តម្រូវការផ្ទះល្វែងតម្លៃជាង ១ ពាន់ដុល្លារក្នុងមួយម៉ែត្រការ៉េនៅ ហូជីមិញ និងហាណូយ ធ្លាក់ចុះយ៉ាងខ្លាំង​

ផ្ទះល្វែងដែលមានតម្លៃសមរម្យនៅទីក្រុងហាណូយធ្លាក់ចុះខ្លាំងមែនទែន ពោលមានត្រឹមតែ ៥ ភាគរយប៉ុណ្ណោះនៅក្នុងឆ្នាំនេះ ខណៈនៅក្រុងហូជីមិញ​វិញមិនមានការផ្គត់ផ្គង់ផ្ទះល្វែងដែលមានតម្លៃសមរម្យថ្មីឡើយ ។

ក្រសួងសំណង់វៀតណាម បានចាត់ថ្នាក់ផ្ទះល្វែងដែលមានតម្លៃសមរម្យចន្លោះពី ២៥ ទៅ ៣៥ លានដុង ឬប្រហែល ១,០៣០ ទៅ ១,៤៤០ ដុល្លារក្នុងមួយម៉ែត្រការ៉េ ឬតិចជាងមួយម៉ែត្រការ៉េ ។

យោងតាមក្រសួងសំណង់បានឲ្យដឹងថា ផ្ទះល្វែងជាមធ្យមដែលមានផ្ទៃដី ៥០ ទៅ ៦០ ​ម៉ែត្រការ៉េនៅក្នុងទីក្រុងហាណូយមានតម្លៃ ២.៥ ទៅ ៣ ពាន់លានដុង ស្មើនឹងប្រហែល ១២៣,៣០៤ ដុល្លារ ខណៈនៅហូជីមិញវិញ តម្លៃជាមធ្យមគឺ ៣ ទៅ ៣.៦ ពាន់លានដុង ស្មើនឹងប្រហែល ១៤៧,៩៦៥ ដុល្លារ ។

ចំពោះហេតុផលដែលធ្វើឲ្យលែងមានផ្ទះល្វែងតម្លៃសមរម្យនេះដែរ គឺដោយសារតែទំហំផ្ទៃដីមានកម្រិត ការផ្គត់ផ្គង់លំនៅដ្ឋានខ្វះខាត តម្លៃដីឡើងខ្ពស់ ការកើនឡើងថ្លៃសំណង់ និងកម្លាំងពលកម្ម រួមជាមួយក្រុមហ៊ុនអភិវឌ្ឍន៍មិនចាប់អារម្មណ៍គម្រោងបែបនេះផង ។

បើតាមអគ្គនាយកក្រុមហ៊ុនអភិវឌ្ឍន៍លំនៅឋានតម្លៃទាប G-Home បានលើកឡើង មួយរយៈចុងក្រោយនេះ ប​ញ្ហាអចលនទ្រព្យមានប្រឈមយ៉ាងខ្លាំង ជាពិសេសក្នុងអំឡុងឆ្នាំ ២០១៨ ដល់ឆ្នាំ ២០២១ ដែលជំរុញឲ្យតម្លៃដីឡើងថ្លៃជាច្រើនដង ព្រោះថា តម្លៃដីកាន់តែឡើងខ្ពស់ នោះតម្លៃបញ្ចូលសរុបសម្រាប់ការសាងសង់ផ្ទះល្វែងក៏ឡើងខ្ពស់ដូចគ្នា ។

គួរបញ្ជាក់ថា ដង់ស៊ីតេប្រជាជននៃទីក្រុងហាណូយ និងទីក្រុងហូជីមិញ បានកើនឡើងយ៉ាងខ្លាំង ចាប់តាំងពីឆ្នាំ ២០១៥ មកដែលនាំឲ្យតម្រូវការលំនៅដ្ឋានមានការកើនឡើងយ៉ាងខ្លាំង ជាពិសេសផ្ទះល្វែងដែលមានតម្លៃសមរម្យនេះតែម្ដង ៕ ​

ប្រែសម្រួល៖ នាង រតនៈ

ប្រភព៖​ VN Express