សេដ្ឋកិច្ច

ក្រុមហ៊ុនអាកាសចរណ៍ AirAsia នឹងចាប់ផ្ដើមជើងហោះហើរក្នុងស្រុកសប្ដាហ៍ក្រោយ

បានផុស

១១ ខែ មុន

នៅ

ថ្ងៃអង្គារ ២៣ មេសា ២០២៤

ដោយ

បើគ្មានអ្វីប្រែប្រួលនោះទេ ក្រុមហ៊ុនអាកាសចរណ៍ AirAsia នឹងចាប់ផ្ដើមជើងហោះហើរប្រចាំថ្ងៃរបស់ខ្លួននៅក្នុងស្រុក ចាប់ពីថ្ងៃទី ០២ ខែឧសភា ឆ្នាំ ២០២៤ ក្នុងតម្លៃទាបដែលជាការឆ្លើយតបទៅនឹងការកើនឡើងនៃភ្ញៀវទេចរក្នុងស្រុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ិន ចាន់សិរីវត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល ប្រាប់កម្ពុជាថ្មីនៅថ្ងៃទី ២៣ ខែមេសា ឆ្នាំ ២០២៤ នេះថា តាមគម្រោងក្រុមហ៊ុន AirAsia Cambodia នឹងចាប់ផ្ដើមហោះហើរក្នុងស្រុកនៅថ្ងៃទី ០២ ខែឧសភា ឆ្នាំ ២០២៤ ខាងមុខនេះ ដោយដំណើរការដំបូងមានយន្តហោះថ្មីចំនួន ២ គ្រឿង។

យន្តហោះថ្មីដំបូងរបស់ក្រុមហ៊ុន AirAsia Cambodia បានមកដល់អាកាសយានដ្ឋានអន្តរជាតិភ្នំពេញកាលពីថ្ងៃទី ២០ ខែមេសា ឆ្នាំ ២០២៤ ដោយត្រៀមជើងហោះហើរប្រចាំថ្ងៃចំនួន ៤ ជើង ក្នុង១ថ្ងៃ គឺពីភ្នំពេញទៅខេត្តសៀមរាប និងរវាងក្រុងព្រះសីហនុ និងខេត្តសៀមរាប។

លោក ស៊ិន ចាន់សិរីវត្ថា បានបន្ថែមថា ក្រុមហ៊ុន AirAsia ចង់ផ្លាស់ប្ដូរឥរិយាបថ និងបទពិសោធន៍ថ្មីៗ សម្រាប់ការធ្វើដំណើរក្នុងស្រុក ដោយឱ្យអ្នកធ្វើដំណើរមានកម្លាំងឡើងវិញ ដោយគាត់អាចប្រើប្រាស់សេវាហោះហើរក្នុងស្រុកបាន។

លោក ស៊ិន ចាន់សិរីវត្ថាបន្តថា៖ «ដោយសារតម្លៃធូរថ្លៃ អញ្ចឹងគាត់អាចប្រើសេវាក្នុងស្រុកបាន ស្របទៅតាមលក្ខខណ្ឌតាមតម្រូវការ អ្នកប្រញាប់ជិះកប៉ាល់ហោះទៅ អ្នកមិនប្រញាប់ជិះឡានទៅ»។

ក្រុមហ៊ុនអាកាសចរណ៍ AirAsia ប្រកាសថា នឹងបើកជើងហោះហើរ ៣ គោលនៅរួមមាន ភ្នំពេញ-សៀមរាប, សៀមរាប-ព្រះសីហនុ, ភ្នំពេញ-សីហនុ ដើម្បីផ្សព្វផ្សាយឱ្យអ្នកដំណើរក្នុងស្រុកអាចធ្វើដំណើរតាមជើងហោះហើរក្នុងតម្លៃ ៤៩ ដុល្លារ។

លោក ខៀ ធី ប្រធានសមាគមមគ្គុទ្ទេសក៍ទេសចរអង្គរយល់ឃើញថា កាលណាមានក្រុមហ៊ុនអាកាសចរណ៍ច្រើន មានការប្រកួតប្រជែងគ្នា តម្លៃសេវាអាកាសចរក៏ធូរថ្លៃ ហើយភ្ញៀវក៏ចូលចិត្តធ្វើដំណើរតាមយន្តហោះ ដែលជាការទាក់ទាញទេសចរក្នុងស្រុក៕

អត្ថបទ៖ ឡេង ដេត