ព័ត៌មានជាតិ

ក្រុមហ៊ុនកូរ៉េចំនួន ១៦ កំពុងវិនិយោគលើវិស័យធនាគារ និងមីក្រូហិរញ្ញវត្ថុនៅកម្ពុជា

បានផុស

១ year មុន

នៅ

ថ្ងៃអង្គារ ៧ វិច្ឆិកា ២០២៣

ដោយ

តាមរយៈ «លទ្ធផលនៃកិច្ចប្រជុំគណៈកម្មការចម្រុះកម្ពុជា-កូរ៉េ លើកទី ៥» បានបង្ហាញពីកិច្ចសហប្រតិបត្តិការនិងការវិនិយោគរបស់កូរ៉េលើវិស័យហិរញ្ញវត្ថុក្នុងប្រទេសកម្ពុជា។

ក្នុងកិច្ចប្រជុំគណៈកម្មការចម្រុះ កម្ពុជា-កូរ៉េ លើកទី ៥ ដែលរៀបចំឡើងកាលពីពេលថ្មីៗនេះដែលមានលោកជំទាវ ទួត បញ្ញា រដ្ឋលេខាធិការនៃក្រសួងការបរទេសនិងសហប្រតិបត្តិការអន្តរជាតិ និងលោក ចាង ហូជីន (CHANG Ho-jin) អនុរដ្ឋមន្រ្តីទី ១ ក្រសួងការបរទេសនៃសាធារណរដ្ឋកូរ៉េ ជាសហប្រធានដឹកនាំកិច្ចប្រជុំ កម្ពុជាកូរ៉េបានសម្តែងការពេញចិត្តចំពោះកិច្ចសហប្រតិបត្តិការលើវិស័យជាច្រើនរួមមាន នយោបាយ ការពារជាតិ ពាណិជ្ជកម្ម និងវិនិយោគ ហេដ្ឋារចនាសម្ព័ន្ធ កសិកម្ម សុខាភិបាល វប្បធម៌ ទេសចរណ៍ ការអភិវឌ្ឍធនធានមនុស្ស ការផ្លាស់ប្តូរប្រជាជន និងប្រជាជន ក្នុងចំណោមវិស័យផ្សេងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំពោះវិស័យសេដ្ឋកិច្ច ភាគីទាំងពីរបានកត់សម្គាល់ដោយសុទិដ្ឋិនិយមអំពីការងើបឡើងវិញជាលំដាប់នៃពាណិជ្ជកម្មរវាងប្រទេសទាំងពីរ នៅក្រោយវិបត្តិជំងឺរាតត្បាតសកលកូវីដ-១៩ និងបានសម្ដែងនូវការទុកចិត្តថា តាមរយៈការអនុវត្តដោយពេញលេញនូវកិច្ចព្រមព្រៀងពាណិជ្ជកម្មសេរី កម្ពុជា-កូរ៉េ និងកិច្ចព្រមព្រៀងស្ដីពីការចៀសវាងការយកពន្ធត្រួតគ្នារវាងកម្ពុជា-សាធារណរដ្ឋកូរ៉ ទំហំពាណិជ្ជកម្មទ្វេភាគីនឹងបន្តកើនឡើងថែមទៀត លើសកម្រិតមុនពេលមានជំងឺរាតត្បាតសកលទៅទៀត។ ភាគីកូរ៉េបានទទួលយកទៅពិចារណាសំណើរបស់កម្ពុជា ដែលចង់ឱ្យកូរ៉េបើកចំហទីផ្សារកាន់តែធំជាងមុនសម្រាប់ផលិតផលកសិកម្មកម្ពុជា រួមមានដូចជា ស្វាយ គ្រាប់ស្វាយចន្ទី ម្រេច ម្ទេស ស្រកានាគ ម្នាស់ និងដំឡូងមី។

ភាគីទាំងពីរបានឯកភាពធ្វើការរួមគ្នាដើម្បីទាក់ទាញវិនិយោគកូរ៉េមកកាន់កម្ពុជាបន្ថែមទៀត និងបានសម្តែងការពេញចិត្តចំពោះកិច្ចសហប្រតិបត្តិការលើវិស័យហិរញ្ញវត្ថុ ដែលត្រូវបានបង្ហាញឱ្យឃើញតាមរយៈវិនិយោគរបស់កូរ៉េលើធនាគារ និងស្ថាប័នមីក្រូហិរញ្ញវត្ថុចំនួន ១៦។ ភាគីទាំងពីរបាន ឯកភាពគ្នាស្វែងរកឱកាសកិច្ចសហប្រតិបត្តិការផ្នែកហិរញ្ញវត្ថុបន្ថែមទៀត។

ចំពោះកិច្ចសហប្រតិបត្តិការលើវិស័យហេដ្ឋារចនាសម្ព័ន្ធ ភាគីកម្ពុជាបានធ្វើការវាយតខ្ពស់ចំពោះជំនួយរបស់កូរ៉េ និងបានឯកភាពគ្នាពន្លឿនការអនុវត្តគម្រោង «ស្ពានមិត្តភាពកម្ពុជា-កូរ៉េ»។

គួរបញ្ជាក់ថា កម្ពុជានិងកូរ៉េកំពុងពង្រឹងនិងពង្រីកយ៉ាងស៊ីជម្រៅ និងទូលំទូលាយ ចាប់តាំងពីការតភ្ជាប់ទំនាក់ទំនងការទូតឡើងវិញនៅឆ្នាំ១៩៩៧។ ភាគីទាំងពីរបានយល់ស្របគ្នាថា ទំនាក់ទំនង ទ្វេភាគីគួរត្រូវដំឡើងកម្រិតឱ្យខ្ពស់ជាងនេះ ដើម្បីឆ្លុះបញ្ចាំងនូវទំនាក់ទំនង និងកិច្ចសហប្រតិបត្តិការដ៏ធំធេងរវាងប្រទេសទាំងពីរ។

បើយោងតាមទិន្នន័យពីក្រុមប្រឹក្សាអភិវឌ្ឍន៍កម្ពុជា នៅរយៈពេលជាង ២០ ឆ្នាំនេះ វិនិយោគគិនកូរ៉េខាងត្បូងបានមកបោះទុនវិនិយោគនៅកម្ពុជាជិត ៧ ពាន់លានដុល្លាអាមេរិក៕