ទីផ្សារពងទានៅតែមានហាងឆេងល្អប្រសើរ

តម្លៃពងទានៅតែរក្សាតម្លៃល្អប្រសើរនៅឆ្នាំ ២០២៣ នេះ ខណៈអ្នកប្រកបរបរចិញ្ចឹមទានៅតែមានទឹកចិត្តបន្តមុខរបររបស់ខ្លួន។

កសិករឈ្មោះ ធី អ្នកចិញ្ចឹមទា នៅស្រុកអង្គស្នួល ខេត្តកណ្ដាល បានប្រាប់ថា លោកចិញ្ចឹមទាជិត ១ ៧០០ ក្បាល ហើយផ្ដល់ផលផលិតប្រមាណជាង ១ ពាន់ពងក្នុងមួយយប់។ ពងទាដែលបានលោកយកទៅលក់បោះដុំនៅលើទីផ្សារឱ្យម៉ូយក្នុងតម្លៃ ៥០០ រៀល។

កសិកររូបនេះបានឱ្យដឹងថា តម្លៃដែលលោកលក់បច្ចុប្បន្នគឺបានថ្លៃគួរសម អាចទូទាត់ទៅលើការចំណាយលើពលកម្ម និងចំណី។

អ្នកស្រី ម៉ោង ស្រីពៅ អគ្គនាយកាភូមិពងទា​ខ្មែរបានប្រាប់កម្ពុជាថ្មីថា ហាងឆេងពងទាឡើងចុះទៅតាមខែ ប៉ុន្តែភាគច្រើនគឺស្ថានភាពល្អប្រសើរដែលតម្លៃបោះដុំ ៤៥០ រៀល ឬ ៥០០ រៀល ក្នុង១គ្រាប់។

អ្នកស្រីថា បច្ចុប្បន្នមិនសូវមានតម្រូវការទីផ្សារ​ច្រើនទេ ​ដោយសារសេដ្ឋកិច្ចមិនល្អ អ្នកលក់តាមអាហារដ្ឋាន ហាងនំដែលសហការជាមួយក្រុមក៏ហ៊ុនលក់មិនសូវដាច់។

ប៉ុន្តែអ្នកស្រីអះអាងថា សម្រាប់តម្លៃនៅតែល្អប្រសើរ ខណៈតម្លៃលក់រាយនៅលើទីផ្សារ ៦០០ រៀល ក្នុងមួយគ្រាប់។ បច្ចុបន្នក្រុមហ៊ុនភូមិពងទាខ្មែរ ​ធ្វើការសហការជាមួយសហគមន៍​កសិករចិញ្ចឹមទាដែលមានខេត្តព្រៃវែង ខេត្តតាកែវ ខេត្តកំពត និងខេត្តកំពង់ចាម។

លោក ស្រ៊ុន ពៅ ប្រធានសមាគមអ្នកចិញ្ចឹមសត្វនៅកម្ពុជា បានឱ្យដឹងថា ស្ថានភាពពងមាន់ ពងទាមានភាពល្អប្រសើរនៅឆ្នាំនេះ ខណៈតម្លៃខុសគ្នាត្រង់លក់ដុំ និងលក់រាយ។

យោងតាមតារាងតម្លៃទំនិញប្រចាំថ្ងៃរបស់ ធនាគារ ARDB នៅថ្ងៃទី ២៣ ខែសីហា ឆ្នាំ២០២៣នេះ បានឱ្យដឹងថា តម្លៃពងទា មួយគ្រាប់ ៦០០ រៀល ពងមាន់ស្រែ ១ គ្រាប់ ៨០០ រៀល៕

អត្ថបទ៖ ឡេង ដេត