ថៃនឹងរៀបចំផែនការថាមពលថ្មីឪ្យបាន​រួចរាល់នៅត្រីមាសទី៣

ទីក្រុងបាងកក៖ ការិយាល័យគោលនយោបាយ និងផែនការថាមពល​ (Eppo) បាននិយាយថា កំណែទម្រង់ថ្មីនៃផែនការអភិវឌ្ឍន៍ថាមពលជាតិ (PDP) ដែលកំណត់ទិសដៅសម្រាប់ការផលិត និងការគ្រប់គ្រងអគ្គិសនីរបស់ប្រទេសថៃរហូតដល់ឆ្នាំ ២០៣៧ ត្រូវបានគេរំពឹងថានឹងបញ្ចប់នៅត្រីមាសទីបីនៃឆ្នាំនេះ។

ផែនការសម្រាប់ប្រេង ឧស្ម័ន ថាមពលជំនួស និងប្រសិទ្ធភាពថាមពលក៏នឹងត្រូវបានបញ្ចប់ក្នុងរយៈពេលដូចគ្នានេះផងដែរ នេះបើយោងតាមក្រុមហ៊ុន Eppo ។

សារព័ត៌មានបាងកកប៉ុស្តិ៍បានដកស្រង់សំដីរបស់លោក Weerapat Kiatfuengfoo អគ្គនាយក​ Eppo ​ថា PDP នឹងដើរតួនាទីយ៉ាងសំខាន់ក្នុងវិស័យថាមពល ដោយរួមបញ្ចូលប្រេងឥន្ធនៈ ការប្រើប្រាស់ថាមពលប្រកបដោយប្រសិទ្ធភាព និងថាមពលកកើតឡើងវិញ នៅពេលដែលប្រទេសនេះផ្លាស់ប្តូរទៅរកអគ្គិសនី និងការបញ្ជ្រាបសកម្មភាពសេដ្ឋកិច្ចដែលដំណើរការដោយអគ្គិសនី។

លោក​បាន​បន្ត​ថា​ក្រុម​ដែល​ធ្វើ​ការ​លើ PDP គ្រោង​នឹង​មាន​កិច្ច​ពិភាក្សា​ចុង​ក្រោយ​នៅ​ថ្ងៃ​ទី ៧ ខែ​ឧសភាខាងមុខនេះ ដើម្បី​ត្រៀម​ធ្វើ​បទបង្ហាញ​ជា​សាធារណៈ។

PDP ត្រូវបានព្រាងជាលើកដំបូងនៅក្នុងឆ្នាំ ២០១៨ ហើយបានឆ្លងកាត់ការកែប្រែជាច្រើនលើកច្រើនសារ ដែលបណ្តាលមកពីការផ្លាស់ប្តូរស្ថានភាពសេដ្ឋកិច្ច និងសង្គម រួមទាំងផលប៉ះពាល់នៃជំងឺរាតត្បាតកូវីដ១៩។

លោក Weerapat បាននិយាយថា នៅក្នុងកំណែចុងក្រោយបំផុត ថាមពលកកើតឡើងវិញនឹងបង្កើតឱ្យបា​នច្រើនជាង ៥០% នៃប្រេងឥន្ធនៈដែលប្រើប្រាស់សម្រាប់ផលិតថាមពលនៅក្នុងប្រទេស។

លោកបានបន្តទៀតនិយាយថា នៅក្នុង PDP ថ្មី ការបំភាយកាបូនឌីអុកស៊ីតពីវិស័យផលិតថាមពលមានកម្រិត ៤១,៥ ​ លានតោនក្នុងឆ្នាំ ២០៥០ ធ្លាក់ចុះពីគោលដៅ ១០០ លានតោនកាលពីឆ្នាំ ២០២៥ និង ១០១ លានតោនកាលពីឆ្នាំ ២០២០៕