ចំណូលរបស់ក្រុងហូជីមិញ ទំនងនឹងធ្លាក់ចុះ ៥ ភាគរយក្នុងឆ្នាំនេះ​

ប្រាក់ចំណូលពន្ធរបស់ទីក្រុងហូជីមិញប្រទេសវៀតណាមនៅក្នុងឆ្នាំនេះ ត្រូវបានអ្នកជំនាញហិរញ្ញវត្ថុរំពឹងថា នឹងធ្លាក់ចុះពី ៤ ភាគរយទៅ ៥ ភាគរយនៃគោលដៅរបស់ខ្លួន ដោយសារបញ្ហាប្រឈមផ្នែកសេដ្ឋកិច្ច និងការធ្លាក់ចុះចំណូលសរុប ២០ ពាន់ពាន់លាន​ដុង ឬប្រហែល ៨១៣.១២ លាន​ដុល្លារ ។

លោក Le Duy Minh ប្រធាននាយកដ្ឋានហិរញ្ញវត្ថុរបស់ទីក្រុងបាននិយាយថា ប្រាក់ចំណូលបានធ្លាក់ចុះ ៨.១ ភាគរយ បើធៀបនឹងឆ្នាំមុន ដោយទទួលបាន ៣៧២ ពាន់ពាន់លានដុង ឬប្រហែល ១៥ ពាន់លានដុល្លារ ក្នុងរយៈពេល ១០ ខែដំបូង ស្មើនឹង ៧៩.៣ ភាគរយនៃគោលដៅសម្រាប់ឆ្នាំនេះ ។

ស្របពេលជាមួយគ្នានេះ សមាសភាពសំខាន់ៗនៃពន្ធទីក្រុងហូជីមិញដែលបានមកពីការប្រមូលពន្ធក្នុងស្រុក ពាណិជ្ជកម្ម និងពន្ធលើប្រេងឆៅ សុទ្ធតែមានការធ្លាក់ចុះដូចគ្នា ។

លោក Minh បន្តថា ស្ថានភាពសេដ្ឋកិច្ចទំនងជានឹងនៅតែលំបាកក្នុងរយៈពេល ២ ខែចុងក្រោយនេះ ឬពេញមួយឆ្នាំតែម្ដង ។​ មិនតែប៉ុណ្ណោះ លោកបានស្នើឲ្យទីក្រុងផ្តោតលើការប្រមូលបំណុលពន្ធដែលមានតម្លៃសរុបជាង ៤០ ពាន់ពាន់លានដុង ឬប្រហែល ១.៦ ពាន់លានដុល្លារក្នុងរយៈពេល ២ ខែចុងក្រោយនេះផងដែរ ។

គួរឲ្យដឹងថា​ រដ្ឋាភិបាល​វៀតណាមដាក់គោលដៅលើក្រុងហូជីមិញធ្វើយ៉ាងណារកចំណូលឲ្យបាន ៤៦៩.៦៨ ពាន់ពាន់លានដុង ឬប្រហែល ១៩ ពាន់លានដុល្លារនៅឆ្នាំនេះ ប៉ុន្តែសញ្ញានៃការធ្លាក់ចុះត្រូវបានបង្ហាញតាំងពីត្រីមាសទី១ មកម្ល៉េះ ចំពេលមានការប្រកួតប្រជែងសេដ្ឋកិច្ចក្នុងស្រុក និងពិភពលោក ខណៈកាលពីឆ្នាំមុន ទីក្រុងហូជីមិញរកចំណូលបានជាង​ ៤៧១.៥៦ ពាន់ពាន់លានដុង ស្មើនឹង ១៩.១៧៦ ពាន់លានដុល្លារ ៕

ប្រែសម្រួល៖ នាង រតនៈ

ប្រភព៖​ VN Express