ចិន នឹងជំរុញសេដ្ឋកិច្ចឲ្យស្ទុះងើបឡើងវិញដើម្បីទប់ស្កាត់ហានិភ័យហិរញ្ញវត្ថុ

ទេសាភិបាលធនាគារកណ្តាលចិនលោក Pan Gongsheng បាននិយាយថា ចិន​នឹងជំរុញ​ការស្ទុះ​ងើបឡើងវិញនៃសេដ្ឋកិច្ច​ប្រកបដោយនិរន្តរភាព ដោយផ្តោតសំខាន់លើការពង្រីកតម្រូវការក្នុងស្រុក ខណៈក៏កំពុងការពារហានិភ័យ​នៃហិរញ្ញវត្ថុផងដែរ ។

លោក Pan បានលើកឡើងថា ធនាគារកណ្តាលនឹងធ្វើឲ្យគោលនយោបាយរបស់ខ្លួនកាន់តែច្បាស់លាស់ និងខ្លាំងក្លាជាងមុន ខណៈពេលដែលណែនាំស្ថាប័នហិរញ្ញវត្ថុឲ្យកាត់បន្ថយអត្រាការប្រាក់កម្ចី និងកាត់បន្ថយការចំណាយហិរញ្ញវត្ថុសម្រាប់ក្រុមហ៊ុន និងបុគ្គលិកផងដែរ ។

តាមរយៈរបាយការណ៍​នេះ គឺជាលើកដំបូងហើយដែលទេសាភិបាលធនាគារកណ្ដាលចិន មានមតិយោបល់លើគោលនយោបាយក្នុងប្រទេស បន្ទាប់ពីការចេញផ្សាយទិន្នន័យសេដ្ឋកិច្ចនៅត្រីមាសទី ៣ ។

សម្រាប់កិច្ចខិតខំប្រឹងប្រែងនេះដែរ នឹងត្រូវបានធ្វើឡើងដើម្បីឲ្យទីផ្សារមូលធនសកម្ម និងជំរុញទំនុកចិត្តវិនិយោគិន ។ មិនតែប៉ុណ្ណោះ ធនាគារក៏នឹងអនុវត្តការកែសម្រួលគោលនយោបាយម៉ាក្រូ ដើម្បីឆ្លើយតបទៅនឹងការផ្លាស់ប្តូរនៃស្ថានភាពសេដ្ឋកិច្ច ពង្រឹងការត្រួតពិនិត្យហិរញ្ញវត្ថុប្រកបដោយប្រសិទ្ធភាព ផ្តោតលើការពង្រីកតម្រូវការក្នុងស្រុក បង្កើនទំនុកចិត្ត និងការការពារហានិភ័យ ក៏ដូចជាលើកកម្ពស់ការងើបឡើងវិញប្រកបដោយនិរន្តរភាពនៅក្នុងសេដ្ឋកិច្ចផងដែរ ។

លើសពីនេះ គោលនយោបាយនឹងរក្សាស្ថិរភាពក៏ដូចជាជំរុញនូវគ្រោងការណ៍អន្តរជាតិនីយកម្មប្រាក់យ័ន គ្រប់គ្រងហានិភ័យសម្រាប់ការវិនិយោគនៅក្រៅប្រទេស ការពារហានិភ័យនៃការប្រែប្រួលខុសប្រក្រតីនៃលំហូរមូលនិធិឆ្លងព្រំដែន និងរក្សាស្ថិរភាពក្នុងទីផ្សារប្តូរប្រាក់បរទេស រួមជាមួយការការពារទ្រព្យសម្បត្តិរូបិយប័ណ្ណបរទេសផងដែរ ។

ដោយឡែកពាក់ព័ន្ធជាមួយបំណុល​វិញ នឹងណែនាំស្ថាប័នហិរញ្ញវត្ថុដើម្បីជួយដោះស្រាយហានិភ័យបំណុលរបស់រដ្ឋាភិបាលក្នុងតំបន់ រួមទាំងហានិភ័យបំណុលផ្តល់ហិរញ្ញប្បទានរបស់រដ្ឋាភិបាលក្នុងតំបន់ផងដែរ ។ ជាមួយគ្នានេះ នឹងដោះស្រាយហានិភ័យមូលបត្របំណុលរបស់សហគ្រាសអចលនទ្រព្យធំៗ ការពារការឆ្លងហានិភ័យនៅក្នុងទីផ្សារភាគហ៊ុន សញ្ញាប័ណ្ណ និងទីផ្សារប្តូរប្រាក់បរទេស ក៏ដូចជាធានាឲ្យមានប្រតិបត្តិការស្ថិរភាពនៃទីផ្សារហិរញ្ញវត្ថុផងដែរ ៕

​ប្រែសម្រួល៖ នាង រតនៈ

ប្រភព៖​ Reuters