ព័ត៌មានជាតិ

រដ្ឋាភិបាលបញ្ជាក់ហេតុផល មិនអាចលើកលែងថ្លៃទិដ្ឋការទេសចរបាន

បានផុស

៤ years មុន

នៅ

ថ្ងៃអង្គារ ២ កុម្ភៈ ២០២១

ដោយ

រដ្ឋាភិបាលនៅតែបន្តយកថ្លៃទិដ្ឋាការលើជនបរទេស ថ្វីបើមានសំណូមពរឲ្យមានការលើកលែង ដើម្បីជំរុញកំណើនភ្ញៀវទេសចរ។

ថ្លែងក្នុងពិធីបើកការដ្ឋានសាងសង់រោងចក្រប្រព្រឹត្តិកម្មទឹកស្អាតបាក់ខែង និង សម្ពោធរោងចក្រ ប្រព្រឹត្តិកម្មទឹកស្អាតចំការមន កាលពីម្សិលមិញ សម្តេចតេជោ ហ៊ុន សែនបានថ្លែងការពារថា ការយកថ្លៃទិដ្ឋាការលើជនបរទេស ជាប្រភពចំណូលមួយរបស់រដ្ឋ។ រដ្ឋមិនទាន់មានអីជំនួស ដោយសារការប្រើប្រាស់ផលិតផលក្នុងស្រុកមានកម្រិតតិចតួចនៅឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

“មានអ្នកសំណូមពរឲ្យដក កុំយកទិដ្ឋាការ តែរឿងលុយ ៣០ដុល្លារមិនជាបញ្ហាទេ។ ប្រទេសគេរាប់រយដុល្លារ ដូចនៅប្រទេសបារាំងជាដើម នៅតែមានភ្ញៀវចាយលុយទៅលេង”។

សម្តេចបញ្ជាក់ថា ការស្នើលើកលែងការយកថ្លៃទិដ្ឋាការមិនអាចធ្វើបានទេ លើកលែងតែប្រទេសកម្ពុជាអាចទាញយកកម្រៃពីវិស័យទេសចរណ៍ឲ្យបានច្រើន ដែលអាចជំនួសយកតម្លៃលើទិដ្ឋាការបាន។

កាលពីឆ្នាំ ២០១៩ កម្ពុជាទទួលភ្ញៀវទេសចរប្រមាណ ៦ លាននាក់។ ក្នុងនោះចំណូលពីការយកថ្លៃទិដ្ឋការមានរហូតដល់ជាង ១៨០ លានដុល្លារ។

រដ្ឋមន្ត្រីក្រសួងទេសចរណ៍ លោក ថោង ខុន ក៏បានពន្យល់ពីមូលហេតុដែលរដ្ឋាភិបាលមិនទាន់អាចឈានដល់ការលើកលែងទិដ្ឋាការ លុះណាកម្ពុជាមានការតភ្ជាប់ជើងហោះហើរទូលំទូលាយទៅបណ្ដាប្រទេសនានា មានផលិតផលទេសចរណ៍សម្បូរបែប ទើបរដ្ឋាភិបាលពិចារណារឿងលើកលែងទិដ្ឋាការនេះ៕

អត្ថបទ៖ ប៊ុណ្ណារ៉ា