វៀតណាម ប្រកាសបើកការិយាល័យផ្សព្វផ្សាយទេសចរណ៍អន្តរជាតិទី១ នៅ ឡាវ

ការិយាល័យផ្សព្វផ្សាយទេសចរណ៍អន្តរជាតិដំបូងបង្អស់របស់វៀតណាម នឹងបើកនៅប្រទេសឡាវ ដែលនេះជាផ្នែកមួយនៃផែនការ ដើម្បីលើកកម្ពស់វិស័យទេសចរណ៍របស់ខ្លួន។ នេះបើតាមការបញ្ជាក់ពីប្រធានអាជ្ញាធរជាតិទេសចរណ៍វៀតណាម លោក Nguyen Trung Khanh។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសិក្ខាសាលាក្រោមប្រធានបទ “ដំណោះស្រាយឆ្ពោះទៅរកការជំរុញវិស័យទេសចរណ៍” ដែលរៀបចំដោយកាសែត Nguii Lao Dong ក្នុងទីក្រុងហូជីមិញកាលពីថ្ងៃអង្គារទី១២ខែមីនា លោក Khanh និយាយថា វៀតណាម បានកំណត់គោលដៅពោរពេញដោយមហិច្ឆិតា ដើម្បីស្វាគមន៍ភ្ញៀវទេសចរអន្តរជាតិពី ១៧ទៅ១៨លាននាក់ និងភ្ញៀវទេសចរក្នុងស្រុកចំនួន១១០លាននាក់នៅឆ្នាំនេះ ហើយដើម្បីសម្រេចបានគោលដៅ អាជ្ញាធរបានបញ្ចប់ផែនការទេសចរណ៍ឆ្នាំ ២០២៥-៣០ ជាមួយនឹងចក្ខុវិស័យដល់ឆ្នាំ២០៤៥។

លោកកត់សម្គាល់ថា ដំណោះស្រាយដែលអាចធ្វើទៅបាន គឺត្រូវបង្កើតការិយាល័យផ្សព្វផ្សាយទេសចរណ៍នៅបរទេស ហើយការិយាល័យ​នៅ​ឡាវ ​នឹង​ជួយ​ទាក់ទាញ​ភ្ញៀវ​ទេសចរមក​ពី​ប្រទេស​​កម្ពុជានិងថៃ។

ស្របពេលជាមួយគ្នានោះ លោក Nguyen Quoc Ky ប្រធានក្រុមហ៊ុនទេសចរណ៍ Vietravel Holdings បានលើកឡើងថា តាមរយៈការបង្កើតការិយាល័យផ្សព្វផ្សាយទេសចរណ៍របស់វៀតណាមនៅក្រៅប្រទេស, ក្រុមហ៊ុនអាចទាញយកអត្ថប្រយោជន៍ពីការិយាល័យតំណាងសហគ្រាស ដែលមានស្រាប់នៅក្នុងប្រទេសផ្សេងៗ។

សូមបញ្ជាក់ វៀតណាមបានស្វាគមន៍ភ្ញៀវទេសចរអន្តរជាតិជាង៣លាននាក់ ក្នុងរយៈពេលពីរខែដំបូងនៃឆ្នាំនេះ ពោលគឺកើនឡើង៦៨.៧% បើធៀបនឹងឆ្នាំមុន និងស្មើ៩៨.៥%នៃតួលេខក្នុងរយៈពេលដូចគ្នានៅឆ្នាំ២០១៩ ពេលជំងឺរាតត្បាតកូវីដ១៩ វាយប្រហារ៕

អត្ថបទ៖ សុខ សុវណ្ណ

ចុចអាន៖ សេវាជួលរថយន្តនៅ វៀតណាម ត្រូវប៉ាន់ខ្លាំង ក្រោយចប់ចូលឆ្នាំថ្មី