ទីក្រុងញូវយ៉ក នៅតែ​ជាមជ្ឈមណ្ឌលហិរញ្ញវត្ថុកំពូលរបស់ពិភពលោក

សន្ទស្សន៍មជ្ឈមណ្ឌលហិរញ្ញវត្ថុសកលបានបង្ហាញថា ​ទីក្រុង​ញូវយ៉កនៅតែជាមជ្ឈមណ្ឌលហិរញ្ញវត្ថុកំពូលរបស់ពិភពលោកដដែល ខណៈទីក្រុងឡុងដ៍របស់អង់គ្លេសស្ថិតនៅ​លំដាប់លេខ ២​ ប៉ុន្តែ​នៅតែ​ប្រកួតប្រជែងយ៉ាងស្វិតស្វាញជាមួយសិង្ហបុរី និងហុងកុង ។

ទីក្រុងញូវយ៉កស្ថិតក្នុងចំណាត់ថ្នាក់កំពូល ចាប់តាំងពីទម្លាក់ទីក្រុងឡុងដ៍ក្នុងខែកញ្ញា ឆ្នាំ ២០១៨ ដោយបាននាំមុខ ៧៦៣ ពិន្ទុគ្របដណ្តប់មជ្ឈមណ្ឌលចំនួន ១២១ រួមទាំងធនាគារពិភពលោក, អង្គការសម្រាប់កិច្ចសហប្រតិបត្តិការសេដ្ឋកិច្ច និងការអភិវឌ្ឍន៍ (OECD) និងអង្គការសហប្រជាជាតិផងដែរ ។

ចំណែកទីក្រុងឡុងដ៍វិញមាន ៧៤៤ ពិន្ទុ ដោយមានគម្លាត ក្រោយ​ទីក្រុងញូវយ៉ក ១៩ ពិន្ទុ ។ ទន្ទឹមនឹងនេះ សិង្ហបុរី តាមពីក្រោយទីក្រុងឡុងដ៍ត្រឹមតែ ២ ពិន្ទុប៉ុណ្ណោះ ខណៈទីក្រុងហុងកុង ស្ថិតនៅចំណាត់ថ្នាក់លេខ ៤ ។

ចំពោះសន្ទស្សន៍នេះដែរ ត្រូវបានចងក្រងជារៀងរាល់ ៦ ខែម្តង ដោយវិទ្យាស្ថានអភិវឌ្ឍន៍ចិន និងក្រុមអ្នកវិភាគ Z and Yen ដែលមានមូលដ្ឋាននៅទីក្រុងឡុងដ៍ ។

បន្ថែមពីនេះ ការស្ទង់មតិបានបង្ហាញថា មជ្ឈមណ្ឌលសហរដ្ឋអាមេរិក បានដំណើរការយ៉ាងល្អ ខណៈមានមជ្ឈមណ្ឌលពាណិជ្ជកម្មចំនួន ៥ ទៅហើយស្ថិតនៅក្នុងតារាងកំពូលទាំង ១០ ដែលឆ្លុះបញ្ចាំងពីភាពរឹងមាំនៃសេដ្ឋកិច្ចសហរដ្ឋអាមេរិទាំងមូល ៕

ប្រែសម្រួល៖ នាង រតនៈ

ប្រភព៖ Reuters

ចុចអាន៖ សមាជិកព្រឹទ្ធសភាបក្សប្រឆាំង អាមេរិក ថា វិបត្តិជនចំណាកស្រុកនឹងកម្ទេច ទីក្រុងញូវយ៉ក