ចិន បង្កើនទុនបម្រុងមាសក្នុងរយៈពេល ១១ ខែ ជាប់ៗគ្នា

យោងតាមទិន្នន័យជាផ្លូវការ​ដែលបង្ហាញដោយធនាគារជាតិចិនបានឲ្យដឹងថា នៅក្នុងខែកញ្ញាចិនបានបន្ថែមមាសចំនួន ២៦ តោនទៀត ដែលជាការបង្កើនទុនបម្រុង​មាសរបស់ខ្លួនក្នុងរយៈពេល​ ១១ ខែជាប់ៗគ្នា ។

ទន្ទឹមនោះ ការបន្ថែមនេះនាំឲ្យទុនបម្រុងមាសចិននាពេលបច្ចុប្បន្ននេះកើនឡើង​ដល់ ២,១៩១ តោនជាមួយនឹងការបន្ថែមប្រហែល ២១៧ តោន នៅក្នុងការទិញសរុប ចាប់តាំងពីការទិញនៅក្នុងខែវិច្ឆិកា ឆ្នាំ ២០២២ មក ។

បើតាមអ្នកជំនាញហិរញ្ញវត្ថុចិនបានឲ្យដឹងថា នៅពេលដែលចិនបន្ថយការកាន់កាប់បំណុលរបស់អាមេរិក ចិនត្រូវបង្កើនស្វែងរកការកាន់កាប់ទ្រព្យសកម្មផ្សេងទៀតដែលមានតែមាសប៉ុណ្ណោះ ជាទ្រព្យសម្បត្តិឥណទានមានគុណភាពខ្ពស់បំផុតនាពេលបច្ចុប្បន្ន ។

ទន្ទឹមនឹងនេះ អ្នកប្រាជ្ញ និងអ្នកនិពន្ធហិរញ្ញវត្ថុចិនលោក Sun Xiaoji អះអាងថា ធនាគារកណ្តាលចិន កំពុងបង្កើនការកាន់កាប់មាសយ៉ាងសកម្ម ដោយមិនបានរាប់បញ្ចូលសេណារីយ៉ូដែលចិន​អាចនឹងត្រូវបានគេដកចេញពីប្រព័ន្ធទូទាត់ប្រាក់ដុល្លារជាសកលឡើយ ។

ម្យ៉ាងវិញទៀត រូបិយប័ណ្ណជាតិរបស់ប្រទេសចិនក៏បានបង្ហាញសញ្ញានៃការរឹងមាំនាពេលកន្លងមកផងដែរ ខណៈទិន្នន័យផ្លូវការដែលដកស្រង់ដោយប្រព័ន្ធផ្សព្វផ្សាយរបស់ចិនបង្ហាញថា ប្រាក់យ័នបានក្លាយជារូបិយប័ណ្ណទូទាត់ធំបំផុតទី ៥ របស់ពិភពលោក និងជារូបិយប័ណ្ណធំទី ៣ ក្នុងការទូទាត់ពាណិជ្ជកម្ម ៕

ប្រែសម្រួល៖ នាង រតនៈ

ប្រភព៖ Sputnik