សេដ្ឋកិច្ច

ទិន្នផលផ្លែទុរេនធ្លាក់ចុះ ដោយសារអាកាសធាតុរាំងស្ងួត ខ្វះខាតទឹក

បានផុស

៥ ខែ មុន

នៅ

ថ្ងៃព្រហស្បតិ៍ ២៥ មេសា ២០២៤

ដោយ

ម្ចាស់ចម្ការទុរេននៅស្រុកស្រែអំបិល ខេត្តកោះកុង អ្នកស្រី អ៊ុំ ស្រីស្រស់បានឱ្យដឹងនៅថ្ងៃទី ២៤ ខែមេសា ឆ្នាំ ២០២៤នេះថា ទិន្នផលផ្លែទុរេន បានធ្លាក់ចុះយ៉ាងគំហុក នារដូវប្រមូលផលឆ្នាំនេះ ដោយសារអាកាសធាតុក្ដៅ ខ្វះទឹក ខណៈតម្លៃលក់បានប្រហាក់ប្រហែលឆ្នាំមុនខ្ទង់ ២ ម៉ឺនរៀល ក្នុងមួយគីឡូក្រាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី អ៊ុំ ស្រីស្រស់បញ្ជាក់ថា៖ «ទិន្នផលឆ្នាំនេះ បានតិចជាងមុន ចម្ការណាក៏ដូចចម្ការណាដែរ គឺអត់ទឹក ហើយខ្លះងាប់អស់ដោយមិនបានផល តែខ្លះក៏បានប្រហែល៥០ ភាគរយ»។

អ្នកស្រីបន្តថា ស្ថានភាពទីផ្សារលក់ចេញមិនបានល្អនោះទេ លក់មិនដាច់ ដោយសារសេដ្ឋកិច្ច ពោលគឺគ្មានអ្នកទិញ។

អ្នកស្រីបន្តថា៖ «រាល់ឆ្នាំ អ្នកទិញបោះដុំគាត់យកទៅលក់បន្តគាត់លក់ដាច់ ដូចថា គាត់យក១ តោន គាត់លក់ ៣-៥ ថ្ងៃ អស់ តែឥឡូវអត់ទេ ១ អាទិត្យ ទៅ២ អាទិត្យ បាត់ឈឹង»។

អាជីវករលក់ទុរេនកំពតពូជឪខាក់ នៅផ្សារអូឡាំពិក អ្នកស្រី សេវ ឡេង ប្រាប់ថា តម្លៃទុរេនឪខាក់ ដែលអ្នកស្រីកំពុងលក់គឺ ២ ៧០០ រៀល ក្នុងមួយគីឡូក្រាម ខណៈអ្នកស្រីអះអាងថា ហាងរបស់អ្នកស្រី លក់ដាច់គួរសមរាល់ថ្ងៃ។

លោក អួនជាង មេង ប្រធានសហគមន៍ទុរេនកំពតប្រាប់ថា ទុរេនមានច្រើនប្រភេទមានល្អ និងធម្មតា ខ្លះមានតម្លៃជាង ១ ម៉ឺនរៀលក្នុងមួយគីឡូក្រាម និងខ្លះតម្លៃជាង ២ ម៉ឺនរៀល ក្នុងមួយគីឡូក្រាម។

លោក អួនជាង មេង បញ្ជាក់ថា ទិន្នផលទុរេនឆ្នាំនេះ ធ្លាក់ចុះពាក់កណ្ដាល បើធៀបនឹងឆ្នាំមុន ដោយសារការខ្វះទឹក និងភាពរាំងស្ងួតចាប់តាំងពីខែវិច្ឆិកាឆ្នាំមុន រហូតដល់បច្ចុប្បន្ន។

ក្រសួងធនធានទឹក និងឧតុនិយម បានឱ្យដឹងថា ចាប់ពីខែមីនាដល់ខែមេសា ឆ្នាំ២០២៤ អត្រានៃបាតុភូតអែលនីណូ (El Nino) ខ្ពស់ជាង ៧០% មានឥទ្ធិពលនៅលើតំបន់ជុំវិញមហាសមុទ្រប៉ាស៊ីហ្វិក ដែលធ្វើឱ្យសីតុណ្ហភាពនៅទូទាំងប្រទេសកើនឡើងខ្ពស់ជាងមធ្យមភាគច្រើនឆ្នាំ ហើយក៏ជាកត្តាធ្វើឱ្យអាកាសធាតុក្តៅហើយស្ងួតប្រឈមនឹងការខ្វះទឹក។

យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ កម្ពុជាមានផ្ទៃដីដាំដុះដំណាំទុរេនចំនួន ៥ ២៨៩ ហិកតា ក្នុងនោះផ្ទៃដីប្រមូលផលមានចំនួន ៣ ៤០៣ ហិកតាដែលទទួលបានបរិមាណផលប្រមាណជាង ៣ម៉ឺនតោន ក្នុងមួយឆ្នាំ៕

អត្ថបទ៖ ឡេង ដេត