ពាណិជ្ជករថារំពឹងថា​ តម្លៃមាសនឹងស្ថិតក្នុងរង្វង់ ២ ៥០០ដុល្លារក្នុង១អោននៅឆ្នាំនេះ ចំពេលដែលមានការទិញលក់យ៉ាងគំហុក

ពាណិជ្ជករមាសក្នុងប្រទេសថៃនិយាយថាតម្លៃមាសពិភពលោកនៅតែស្ថិតក្នុងដំណើរឆ្ពោះទៅរកតម្លៃ២ ៥០០ដុល្លារក្នុងមួយអោនក្នុងឆមាសទី២ក្នុងឆ្នាំ ២០២៤នេះ បន្ទាប់ពីបានធ្លាក់ចុះក្រោម ២ ៣០០ ក្នុង១អោនកាលពីពេលថ្មីៗនេះ ទោះបីជាតម្លៃទីផ្សារទាបជាងការរំពឹងទុកពាក់ព័ន្ធនឹងការកាត់បន្ថយអត្រាការប្រាក់របស់ធនាគារកណ្តាលសហរដ្ឋអាមេរិកអាចនឹងធ្វើឡើងប្រហែលពីរដងក្នុងឆ្នាំនេះ ធ្លាក់ចុះពី ៣ទៅ ៤ដងកាលពីមុន​។

លោក Jitti Tangsithpakdi ប្រធានសមាគមពាណិជ្ជករមាសបានលើកឡើងពីការបន្តទិញលោហៈ​មានតម្លៃនេះដោយធនាគារកណ្តាលពិភពលោក​ ខណៈដែលមាសកំពុងតែមានការផ្គត់ផ្គង់យ៉ាងតឹងរ៉ឹង។

លោកបានប្រាប់កាសែតបាងកកប៉ុស្តិ៍ថា៖« កាលពីដើមយើងរំពឹងថាធនាគារកណ្តាលអាមេរិកនឹងទម្លាក់អត្រាការប្រាក់​ពី ៣ ទៅ ៤ ដងក្នុងឆ្នាំនេះ ដើម្បីជំរុញឱ្យតម្លៃមាសពិភពលោកកើនឡើងដល់ ២ ៥០០ ​ដុល្លារក្នុងមួយអោននៅចុងឆ្នាំនេះ ។ ឥឡូវ​នេះ​ការ​កាត់​បន្ថយ​មួយ ឬ​ពីរដង​ទំនង​ជាអាចនឹងកើតមាន ហើយ​យើង​រំពឹង​ថា​មាស​ពិត​ជា​នឹង​ឡើង​ដល់តម្លៃ​ ២ ៤០០ ​ ដុល្លារ និងក៏​អាចហក់​ឡើង​ដល់ ២​ ៥០០ដុល្លារផងដែរ»។

ការអត្ថាធិប្បាយរបស់លោក Jitti បានកើតឡើងនៅពេលដែលមាសស្ថិតនៅ​តម្លៃថេរគឺ ២ ២៩៩,៤៩ ដុល្លារ ក្នុងមួយអោនកាលពីថ្ងៃសុក្រ បន្ទាប់ពីបានធ្លាក់ចុះ​ជាង ១% កាលពីសប្តាហ៍មុន ដោយសារមាសនាពេលអនាគតរបស់សហរដ្ឋអាមេរិកធ្លាក់ចុះនៅត្រឹម ២ ៣០៩,២០ ដុល្លារក្នុង១អោន។  

តម្លៃបានធ្លាក់ចុះជាង ១៣០ដុល្លារ ក្នុង១អោន បន្ទាប់ពីឡើងដល់កម្រិតខ្ពស់បំផុតគឺ ២ ៤៣១,២៩ ដុល្លារក្នុងខែមេសា។

លោកបានមានប្រសាសន៍ថា៖« ការខាតបង់តម្លៃនាពេលថ្មីៗនេះត្រូវបានជំរុញជាចម្បងដោយការលក់ដ៏ស្លន់ស្លោ ជាពិសេស​អ្នកដែលបានទិញមាសនាពេលអនាគតដោយមានការរំពឹងទុកថានឹងទទួលបានប្រាក់ចំណេញ។ ឥឡូវនេះយើងកំពុងមើលឃើញថាវាអាចនៅក្នុងតម្លៃ ២ ២៧៥ដុល្លារ»៕ ​