រដ្ឋាភិបាលថ្មី ប្រកាសធានាកំណើនសេដ្ឋកិច្ចប្រចាំឆ្នាំ ៧% និងកាត់បន្ថយភាពក្រីក្រឲ្យទាបជាង១០%

រាជរដ្ឋាភិបាលកម្ពុជាថ្មីដែលដឹកនាំឯកឧត្តមបណ្ឌិត ហ៊ុន ម៉ាណែត បានប្រកាសចេញជាផ្លូវការនូវយុទ្ធសាស្រ្តបញ្ចកោណ-ដំណាក់កាលទី១។ យុទ្ធសាស្រ្តបញ្ចកោណ-ដំណាក់កាលទី១នេះ គឺមានបាវចនាចំនួន៥ គោលដៅយុទ្ធសាស្រ្តចំនួន៥ និងអាទិភាពគន្លឹះចំនួន៥។ ក្នុងនោះ រាជរដ្ឋាភិបាលថ្មី បានប្រកាសធានាឲ្យបាននូវកំណើនសេដ្ឋកិច្ចក្នុងរង្វង់៧%ក្នុងមួយ១ឆ្នាំៗ និងទាញទម្លាក់អត្រាភាពក្រីក្រឲ្យទាបជាង១០%។

បើតាមយុទ្ធសាស្រ្តបញ្ចកោណ-ដំណាក់កាលទី១ គឺគោលដៅយុទ្ធសាស្រ្តទាំង៥របស់រាជរដ្ឋាភិបាលកម្ពុជា រួមមាន ទី១.ធានាឲ្យបានកំណើនសេដ្ឋកិច្ចក្នុងអត្រាមធ្យមប្រចាំឆ្នាំក្នុងរង្វង់៧% ប្រកបដោយភាពធន់នឹងវិបត្តិនានា។ ទី២. គឺបង្កើតការងារឲ្យបានកាន់តែច្រើន ទាំងបរិមាណ និងគុណភាព ជូនដល់ប្រជាពលរដ្ឋកម្ពុជា ជាពិសេស សម្រាប់យុវជន ឯទី៣. គឺសម្រេចឲ្យបាននូវគោលដៅកាត់បន្ថយភាពក្រីក្រក្នុងអត្រាទាបជាង១០% និងបន្តខិតខំទាញទម្លាក់អត្រានៃភាពក្រីក្រ ឲ្យស្ថិតនៅក្នុងកម្រិតអប្បបរមា។

ចំណែក ទី៤. គឺបន្តពង្រឹងសមត្ថភាពអភិបាលកិច្ច និងលើកកម្ពស់គុណភាពស្ថាប័ន ទាំងថ្នាក់ជាតិ និងថ្នាក់ក្រោមជាតិ ដើម្បីធានាឲ្យបាននូវប្រសិទ្ធភាពនៃសេវាសាធារណៈ ក៏ដូចជា បន្តពង្រឹងអភិបាលកិច្ចវិស័យឯកជន និងបន្តកិច្ចប្រឹងប្រែងលើកកម្ពស់បរិយាកាសអំណោយផលសម្រាប់ធុរកិច្ច ការវិនិយោគ និងពាណិជ្ជកម្ម។ ដោយឡែក គោលដៅយុទ្ធសាស្រ្តទី៥. គឺធានាឲ្យបាននូវចីរភាពនៃការអភិវឌ្ឍសង្គម-សេដ្ឋកិច្ច និងកសាងភាពធន់ទៅនឹងការប្រែប្រួលអាកាសធាតុ។

ចំពោះបាវចនាទាំង៥របស់យុទ្ធសាស្រ្តបញ្ចកោណ-ដំណាក់កាលទី១វិញ គឺកំណើន ការងារ សមធម៌ ប្រសិទ្ធភាព និងចីរភាព។ ឯកឧត្តមបណ្ឌិត ហ៊ុន ម៉ាណែត នាយករដ្ឋមន្រ្តីនៃកម្ពុជា បានគូសបញ្ជាក់ថា ជាមួយនឹងបាវចនាទាំង ៥ និងគោលដៅយុទ្ធសាស្រ្តទាំង៥នេះ គឺរាជរដ្ឋាភិបាលកម្ពុជា បានសម្រេចកំណត់យកនូវអាទិភាពគន្លឹះចំនួន៥ផងដែរសម្រាប់យុទ្ធសាស្រ្តបញ្ចកោណ-ដំណាក់កាលទី១ គឺមនុស្ស ផ្លូវ​ ទឹក ភ្លើង និងបច្ចេកវិទ្យា៕

ដោយ៖ វណ្ណ សុគន្ធា