លោក ង៉ែត ជូ ណែនាំមនុស្សឱ្យប្តូរការគិតថា លុយ អាចធ្វើឱ្យជីវិតមានន័យ តែលុយគ្រាន់តែសម្រេចគោលដៅប៉ុណ្ណោះ

លោក ង៉ែត​ ជូ​ អ្នកជំនាញគ្រប់គ្រងហិរញ្ញវត្ថុ បានលើកឡើងលើហ្វេសប៊ុករបស់លោកនៅព្រឹកថ្ងៃទី០២ ខែកុម្ភៈ ឆ្នាំ២០២៤ នេះថា ប្រសិនជាមនុស្សភាគច្រើនយល់ថា មានលុយកាន់តែច្រើន ជីវិតមានន័យ កាន់តែសប្បាយចិត្ត គឺខុសហើយ ព្រោះលុយគ្រាន់តែជាមធ្យោបាយ ដើម្បីសម្រេចគោលដៅ និងបម្រើឱ្យការរស់នៅសមរម្យប៉ុណ្ណោះ។

លោកបានបញ្ជាក់ថា លុយមិនមែនមិនសំខាន់នោះទេ ប៉ុន្តែ ក៏មិនគួរយកលុយដាក់ជាគោលដៅជីវិតនោះដែរ។ ត្រឹមជីវិតរស់នៅសមរម្យ ក្នុងភាពថ្លៃថ្នូរ មនុស្សមិនគួរធ្វើគ្រប់មធ្យោបាយដូចជាកុហក បោកប្រាស់ ដើម្បីលុយឡើយ។ ជាមួយគ្នានេះ លោក ង៉ែត ជូ បានណែនាំឱ្យអ្នកដែលរស់នៅក្នុងជីវិតសមរ្យ ក្នុងភាពថ្លៃថ្លូរ ការរកលុយត្រូវចៀសវាងចំណុច២​។ ចំណុចទី១ គួរចៀសវាង គឺប្រព្រឹត្តអំពើទុច្ចរិត ឬបោកប្រាស់មនុស្ស ដែលធ្វើឱ្យសង្គមស្អប់ខ្ពើម មិនឱ្យតម្លៃ ហើយបុគ្គលខ្លួនឯងផ្ទាល់ ក៏គ្មានក្តីសុខត្រូវគេចមុខពីសង្គម ឬសង្គមនិន្ទាជាដើម។ ចំណុចទី២ ការប្រព្រឹត្តអំពើមិនល្អទាំងអស់នេះ នឹងធ្វើ​ឱ្យមនុស្សគិតច្រើន ដេកមិនលក់ ហើយបណ្តាលឱ្យក្លាយជាមនុស្សមានវិបត្តិផ្លូវចិត្ត និងផ្លូវកាយនាំឱ្យអាយុខ្លី។

ក្រៅពីការណែនាំឱ្យមនុស្សផ្លាស់ប្តូរការគិតថា លុយ ជាសេចក្តីសុខក្នុងជីវិតនោះ អ្នកជំនាញផ្នែកគ្រប់គ្រងហិរញ្ញវត្ថុរូបនេះ ក៏បានណែនាំឱ្យមនុស្សឧស្សាហ៍ទាញខ្លួនឯង និងកំណត់តម្លៃឱ្យខ្ពស់ជាងលុយ ព្រមទាំងព្យាយាមរស់នៅក្រៅឥទ្ធិពលលុយ ទើបជីវិតមិនសូវស្មុគស្មាញ និងមិនវង្វេងវង្វាន់ជាមួយលុយ។

តាមការកត់សម្គាល់ នាសម័យបច្ចុប្បន្ននេះ ជាសម័យកាលមួយដែលជឿនលឿនខ្លាំង ដូច្នេះ មុននឹងសម្រេចចិត្តថា ធ្វើអ្វីមួយ មនុស្សគ្រប់រូបត្រូវមានការត្រិះរិះឱ្យបានគ្រប់ជ្រុងជ្រោយទាំងការរកលុយ និងចំណាយថា តើការរកលុយរបស់ខ្លួនត្រឹមត្រូវទេ? ហើយការចាយវាយរបស់ខ្លួនសមនឹងសមត្ថភាពដែលរកបាននោះទេ? ផ្នែកហិរញ្ញវត្ថុ តម្រូវឱ្យមានការគិតគូរច្បាស់លាស់ ទើបមនុស្សមិនផុងខ្លួនជាមួយនឹងលុយ ថែមទាំងធ្វើឱ្យជីវិតរស់នៅមានសេចក្តីសុខទាំងផ្លូវចិត្ត និងកាយផងដែរ៕