ក្រុមហ៊ុនអចលនទ្រព្យ ចិន Country Garden ដល់ថ្ងៃសងបំណុល ខណៈហានិភ័យ​បរាជ័យ​មានកាន់តែខ្ពស់

ក្រុមហ៊ុនអភិវឌ្ឍន៍អលនទ្រព្យ Country Garden អាចត្រូវបានបរាជ័យក្នុងការទូទាត់សងបំណុលក្រៅប្រទេស​ ប្រសិនបើក្រុមហ៊ុនខកខានសងបំណុលគូប៉ុង ១៥ លានដុល្លារ នៅថ្ងៃទី១៧ ខែតុលានេះ ដែលជាការបញ្ចប់នៃរយៈពេលអនុគ្រោះរយៈពេល ៣០ ថ្ងៃ។

​កាលពីសប្តាហ៍មុន ក្រុមហ៊ុនបានព្រមានរួចមកហើយថា ក្រុមហ៊ុនប្រហែលជាមិនអាចទូទាត់សងបំណុលនៅក្រៅប្រទេសទាំងអស់បាននោះទេ ហើយប្រសិនបើក្រុមហ៊ុនបរាជ័យក្នុងការសងប័ណ្ណបំណុលនៅថ្ងៃអង្គារនេះ នោះនឹងក្លាយទៅជាជនរងគ្រោះចុងក្រោយក្នុងចំណោមអ្នកអភិវឌ្ឍន៍អចលនទ្រព្យធំៗជាច្រើនរបស់ចិន ដែលបានបរាជ័យសងបំណុលរបស់ពួកគេ ។

ក្រុមហ៊ុនអភិវឌ្ឍន៍អចលនទ្រព្យ Country Garden ធ្លាប់បានចៀសផុតពីការបរាជ័យ​ម្តងរួចមកហើយ​កាលពីខែកញ្ញា​ បន្ទាប់ពីបានទូទាត់សងប័ណ្ណបំណុលចំនួន ២២.៥ លានដុល្លារ ។

ទាក់ទិនទៅនឹង ការរកប្រាក់សងបំណុលនេះដែរ ស្ថាបនិកនៃក្រុមហ៊ុន Country Garden បានផ្តល់ប្រាក់កម្ចីដល់ក្រុមហ៊ុនដោយមិនគិតការប្រាក់ចំនួន ៣០០ លានដុល្លារអាមេរិក ហើយថែមទាំងព្យាយាមលក់យន្តហោះផងដែរដើម្បីរៃអង្គាសប្រាក់ ។

គួរបញ្ជាក់ថា ក្រុមហ៊ុនអចលនទ្រព្យយក្សចិន រួនទាំងក្រុមហ៊ុន Evergrande និង Country Garden បានរងគ្រោះដោយបញ្ហាបំណុលវ័ណ្ឌក​ដែលប៉ះពាល់ដល់ទំនុកចិត្តយ៉ាងខ្លាំងរបស់អតិថិជន ៕

ប្រែសម្រួល៖ នាង រតនៈ

ប្រភព៖​ CNBC