេញអង្ករបានច្រើនបំផុត ៨ លានតោននៅឆ្នាំនេះ ពោលកើនឡើង ១២ ភាគរយ បើប្រៀបធៀបនឹងឆ្នាំ ២០២២ ហើយនៅតែធានាបាននូវតម្រូវការក្នុងស្រុក ។

វៀតណាម អាចផលិតអង្ករបានបរិមាណជាង ២៨ លានតោន​ក្នុងមួយឆ្នាំ ខណៈក្រសួងកសិកម្ម​ធានាថា អង្ករប្រហែល ២០ លានតោនគួរតែគ្រប់គ្រាន់ដើម្បីធានាសន្តិសុខស្បៀងជាតិ ។

ថ្វីត្បិតតែវៀតណាមជាអ្នកនាំចេញអង្ករធំជាងគេទី ២ របស់ពិភពលោក បន្ទាប់ពីឥណ្ឌាក៏ដោយ ក៏ប្រទេសនេះនៅតែនាំចូលពីឥណ្ឌាផងដែរ ប៉ុន្តែ​​ក្រសួងបញ្ជាក់ថា ភាគច្រើនដើម្បីផលិតចំណីសត្វប៉ុណ្ណោះ ។

បច្ចុប្បន្ន​ អង្ករវៀតណាមបានឡើងតម្លៃដល់ ៦៦០ ដុល្លារក្នុងមួយតោន ខណៈដែលទីផ្សារជាច្រើនដូចជាប្រទេសចិន ហ្វីលីពីន និងឥណ្ឌូណេស៊ី បាននិងកំពុងបង្កើនការទិញពីវៀតណាម ។

សូមបញ្ជាក់ វៀតណាមបាននាំចេញអង្ករ ៤.៨៣​ លានតោនក្នុងរយៈពេល ៧ ខែដំបូង និងបានកត់ត្រាប្រាក់ចំណូលជិត ២.៦ ពាន់លានដុល្លារ ខណៈសហភាព​អឺរ៉ុប​បាន​ទិញ​អង្ករ​ពី​វៀតណាម​ចំនួន ២៨ ភាគរយ​បន្ថែម​ទៀត បើ​ធៀប​នឹង​រយៈពេល​ដូចគ្នា​កាលពី​ឆ្នាំ​មុន ៕

ប្រែសម្រួល៖ នាង រតនៈ

ប្រភព៖ VN Express