កម្ពុជាកំពុងសាងសង់មជ្ឈមណ្ឌលពាណិជ្ជកម្មឯកជនកម្ពុជា និងភូមិខ្មែរប្រទេសជប៉ុន

មជ្ឈមណ្ឌលពាណិជ្ជកម្មឯកជនកម្ពុជា និងភូមិខ្មែរនឹងលេចរូបរាងឡើងនាពេលដ៏ខ្លីខាងមុខនេះ​នៅទីក្រុងអាតស៊ូគិ ខេត្តកាណាហ្គាវ៉ា ប្រទេសជប៉ុន នឹងដើរតួរនាទីដ៏សំខាន់ក្នុងការជំរុញការដោះដូរទំនិង ការផ្តល់ព័ត៌មានវិនិយោគជាពិសេសសម្រាប់ដាក់តាំងបង្ហាញផលិតផលខ្មែរ។​

លោកលីម ឡោកពិសិដ្ឋ រដ្ឋលេខាធិការក្រសួងពាណិជ្ជកម្ម អមដំណើរដោយ លោក ទុយ រី ឯកអគ្គរាជទូតកម្ពុជាប្រចាំប្រទេសជប៉ុនកាលពីថ្ងៃទី១ ខែឧសភា ឆ្នាំ២០២៤ ​បានចុះពិនិត្យមើលសកម្មភាពសាងសង់មជ្ឈមណ្ឌលពាណិជ្ជកម្មឯកជនកម្ពុជា និងភូមិខ្មែរ នៅទីក្រុងអាតស៊ូគិ ខេត្តកាណាហ្គាវ៉ា ប្រទេសជប៉ុន និងជួបប្រជុំពិភាក្សាការងារជាមួយ លោក Takeshi Okami តំណាងក្រុមហ៊ុន Kojima Holdings Co., Ltd ដែលជាអ្នកគ្រប់គ្រង និងដំណើរការមជ្ឈមណ្ឌលពាណិជ្ជកម្មឯកជនកម្ពុជា ផងដែរ។ នេះបើយោងតាមក្រសួងពាណិជ្ជកម្ម។

លោក​ ឡោកពិសិដ្ឋ បានលើកឡើងថា​ មជ្ឈមណ្ឌលពាណិជ្ជកម្មឯកជនកម្ពុជា នៅទីក្រុងអាតស៊ូគិ ត្រូវ​បានក្រុមការងាររៀបចំបានយ៉ាងល្អ និងប្រកបដោយភាពទាក់ទាញ ព្រោះថានេះជាកន្លែងដ៏មានសារៈសំខាន់មួយសម្រាប់ផ្តល់នូវព័ត៌មានពាណិជ្ជកម្ម និងវិនិយោគនៅកម្ពុជា ជាពិសេសក៏ជា​កន្លែងសម្រាប់តាំងបង្ហាញ និងផ្សព្វផ្សាយផលិតផលខ្មែរ ម្ហូបអាហារខ្មែរ ព្រមទាំងវប្បធម៌ប្រពៃណីខ្មែរ ផងដែរ​។

លោកគូសបញ្ជាក់ថា៖« សម្រាប់​មជ្ឈមណ្ឌលពាណិជ្ជកម្មឯកជនកម្ពុជា នឹងរួមចំណែកក្នុងការជំរុញសកម្មភាពពាណិជ្ជកម្មនិងវិនិយោគរវាងកម្ពុជា-ជប៉ុន និងលើកទឹកចិត្តដល់មជ្ឈមណ្ឌលឱ្យបន្តរៀបចំការបណ្តុះបណ្តាលធនធានមនុស្ស សិក្ខាសាលាផ្គូផ្គងពាណិជ្ជកម្ម ព្រមទាំងជួយសម្រួលធុរកិច្ចពាណិជ្ជកម្មជូនវិនិយោគិនជប៉ុន ដែលមានបំណងចង់ធ្វើពាណិជ្ជកម្មនៅកម្ពុជា»។

