៧ ខែដំបូងនៃឆ្នាំនេះ ទំហំណិជ្ជកម្ម ចិន-អាស៊ាន មានលើស ៣៨០ ពាន់លានដុល្លារ

ចិន គឺជាដៃគូពាណិជ្ជកម្មដ៏ធំបំផុតរបស់អាស៊ានសម្រាប់រយៈពេល ១៤ ឆ្នាំជាប់ៗគ្នា ហើយភាគីទាំងពីរ គឺជាដៃគូពាណិជ្ជកម្មដ៏ធំបំផុតរបស់គ្នាទៅវិញទៅមកក្នុងរយៈពេល ៣ ឆ្នាំជាប់គ្នាចុងក្រោយ ខណៈនៅឆ្នាំ ២០២២ ពាណិជ្ជកម្មចិន-អាស៊ាន បានកើនលើស ៩៧០ ពាន់លានដុល្លារ កើនឡើង ១១.២ ភាគរយពីឆ្នាំមុន ។

ដោយឡែកសម្រាប់រយៈពេល​ ៧ ខែ​ក្នុងឆ្នាំ ២០២៣ នេះ ពោលគិតត្រឹមខែកក្កដា​ ការវិនិយោគទ្វេភាគីរវាងប្រទេសចិន និងបណ្តាប្រទេសអាស៊ានមានលើសពី ៣៨០ ពាន់លានដុល្លារអាមេរិក ។

ទន្ទឹមនឹងនេះ ពាណិជ្ជកម្ម ចិន-អាស៊ាន ក៏រំពឹងនឹងកើនឡើងបន្ថែមទៀតផងដែរ ជាពិសេសអំឡុងពេលពិព័រណ៍ចិន-អាស៊ាន ដែលជាវេទិកាដ៏សំខាន់មួយសម្រាប់ការពង្រឹងកិច្ចសហប្រតិបត្តិការ ចិន-អាស៊ាន និងការលើកកម្ពស់សមាហរណកម្មសេដ្ឋកិច្ចក្នុងតំបន់ ។

ពាក់ព័ន្ធជាមួយការតាំងពិព័រណ៍ ចិន-អាស៊ាន ឆ្នាំនេះ​ដែរ ប្រទេសចិនសង្ឃឹមថា ព្រឹត្តិការណ៍នេះនឹងក្លាយជាឱកាសសម្រាប់ភាគីទាំងអស់ក្នុងការស្វែងរកឱកាស ជួបបញ្ហាប្រឈម និងបន្តកិច្ចសហប្រតិបត្តិការរួមគ្នា​ផងដែរ ។

លើសពីនេះ ការអនុវត្តប្រកបដោយគុណភាពខ្ពស់នៃភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ដែលជំរុញសេរីភាវូបនីយកម្មពាណិជ្ជកម្ម ការវិនិយោគ និងការសម្របសម្រួលរវាងចិន និងអាស៊ាន នឹងធ្វើឲ្យប្រសើរឡើងនូវការតភ្ជាប់ក្នុងតំបន់ ការកសាងសេដ្ឋកិច្ចតំបន់បើកចំហ ក៏ដូចជាជំរុញការកសាងសហគមន៍ ចិន-អាស៊ាន កាន់តែជិតស្និទ្ធជាមួយនឹងអនាគតរួមគ្នាផងដែរ ៕​

ប្រែសម្រួល៖ នាង រតនៈ

ប្រភព៖ MFA of China