ព័ត៌មានជាតិ

អាប់ដេតព័ត៌មាថ្មីបន្ថែម ពីព្រលានយន្តហោះភ្នំពេញថ្មី នៅខេត្តកណ្តាល

បានផុស

៤ years មុន

នៅ

ថ្ងៃចន្ទ ២២ កុម្ភៈ ២០២១

ដោយ

so pon

លោក ម៉ៅ ភិរុណ ប្រធានក្រុមប្រឹក្សាខេត្តកណ្ដាលបានថ្លែងប្រាប់អ្នកសារព័ត៌មាននៅព្រឹកនេះថា ការដ្ឋានសាងសង់ព្រលានយន្តហោះភ្នំពេញថ្មីនៅស្រុកកណ្តាលស្ទឹងខេត្តកណ្តាល កំពុងដំណើរការគ្មានការរាំងស្ទះនោះទេ ដែលគ្រោងបញ្ចប់ដំណាក់កាលទីមួយនៅឆ្នាំ២០២៣។

ព្រលានយន្តហោះភ្នំពេញថ្មី ជាការវិនិយោគរបស់ក្រុមហ៊ុន OCIC ត្រូវបានសាងសង់នៅលើផ្ទៃដីទំហំ ២៦០០ហិកតា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកម៉ៅ ភិរុណ បញ្ជាក់ថា មកដល់ពេលនេះការដ្ឋានសាងសង់សម្រេចបាន ១៨ ភាគរយ តែក្រុមហ៊ុនមិនទាន់បានអភិវឌ្ឍពេញផ្ទៃដីទាំង២៦០០ ហិកតា។ បើតាមគម្រោងនៅឆ្នាំ២០២៣ខាងមុខ ក្រុមហ៊ុននឹងបញ្ចប់ផ្លូវរត់១ ឬ២ ដើម្បីដំណើរការហោះហើរបឋម។

លោកបន្តថា ចំពោះបញ្ហាទំនាស់ដីធ្លីនៅក្នុងគម្រោងសាងសង់ព្រលាន អាជ្ញាធរបានដោះស្រាយស្ទើររួចអស់ហើយ នៅតែបញ្ហាតិចតួចដែលត្រូវសម្របសម្រួលដោះស្រាយបន្តទៀត។

សូមបញ្ជាក់ថា អាកាសយានដ្ឋានអន្តរជាតិភ្នំពេញថ្មី វិនិយោគក្នុងទឹកប្រាក់ប្រមាណ១,៥០០លានដុល្លារ។ អាកាសយានដ្ឋាននេះ សាងសង់ឡើងលើផ្ទៃដីទំហំប្រមាណ ២,៦០០ហិកតា គ្រោងបញ្ចប់ការសាងសង់នៅក្នុងឆ្នាំ២០២៣ខាងមុខ។ សមត្ថភាពព្រលាននេះ អាចទទួលអ្នកដំណើរបានប្រមាណ១៣លាននាក់នៅក្នុងឆ្នាំ២០២៣, ៣០លាននាក់នៅក្នុងឆ្នាំ២០៣០ និង៥០លាននាក់នៅក្នុងឆ្នាំ២០៥០។

អ្នកឧកញ៉ា ពុង ឃាវ សែ ប្រធានក្រុមប្រឹក្សាភិបាលនៃកាណាឌីយ៉ាគ្រុប និង OCIC ធ្លាប់ប្រាប់បណ្តាញព័ត៌មានថា គម្រោងអាកាសយានដ្ឋានអន្តរជាតិភ្នំពេញថ្មី ចេញប្លង់សាងសង់ដោយក្រុមហ៊ុន Foster & Partners ដែលជាក្រុមហ៊ុនល្បីល្បាញមួយនៅលើពិភពលោក។ អាកាសយានដ្ឋានថ្មីនេះ ត្រូវបានរចនាឡើងលំដាប់ថ្នាក់ 4F ជាអាកាសយានដ្ឋានធំបំផុតលំដាប់ទី៩ នៅក្នុងពិភពលោក ដែលស្ថិតនៅលំដាប់ពីក្រោយអាកាសយានដ្ឋាន Chicago O’Hare និងលំដាប់មុខអាកាសយានដ្ឋានអន្តរជាតិទីក្រុងប៉េកាំងរបស់ប្រទេសចិន។

នៅពេលសាងសង់ចប់ អាកាសយានដ្ឋានថ្មីនេះនឹងសមត្ថភាពទទួលយន្តហោះដឹកជញ្ជូនធុនធ្ងន់ផ្លូវឆ្ងាយ ព្រមទាំងមានសមត្ថភាពទទួលអ្នកដំណើរបានចំនួន២៧លាននាក់នៅឆ្នាំ២០៣០ ហើយនៅឆ្នាំ២០៥០ វានឹងអាចផ្ទុកអ្នកដំណើររហូតដល់ ៣០លាននាក់ស្របតាមផែនការមេ។

ចំពោះការសាងសង់វិញ អ្នកឧកញ៉ា ពុង ឃាវសែ បញ្ជាក់ថា ក្រុមហ៊ុន បានជ្រើសរើសក្រុមហ៊ុនបរទេសមួយចំនួន និងប្រើប្រាស់ធនធានបច្ចេកទេស និងបទពិសោធន៍របស់ក្រុមហ៊ុន OCIC ផ្ទាល់ ហើយគោលបំណងសាងសង់អាកាសយានដ្ឋានថ្មីនេះ គឺដើម្បីលើកកម្ពស់ដល់វិស័យសំណង់ ដោយនាំយកនូវបច្ចេកទេសថ្មីៗទំនើបៗមកអនុវត្ត ដែលជាកត្តានាំឲ្យវិស័យសំណង់នៅកម្ពុជាកាន់តែមានភាពរីកចម្រើន ដើរទាន់ពិភពលោកផងដែរ។ នៅពេលសង់រួច ព្រលានយន្តហោះភ្នំពេញថ្មីនេះ នឹងលើកមុខមាត់ដល់ប្រទេសកម្ពុជា ទាំងក្នុងវិស័យអាកាសចរណ៍ ទាំងក្នុងវិស័យពាក់ព័ន្ធនានា និងរួមចំណែកយ៉ាងសំខាន់ក្នុងការលើកស្ទួយសេដ្ឋកិច្ចជាតិ៕

អត្ថបទ៖ កោះកែវ

Related Topics:អាកាសយានដ្ឋាន