សេដ្ឋកិច្ច

ពលរដ្ឋ មិនគួរប្រថុយប្រថាន ប្រើប្រាស់កម្ចីខុសច្បាប់ ឬកម្ចីអនឡាញក្រៅផ្លូវការនោះទេ

បានផុស

១ year មុន

នៅ

ថ្ងៃសុក្រ ១៥ ធ្នូ ២០២៣

ដោយ

ការផ្តល់កម្ចីខុសច្បាប់ ឬកម្ចីអនឡាញ (គ្មានអាជ្ញាបណ្ណពីធនាគារជាតិនៃកម្ពុជា) បាន និងកំពុងរីកសាយភាយ ហើយក៏កំពុងស្ថិតក្រោមការត្រួតពិនិត្យយ៉ាងយកចិត្តទុកដាក់ពីសំណាក់អាជ្ញាធរពាក់ព័ន្ធក្នុងការទប់ស្កាត់។ ក្រុមហ៊ុនទាំងនោះជារឿយៗ តែងធ្វើឱ្យពលរដ្ឋមួយចំនួនធំបានធ្លាក់ខ្លួនជាប់បំណុលវ័ណ្ឌករដោយសារតែកម្ចីមានអត្រាការប្រាក់ខ្ពស់ និងគ្មានគោលការណ៍ការពារអតិថិជនច្បាស់លាស់នោះឡើយ ហើយក្រុមហ៊ុនមួយចំនួនបានផ្សព្វផ្សាយជាសាធារណៈយ៉ាងសកម្មតាមរយៈបណ្តាញសង្គម ការចែកនាមប័ណ្ណ និងផ្ញើសារតាមទូរស័ព្ទជាដើម។ មិនត្រឹមតែប៉ុណ្ណោះ មានក្រុមហ៊ុនមួយចំនួនបានគំរាមកំហែងទារប្រាក់ពីកូនបំណុលរបស់ខ្លួនតាមរូបភាពផ្សេងៗ ដែលខុសច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជុំវិញបញ្ហានេះ នាយកដ្ឋានប្រឆាំងបទល្មើសបច្ចេកវិទ្យា ធ្លាប់បានធ្វើការផ្សព្វផ្សាយជារឿយៗថា ក្រុមហ៊ុនផ្តល់កម្ចីខុសច្បាប់ ឬកម្ចីអនឡាញដែលគ្មានអាជ្ញាបណ្ណពីធនាគារជាតិនៃកម្ពុជា ពួកគេធ្វើការផ្សព្វផ្សាយផ្តល់ប្រាក់កម្ចីតាមបណ្តាញសង្គម ដោយធ្វើការអូសទាញការចាប់អារម្មណ៍ពីជនរងគ្រោះតាមរយៈផ្តល់ជូនកម្ចីជាមួយលក្ខខណ្ឌងាយៗ ជនរងគ្រោះតម្រូវឱ្យផ្តល់នូវរូបថតអត្តសញ្ញាណប័ណ្ណ លេខទូរសព្ទ រូបភាព និងថតវីដេអូអាក្រាតកាយរបស់ជនរងគ្រោះជាថ្នូរនឹងការបញ្ចាំជាមួយសេវាកម្ចីអនឡាញ។ បន្ទាប់មក ក្រុមហ៊ុនទាំងនេះ បានគំរាមកំហែងជនរងគ្រោះករណីពុំបានសងប្រាក់កម្ចីដែលជាទូទៅមានការប្រាក់ដ៏ច្រើនលើសលប់ឱ្យពួកគេនោះទេ ពួកគេនឹងបង្ហោះរូបភាព ឬវីដេអូអាក្រាតកាយរបស់ជនរងគ្រោះនៅលើបណ្តាញសង្គម។

លោក សុខ វឿន ប្រធាននាយកប្រតិបត្តិ អិលអូអិលស៊ី (LOLC) និងជាប្រធានក្រុមប្រឹក្សាភិបាលនៃសមាគមមីក្រូហិរញ្ញវត្ថុកម្ពុជា បានលើកឡើងថា ពលរដ្ឋគួរជៀសវាងកម្ចីក្រៅផ្លូវការ ឬកម្ចីតាមអនឡាញខុសច្បាប់ ដែលអាចប្រឈមនឹងបញ្ហាជាច្រើន ដូចជាការគំរាមកំហែង គៀបសង្កត់ គ្រោះថ្នាក់ ឬរូបភាពផ្សេងៗ ដើម្បីបង្ខំឱ្យសងប្រាក់ជាមួយអត្រាការប្រាក់ខ្ពស់ហួសហេតុ ហើយការផ្តល់កម្ចីនោះទៀតសោត ធ្វើឡើងដោយមិនបានសិក្សាឱ្យបានច្បាស់លាស់ពីផលប៉ះពាល់របស់អតិថិជនឡើយ។ លោកបានបន្តទៀតថា «ប្រសិនបើពលរដ្ឋមានតម្រូវការប្រាក់កម្ចី សូមងាកទៅប្រើប្រាស់កម្ចីពីគ្រឹះស្ថានផ្លូវការដែលមានអាជ្ញាបណ្ណត្រឹមត្រូវ និងយកប្រាក់កម្ចីនោះទៅប្រើប្រាស់ឱ្យចំគោលដៅ ព្រោះការប្រើប្រាស់ប្រាក់កម្ចីចំគោលដៅ វានឹងជួយឱ្យជីវភាពកាន់តែរីកចម្រើន»។

លោក សុខ វឿន ប្រធាននាយកប្រតិបត្តិ អិលអូអិលស៊ី (LOLC)

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា ក៏បានយល់ស្របដូចនេះដែរថា « អ្នកខ្ចីគួរជៀសវាង ទទួលយកកម្ចីបែបនេះ »។ លោកបានជំរុញឱ្យពលរដ្ឋដែលមានតម្រូវការខ្ចីប្រាក់ គួរប្រើប្រាស់កម្ចីពីគ្រឹះស្ថានហិរញ្ញវត្ថុដែលស្របច្បាប់វិញ ជៀសវាងការចងការប្រាក់ក្រៅផ្លូវការ ឬកម្ចីតាមអនឡាញ ដើម្បីកុំឱ្យមានបញ្ហា ឬការគំរាមកំហែងផ្សេងៗ។

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា

កន្លងមកធនាគារជាតិនៃកម្ពុជា បានថ្កោលទោសចំពោះការផ្សព្វផ្សាយព័ត៌មាន ការផ្តល់ឥណទានតាមអនឡាញពុំមានអាជ្ញាបណ្ណខុសច្បាប់គ្រប់រូបភាព និងសហការជាមួយអាជ្ញាធរមានសមត្ថកិច្ចពាក់ព័ន្ធ ដើម្បីចាត់វិធានការតាមផ្លូវច្បាប់ចំពោះក្រុមហ៊ុន ឬបុគ្គលដែលធ្វើសកម្មភាពល្មើសនានាតាមនីតិវិធីច្បាប់៕