សេដ្ឋកិច្ច

រថភ្លើងល្បឿនលឿនថ្មីនឹងដាក់ឱ្យដំណើរការឆាប់ៗ

បានផុស

១ ខែ មុន

នៅ

ថ្ងៃពុធ ៨ ឧសភា ២០២៤

ដោយ

ក្រុមហ៊ុន Royal Railway Cambodia ដែលជាក្រុមហ៊ុន របស់អ្នកឧកញ៉ា គិត ម៉េង បានបញ្ជាទិញក្បាលម៉ាស៊ីនរថភ្លើងល្បឿនលឿនចំនួន ១១គ្រឿង ពីប្រទេសជប៉ុន ដែលបានដឹកមកដល់កម្ពុជាកាលពីថ្ងៃទី ២៧ ខែមេសា កន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រថភ្លើងល្បឿនលឿនថ្មីម៉ាក KiHa 183 Series DMUចំនួន ១១ គ្រឿង នឹងដាក់ឱ្យដំណើរការឆាប់ៗនេះ បន្ទាប់ពីកែសម្រួលបច្ចេកទេសតម្រូវតាមផ្លូវដែករួចរាល់ ខណៈម៉ោង និងខ្សែរត់ក្រុមហ៊ុនបានរៀបចំរួចរាល់ហើយ។

លោក ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ប្រាប់កម្ពុជាថ្មីនៅថ្ងៃទី ០៨ ខែឧសភា ឆ្នាំ ២០២៤ នេះថា ផ្លូវដែកម្ពុជាមានយូរមកហើយ គ្រាន់តែខ្វះមធ្យោបាយដំណើការ។ លោកថា ការដាក់ឱ្យដំណើរការរថភ្លើងល្បឿនលឿននេះ នឹងបង្កើនមធ្យោបាយដឹកជញ្ជូនបន្ថែមទៀតនៅក្នុងប្រទេស។

លោក ឧកញ៉ា លឹម ហេងលើកឡើងថា៖ «បើយើងមានផ្លូវដែកដឹកជញ្ជូនកាន់តែល្អប្រសើរ គឺយើងមានជម្រើសច្រើនក្នុងការដឹកជញ្ជូន ដែលជាផ្នែកមួយចូលរួមកាត់បន្ថយថ្លៃដើម»។

លោក ឧកញ៉ា លឹម ហេង សង្ឃឹមថា នឹងមានការដឹកជញ្ជូនផលិតផលក្នុងស្រុកឱ្យបានច្រើនកាន់តែល្អប្រសើរ ដែលបច្ចុប្បន្ន មានការបំបែកខ្នែងច្រើន ដឹកជញ្ជូនតាមផ្លូវដែក។

បច្ចុប្បន្នកម្ពុជាមានផ្លូវដែកចំនួនពីរខ្សែរ គឺភ្នំពេញ-ប៉ោយប៉ែត និងភ្នំពេញ-ខេត្តព្រះសីហនុ បណ្តាញផ្លូវដែកនេះស្ថិតនៅក្រោមការគ្រប់គ្រងរបស់ក្រុមហ៊ុន Royal Railway ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Royal Group ខណៈរដ្ឋាភិបាលបានកែលម្អផ្លូវដែកដែលមានស្រាប់ទៅជាផ្លូវរថភ្លើងល្បឿនលឿន៕