នាយក​រដ្ឋមន្ត្រី​កម្ពុជា​លោក ហ៊ុន ម៉ាណែត ​ក្នុង​ដំណើរ​ទស្សន​កិច្ច​ទៅ​ប្រទេស​ជប៉ុន កាល​ពី​ខែ​ធ្នូ ឆ្នាំ​២០២៣ ដើម្បី​ចូល​រួម​កិច្ច​ប្រជុំ​កំពូល​រំលឹក​ខួប​អនុ​ស្សាវរីយ៍​អាស៊ាន​-​ជប៉ុន ឆ្នាំ​ទី​៥០ នៃ​មិត្តភាព និង​កិច្ច​សហ​ប្រតិបត្តិ​ការ​អាស៊ាន-​ជប៉ុន ​បាន​អញ្ជើញ​ចូល​រួម​ក្នុង​សិក្ខា​សាលា​វិនិ​យោគ​កម្ពុជា​ឆ្នាំ​២០២៣ ដោយ​ក្នុង​ឱកាស​នោះ​លោក​បាន​ស្នើ​ឱ្យ​វិនិយោ​គិន​ជប៉ុន​ចូល​មក​បណ្តាក់​ទុន​នៅ​កម្ពុជា​ឱ្យ​ច្រើន ជា​មួយ​គ្នា​នោះ​លោក​ក៏​ជំរុញ​ឱ្យ​ផ្នែក​ឯកជន​នៃ​ប្រទេស​ទាំង ២ ធ្វើ​ការ​សិក្សា​រួម​គ្នា​ដើម្បី​បង្កើត​តំបន់​សេដ្ឋកិច្ច​ពិសេស​កម្ពុជា-​ជប៉ុន (Cambodia-Japan Special Economic Zone) នៅ​កម្ពុជា​ផងដែរ​។

បើ​យោង​តាម​អគ្គ​នាយក​ដ្ឋាន​គយ និង​រដ្ឋាករ​កម្ពុជា​ចន្លោះ​ពី​ខែ​មករា ដល់​ខែ​កុម្ភៈ ឆ្នាំ​២០២៤ ការ​ផ្លាស់​ប្តូរ​ទំនិញ​រវាង​កម្ពុជា​-​ជប៉ុន មាន​ទឹក​ប្រាក់​សរុប ៣២៥,៦៥​លាន​ដុល្លារ កើន​ឡើង ៩,៣​ភាគ​រយ​បើ​ធៀប​រយៈ​ពេល​ដូច​គ្នា​ក្នុង​ឆ្នាំ​២០២៣ ដែល​មាន​ ២៩៨,០៦​លាន​ដុល្លារ។ ក្នុង​ចំនួន​នេះ គឺ​ទំនិញ​កម្ពុជា​នាំ​ទៅ​ជប៉ុន​ ២៣៧,២២​លាន​ដុល្លារ កើន​ ១៥,៣​ភាគ​រយ​ ចំណែក​ទំនិញ​ជប៉ុន​នាំ​មក​កម្ពុជា ៨៨,៤៣​លាន​ដុល្លារ ថយ​ចុះ ៤,៣​ភាគ​រយ​។ ​ទំហំ​ពាណិជ្ជ​កម្ម​កម្ពុជា​-​ជប៉ុន ស្មើ​នឹង​ ៤,០១​ភាគ​រយ​នៃ​ទំហំ​ពាណិជ្ជ​កម្ម​អន្តរ​ជាតិ​របស់​កម្ពុជា ក្នុង​ខែ​មករា-កុម្ភៈ ឆ្នាំ​២០២៤ ដែល​មាន​ ៨,១២​ពាន់​លាន​ដុល្លារ។

បើ​ផ្អែក​តាម​តួលេខ​ខាង​លើ ​​ប្រទេស​ជប៉ុន​ជា​ដៃគូ​ពាណិជ្ជ​កម្ម​អន្តរ​ជាតិ​ធំ​ទី​៥ របស់​កម្ពុជា បន្ទាប់​ពី​ប្រទេស​ចិន វៀតណាម អាមេរិក និង​ថៃ​៕