ព័ត៌មានជាតិ

លោក ស៊ូ សុជាតិ លើកឡើង ២ ចំណុចឲ្យប្រុងប្រយ័ត្ន មុនវិនិយោគវិស័យមូលបត្រ

បានផុស

១១ ខែ មុន

នៅ

ថ្ងៃពុធ ២៨ កុម្ភៈ ២០២៤

ដោយ

លោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា បានលើកឡើងគន្លឹះចំនួន ២ ដើម្បីក្រើនរំលឹកដល់ប្រជាពលរដ្ឋឲ្យពិចារណា មុននឹងសម្រេចចិត្តវិនិយោគក្នុងវិស័យមូលបត្រ ដើម្បីជៀសវាងការចាញ់បោកឧបាយកលរបស់ជនឆ្លៀតឱកាសមួយចំនួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសិក្ខាសាលាផ្សព្វផ្សាយស្ដីពី “ការគាំពារវិនិយោគិន និងការពង្រឹងការអនុវត្តច្បាប់ក្នុងវិស័យមូលបត្រ” នាថ្ងៃទី២៦ ខែកុម្ភៈ ឆ្នាំ២០២៤ លោក ស៊ូ សុជាតិ បានលើកឡើងថា បច្ចុប្បន្ននេះ វិស័យមូលបត្រនៅកម្ពុជាកំពុងតែបោះជំហាន និងបង្ហាញពីភាពរីកចម្រើនគួរឲ្យកត់សម្គាល់ជាមួយនឹងការចូលរួមកាន់តែច្រើនពីតួអង្គពាក់ព័ន្ធ និងកំណើននៃផលិតផលហិរញ្ញវត្ថុដែលជាមូលបត្រ និងកំពុងជួញដូរយ៉ាងសកម្មនៅក្នុងទីផ្សារមូលបត្រកម្ពុជា។

ទន្ទឹមនឹងភាពរីកចម្រើននៃវិស័យមូលបត្រនៅកម្ពុជានេះ លោកក៏បានលើកឡើងពាក់ព័ន្ធមានជនខិលខូចមួយចំនួនបានឆ្លៀតឱកាសដោយប្រើប្រាស់ឧបាយកលផ្សេងៗតាមគ្រប់រូបភាព រួមមានទាំងតាមបច្ចេកវិទ្យា ដើម្បីឆបោកប្រជាពលរដ្ឋឲ្យដាក់ប្រាក់វិនិយោគជាដើម។

ដើម្បីជៀសវាងកុំឲ្យប្រជាពលរដ្ឋអាចចាញ់បោកជនខិលខូច លោក ស៊ូ សុជាតិ បានលើកឡើង ២ ចំណុច គួរពិចារណា គឺទី១.តើក្រុមហ៊ុនឬបុគ្គលដែលផ្សព្វផ្សាយដើម្បីកៀរគរប្រមូលទុនវិនិយោគជាក្រុមហ៊ុន ឬបុគ្គលដែលទទួលបានអាជ្ញាប័ណ្ណ ឬការអនុញ្ញាតពីអាជ្ញាធរ/ និយ័តករមានសមត្ថកិច្ចដែរឬទេ? និងទី២. តើគម្រោងវិនិយោគ ឬផលិតផលវិនិយោគ (ភាគហ៊ុន បណ្ណបំណុល..) ទទួលបានការអនុញ្ញាតពីអាជ្ញាធរនិយ័តករមានសមត្ថកិច្ចដែរឬទេ?

បើតាមលោក ស៊ូ សុជាតិ ពាក់ព័ន្ធសកម្មភាពនៃការផ្សព្វផ្សាយតាមហ្វេសបុក តេឡេក្រាម សិក្ខាសាលា វគ្គបណ្ដុះបណ្ដាល និងដើរកៀរគរ ដើម្បីទាក់ទាញសាធារណជនឲ្យជួញដូរលើឧបករណ៍និស្សន្ន ដូចជា ជួញដូរលើហាងឆេងមាស ហាងឆេងរូបិយប័ណ្ណ និងប្រមូលមូលនិធិពីសាធារណជន ហើយសន្យាផ្ដល់នូវប្រាក់ចំណេញ ឬការប្រាក់ខ្ពស់ ប៉ុន្តែជាក់ស្ដែងមិនបានយកប្រាក់នោះទៅវិនិយោគលើគម្រោងវិនិយោគណាមួយច្បាស់លាស់ ដែលនេះជាករណីឆបោកដែលមានចែងក្នុងក្រមព្រហ្មទណ្ឌនៃកម្ពុជា។

ការរីកចម្រើននៃបច្ចេកវិទ្យា ក៏ដូចជាការផ្ទេរប្រាក់តាមប្រព័ន្ធធនាគារមានភាពងាយស្រួល ឆាប់រហ័ស ហេតុនេះមានឧក្រិដ្ឋជន បានបង្កើតក្រុមតេឡេក្រាមក្លែងបន្លំគណនីថ្នាក់ដឹកនាំ ឬក្រុមហ៊ុនដែលមានអាជ្ញាប័ណ្ណក្នុងវិស័យមូលបត្រ ដើម្បីឲ្យពលរដ្ឋជឿ ធ្លាក់ខ្លួនចាញ់បោក និងជ្រុលខ្លួនក្លាយជាជនរងគ្រោះដាក់ប្រាក់វិនិយោគផងដែរ។

លោក ស៊ូ សុជាតិ បានក្រើនរំលឹកឲ្យពលរដ្ឋ មុននឹងសម្រេចចិត្តវិនិយោគនៅក្នុងវិស័យមូលបត្រ គប្បីសិក្សាឲ្យបានស៊ីជម្រៅពាក់ព័ន្ធក្រោមរូបភាពវិនិយោគក្នុងវិស័យមូលបត្រដោយស្របច្បាប់ រូបភាពវិនិយោគក្នុងវិស័យមូលបត្រខុសច្បាប់ និងការឆបោកក្រោមរូបភាពនៃការវិនិយោគ បទល្មើសតាមបច្ចេកវិទ្យា និងបច្ចេកទេសស៊ើបអង្កេតហិរញ្ញវត្ថុ ដើម្បីទប់ស្កាត់សកម្មភាពខុសច្បាប់នានា ដែលនាំឲ្យបះពាល់ដល់ទ្រព្យសម្បត្តិប្រជាពលរដ្ឋ និងសេដ្ឋកិច្ចជាតិផងដែរ។

និយ័តករមូលបត្រកម្ពុជា គឺជាអាជ្ញាធរដែលមានតួនាទីគ្រប់គ្រង និងត្រួតពិនិត្យលើរាល់ប្រតិបត្តិការពាក់ព័ន្ធនឹងវិស័យមូលបត្រនៅកម្ពុជា ដើម្បីឲ្យវិស័យនេះចូលរួមចំណែកដល់ការអភិវឌ្ឍសេដ្ឋកិច្ចជាតិ និងសង្គម តាមរយៈការកៀរគរមូលធនពីសាធារណជន ឬអ្នកវិនិយោគមូលបត្រ ដើម្បីឆ្លើយតបទៅនឹងតម្រូវការហិរញ្ញវត្ថុសម្រាប់ការវិនិយោគនៅកម្ពុជា៕

Related Topics:វិស័យមូលបត្រនៅកម្ពុជា លោក ស៊ូ សុជាតិ