ចិន បញ្ចុះតម្លៃលក់រាយប្រេងសាំង និងម៉ាស៊ូត

អ្នករៀបចំផែនការសេដ្ឋកិច្ចកំពូលរបស់ចិននិយាយថា ប្រទេសចិននឹងកាត់បន្ថយតម្លៃលក់រាយប្រេងសាំង និងប្រេងម៉ាស៊ូតចាប់ពីថ្ងៃពុធនេះតទៅ ដោយសារតែមានការប្រែប្រួលថ្មីៗនៃតម្លៃប្រេងអន្តរជាតិ ។

គណៈកម្មការអភិវឌ្ឍន៍ និងកំណែទម្រង់ជាតិចិនបញ្ជាក់ថា តម្លៃសាំងនឹងត្រូវបានកាត់បន្ថយចំនួន ៨៥ យ័នប្រហែល ១១.៨៤ ដុល្លារអាមេរិកក្នុងមួយតោន ខណៈតម្លៃប្រេងម៉ាស៊ូតនឹងកាត់ ៨០ យ័នប្រហែល ១០.៩៧ ដុល្លារក្នុងមួយតោន ។

ទន្ទឹមនោះ ក្រុមហ៊ុនប្រេងឈានមុខគេចំនួន ៣ របស់ប្រទេសចិនគឺ សាជីវកម្មប្រេងជាតិចិន សាជីវកម្មប្រេងសំយោគចិន និងសាជីវកម្មប្រេងឈូងសមុទ្រជាតិចិន រួមជាមួយរោងចក្រចម្រាញ់ប្រេងផ្សេងទៀត ត្រូវបានស្នើសុំឲ្យរក្សាផលិតកម្មប្រេង និងសម្រួលការដឹកជញ្ជូនដើម្បីធានាការផ្គត់ផ្គង់ប្រកបដោយស្ថិរភាព ។

គួរបញ្ជាក់ថា ការកាត់បន្ថយតម្លៃលក់រាយប្រេងសាំង និងម៉ាស៊ូតរបស់ចិនកើតមានឡើង បន្ទាប់ពីការវាយប្រហារមិនធ្លាប់មានរបស់​ក្រុមហាម៉ាស់ទៅលើអ៉ីស្រាអែល ខណៈជម្លោះនេះក៏បានរុញឲ្យតម្លៃប្រេងអន្តរជាតិឡើងដល់ជាង ៤ ដុល្លារក្នុងមួយបារ៉ែលផងដែរ ៕​

ប្រែសម្រួល៖ នាង រតនៈ

ប្រភព៖​ Xinhua