PetroVietnam ​រកឃើញអណ្តូងប្រេងថ្មី២ដែលអាចនឹងទាញប្រេងឆៅបានចំនួនជាង១០០​ លានបារ៉ែល

ក្រុមហ៊ុនប្រេងរដ្ឋរបស់វៀតណាម PetroVietnam បាន​រកឃើញអណ្តូងប្រេងថ្មីចំនួន២ដែល​អាចទាញប្រេងសរុបចំនួន ១០០,៥ លានបារ៉ែល​។ នេះបើយោងតាម​នាយកដ្ឋាន​ផលិតកម្មនិងរុករក ​PVEP បាននិយាយកាលពីថ្ងៃអង្គារនេះ។

ការរកឃើញនេះមានសារៈសំខាន់សម្រាប់ឧស្សាហកម្មប្រេងរបស់ប្រទេសវៀតណាម ដែលបាននិងកំពុងតស៊ូក្នុងការបង្កើនទិន្នផលប្រេងឆៅរបស់ខ្លួន ដោយសារតែការថយចុះនៃការបម្រុងទុក ចំពេលមានការកើនឡើងនៃតម្រូវការប្រេងឥន្ធនៈ។

PVEP បាននិយាយថា ការខួងអណ្តូង R79 នៅតំបន់ Rong Field ក្នុងប្លុក 09-1 នៅភាគអាគ្នេយ៍ប្រទេសវៀតណាមបានរកឃើញទុនបម្រុងដំបូងចំនួន ១៦,៥ លានធុងនៃប្រេងឆៅ។

សម្រាប់អណ្តូងថ្មីនេះនឹងប្រតិបត្តិការដោយក្រុមហ៊ុន Vietsovpetro ដែលជាក្រុមហ៊ុនបណ្តាក់ទុនរួមគ្នាវៀតណាម-រុស្ស៊ី។

ការរកឃើញផ្សេងទៀតគឺនៅអណ្តូង BA-1X នៅ Bock PM3 CAA នៅភាគខាងត្បូងប្រទេសវៀតណាម ជាមួយនឹងសមត្ថភាពដំបូងចំនួន ៨៤ លានបារ៉ែល។ នេះបើតាម PVEP ដែលកាន់កាប់ភាគហ៊ុន 30 ភាគរយនៅក្នុងប្លុកនេះ។ ការផលិតនៅ BA-1X បានចាប់ផ្តើមនៅថ្ងៃទី ៥ ខែឧសភាដែលអាចទាញបានប្រេងឆៅចំនួន ២ ១០០ ​ធុងក្នុងមួយថ្ងៃ។

យោងតាមទិន្នន័យរបស់រដ្ឋាភិបាលបានឱ្យដឹងថា ទិន្នផលប្រេងឆៅរបស់វៀតណាមក្នុងរយៈពេល ៤ ខែដំបូងនៃឆ្នាំនេះបានធ្លាក់ចុះ ៣,៦ ភាគរយដែលកាលពីពីឆ្នាំមុនរកបាន២,៧៨លានតោន៕