មកដឹងតម្លៃអង្ករដែល ថៃ និងវៀតណាម លក់បានក្នុងមួយតោន

នៅឆ្នាំនេះ​ ប្រទេស​ផ្គត់ផ្គង់អង្ករ​ធំលំដាប់លេខ ២ និងលេខ ៣ របស់ពិភពលោក​ គឺថៃ និងវៀតណាម ពិតជាត្រូវប៉ាន់ខ្លាំងមែនទែន​ បន្ទាប់ពីឥណ្ឌាបានផ្អាកការនាំចេញអង្ករ ស្របពេលតម្លៃអង្ករពិភពលោកបានឡើងថ្លៃរហូតដល់ ៨០ ដុល្លារក្នុងមួយតោន ។

តម្លៃអង្ករ​នៅវៀតណាម ត្រូវបានពាណិជ្ជករអន្តរជាតិរំពឹងថា នឹងអាចលក់បានតម្លៃដល់ជាង ៧០០ ដុល្លារក្នុងមួយតោន សម្រាប់អង្ករ​ដែលមានគុណភាពខ្ពស់ ។ ខណៈអង្ករ ស វិញ អាចលក់បានក្នុងតម្លៃ ៦១៨ ទៅ ៦២២ ដុល្លារ ដោយលើសពីតម្លៃ​ពីមុន លក់ត្រឹមតែ ៥១៥ ទៅ ៥២៥ ដុល្លារប៉ុណ្ណោះក្នុងមួយតោន ។​ ទន្ទឹមនឹងនេះ វៀតណាមរំពឹង​នឹងអាច​សម្រេចបានការនាំចេញ​អង្កររហូតដល់ទៅជាង ៨ លានតោនឯណោះក្នុងឆ្នាំ ២០២៣ នេះ ។

ដោយឡែក​ អង្ករថៃ​ ដែលជាប្រភេទអង្ករ ស បានឡើងតម្លៃរហូតដល់ ​៦៤៨ ដុល្លារក្នុងមួយតោន ខណៈតម្លៃពីមុន លក់ត្រឹមតែ ៥៤៥ ដុល្លារប៉ុណ្ណោះក្នុងមួយតោន ។ លើស​ពី​នេះ មិនខុសគ្នាពីវៀតណាមឡើយ, អង្ករ​ថៃ អាចនឹងមានតម្លៃដល់ ៧០០ ដុល្លារក្នុងមួយតោនដូចគ្នា សម្រាប់អង្ករ​ដែលមានគុណភាពខ្ពស់ ។

សម្រាប់ថៃ​ ទោះបីជាឆ្នាំនេះ​អាចជួបប្រទះភាពរាំងស្ងួតមិនសូវមានទឹកសម្រាប់ធ្វើស្រែក៏ដោយ ប៉ុន្តែ​នៅតែដាក់គោលដៅនាំចេញអង្ករឲ្យបាន ៨ លានតោនក្នុងឆ្នាំនេះ ពោលគឺកើនឡើងពី ៧.៧១ លានតោន​កាលពីឆ្នាំមុន ។

គួរបញ្ជាក់ថា គិតត្រឹមតែរយៈពេល ៧ ខែប៉ុណ្ណោះ វៀតណាម​សម្រេចបានការនាំចេញ​អង្កររហូតដល់ ៤.៤៨​ លានតោន ពោលតិចជាងថៃ ដែលបាននាំចេញក្នុងបរិមាណដល់ទៅ ៤.៨០ លានតោន ៕

ប្រែសម្រួល៖ នាង​ រតនៈ

ប្រភព៖ Thai Rice Exporter Association