កសិករ វៀតណាម លក់ស្រូវបានថ្លៃជាងមុន ដោយសារមានតម្រូវការខ្ពស់

តម្លៃអង្ករនៅវៀតណាមបន្ដកើនឡើងថ្លៃ ស្របពេលដែលតម្រូវការ​អង្ករនៅទូទាំងពិភពលោកក៏ឡើងខ្ពស់ដូចគ្នា រួមផ្សំជាមួយ​អង្ករ​មានគុណភាព និង​ការប្រមូលផលក្នុងប្រទេសមានការធ្លាក់ចុះផង ។​

កសិករវៀតណាមដែលធ្វើស្រូវប្រភេទ Dai Thom បានលើកឡើងថា ពីមុនការ​លក់ស្រូវក្នុងមួយគីឡូក្រាមមានតម្លៃ ៨,០០០ ដុង (០.៣៣ ដុល្លារ) ប៉ុន្តែឥឡូវនេះតម្លៃបានឡើងដល់ ៩,០០០ ដុង (0.៣៦ ដុល្លារ) ដោយកើនឡើង ១២.៥ ភាគរយ ខណៈឈ្មួញផ្សេងទៀតឲ្យតម្លៃដល់​ ១១,០០០ ដុង (០.៤៥​ ដុល្លារ) ដែលកើនឡើង ២២ ភាគរយ ។

តាមការបញ្ជាក់ពីក្រសួងកសិកម្ម និងអភិវឌ្ឍន៍ជនបទវៀតណាមបានឲ្យដឹងថា តម្លៃអង្ករបាននិងកំពុងកើនឡើងជារៀងរាល់ថ្ងៃ ជាពិសេសនៅតំបន់ភាគខាងជើង និងដីសណ្ដទន្លេមេគង្គ ។ ដូច្នេះតម្លៃនាំចេញបានកើនដល់ ៦៤៣ ដុល្លារក្នុងមួយតោនសម្រាប់អង្ករបាក់ ៥ ភាគរយ ដែលជាតម្លៃខ្ពស់បំផុតក្នុងរយៈពេល ១៥ ឆ្នាំកន្លងមកនេះ ។​

បន្ថែមពីនេះ លោក Do Ha Nam អនុប្រធានសមាគមស្បៀងអាហារវៀតណាមនិយាយថា ដោយសារតម្លៃក្នុងស្រុកខ្ពស់ជាងតម្លៃនាំចេញនាពេលបច្ចុប្បន្ន អាជីវករមានការស្ទាក់ស្ទើរក្នុងការចុះហត្ថលេខាលើកិច្ចព្រមព្រៀងនាំចេញថ្មី ដោយសារតែខ្លាចមិនអាចបំពេញការបញ្ជាទិញបាន ។ មិនតែប៉ុណ្ណោះ ពាណិជ្ជករ​ត្រូវលក់ក្នុងតម្លៃ ៦៥០-៦៨០ ដុល្លារក្នុងមួយតោន ដើម្បីទទួលបានចំណេញ ប្រសិនបើតម្លៃក្នុងស្រុកបន្តនៅកម្រិតខ្ពស់បែបនេះ ។

គួរបញ្ជាក់ថា បច្ចុប្បន្ន តម្លៃ​អង្ករ​នាំ​ចេញ​របស់​វៀតណាមគឺខ្ពស់ជាងគូរប្រជែងថៃ ១៣ ភាគរយ និង ១៦ ភាគរយខ្ពស់​ជាង​ប៉ាគីស្ថាន ខណៈក្នុងរយៈពេល ៩ ខែដំបូង វៀតណាមបាននាំចេញអង្ករចំនួន ៦.៦ លានតោន ហើយសរុបក្នុងឆ្នាំនេះ វៀតណាមអាចនាំចេញអង្កររហូតដល់ ៧.៨ លានតោន ក្នុងមានតម្លៃ ៤.៥ លានដុល្លារ ៕

ប្រែសម្រួល៖ នាង រតនៈ

ប្រភព៖ VN Express

ចុចអាន៖ ថៃ បន្តគោលនយោបាយលើកលែងទិដ្ឋាការដល់ប្រទេស និងដែនដីចំនួន ២ ទៀត