សេដ្ឋកិច្ច

បណ្តាទីក្រុងនៅចិនលុបចោលការរឹតត្បឹតស្ដីពីការទិញផ្ទះ ខណៈវិបត្តិអចលនទ្រព្យកំពុងបន្ត

បានផុស

១០ ខែ មុន

នៅ

ថ្ងៃសុក្រ ១០ ឧសភា ២០២៤

ដោយ

ទីក្រុងដែលមានបំផុតរបស់ប្រទេសចិនចំនួន២ កាលពីថ្ងៃព្រហស្បតិ៍ បានប្រកាសលុបចោលការរឹតត្បឹតផ្សេងៗស្ដីពីការទិញផ្ទះ ដោយធ្វើតាមលំនាំទីក្រុងផ្សេងៗ ខណៈចិនសម្លឹងមើលការជំរុញទីផ្សារអចលនទ្រព្យដែលកំពុងបន្តជាប់គាំង។ នេះបើតាមការចុះផ្សាយរបស់ទីភ្នាក់ងារសារព័ត៌មាន AFP។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីក្រុង Hangzhou ដែលមានមនុស្សរស់នៅប្រមាណ ១២,៥ លាននាក់ បានប្រកាសថា ខ្លួនបានលុបចោលការរឹតបន្តឹងការទិញទាំងអស់ «ដើម្បីលើកកម្ពស់ការអភិវឌ្ឍប្រកបដោយស្ថិរភាព និងមានសុខភាពល្អនៃទីផ្សារ»។ មន្រ្តីនៃក្រុងនេះបន្តថា៖ «ចាប់ពីថ្ងៃប្រកាសនេះទៅ អ្នកដែលទិញផ្ទះក្នុងព្រំដែននៃទីក្រុងនេះនឹងមិនមានការត្រួតពិនិត្យលក្ខខណ្ឌដើម្បីការទិញរបស់ពួកគេទៀតទេ»។

គួរគូសបញ្ជាក់ថា ទីក្រុងជាច្រើនរបស់ចិន បានដាក់ការរឹតបន្តឹង និងតម្រូវការឥណទានដ៏តឹងតែងលើការទិញផ្ទះជាងមួយទសវត្សរ៍មុន ក្នុងកិច្ចខិតខំប្រឹងប្រែងដើម្បីកាត់បន្ថយតម្លៃកើនឡើង និងការបំប៉ោងទីផ្សារ។ យ៉ាងណាមិញ ក្រុងទាំងនោះកំពុងផ្លាស់ប្តូរគោលនយោបាយបែបនេះ ក្នុងបំណងទប់ស្កាត់ការធ្លាក់ចុះសេដ្ឋកិច្ច ដែលបណ្ដាលមកពីវិបត្តិបំណុលក្នុងចំណោមអ្នកអភិវឌ្ឍន៍ តម្រូវការទាប និងតម្លៃធ្លាក់ចុះ។

កាលពីថ្ងៃព្រហស្បតិ៍ដូចគ្នា ទីក្រុង Xi’an ដែលមានប្រជាជនចំនួន ១៣ លាននាក់រស់នៅ បាននិយាយថា ខ្លួនក៏បានលុបចោលការរឹតបន្តឹងពាក់ព័ន្ធទាំងអស់ផងដែរ។

បើតាមតួលេខដែល AFP ប្រមូលបាន មកទល់ពេលនេះ មានទីក្រុងចិនជាង ២០ បានលុបចោលការរឹតបន្តឹងការទិញផ្ទះ ចាប់តាំងពីដើមឆ្នាំមុនមក។ កាលពីខែមុន ទីក្រុង Chengdu នៅភាគនិរតីនៃប្រទេសចិន បាននិយាយថា ខ្លួននឹងលែងពិនិត្យមើលឯកសារចុះបញ្ជីគ្រួសារ សន្តិសុខសង្គម និងលក្ខខណ្ឌផ្សេងៗទៀត របស់អ្នកទិញទៀតហើយ មុនពេលផ្តល់ភ្លើងខៀវទិញដល់ពួកគេ។

ទីក្រុងធំៗជាច្រើន រួមទាំងទីក្រុងប៉េកាំង សៀងហៃ និង Shenzhen បានលុបចោលការរឹតត្បឹតជាអន្លើរ ដោយមិនបានលុបចោលទាំងស្រុងនោះទេ។

គួរគូសបញ្ជាក់ថា វិស័យអចលនទ្រព្យ និងសំណង់ រួមចំណែកជាង១/៤នៃផលិតផលក្នុងស្រុកសរុបរបស់ប្រទេសចិន ប៉ុន្តែវិស័យនេះស្ថិតនៅក្រោមភាពតានតឹងដែលមិនធ្លាប់មានពីមុនមក ចាប់តាំងពីឆ្នាំ ២០២០។ នៅឆ្នាំនោះ អាជ្ញាធរចិន បានរឹតបន្តឹងការទទួលបានឥណទានរបស់អ្នកអភិវឌ្ឍន៍ ក្នុងគោលបំណងកាត់បន្ថយបំណុលដែលកើនឡើង។

ចាប់តាំងពីពេលនោះមក ក្រុមហ៊ុនអចលនទ្រព្យធំៗ រួមទាំងក្រុមហ៊ុន Evergrande និងក្រុមហ៊ុន Country Garden បានឈានទៅរកការក្ស័យធន ខណៈតម្លៃធ្លាក់ចុះ បានរារាំងអ្នកប្រើប្រាស់ពីការវិនិយោគលើអចលនទ្រព្យ។

មកទល់ពេលនេះ វិធានការដែលរដ្ឋាភិបាលកណ្ដាលបានដាក់ចេញដើម្បីស្រោចស្រង់វិស័យនេះមានផ្លែផ្កាតិចតួច។ កាលពីខែមុន មូលនិធិរូបិយវត្ថុអន្តរជាតិ (IMF) បាននិយាយថា ការស្ទុះងើបសេដ្ឋកិច្ចរបស់ប្រទេសចិនពីជំងឺរាតត្បាតអាចធ្លាក់ចុះ ប្រសិនបើវិបត្តិអចលនទ្រព្យមិនត្រូវបានដោះស្រាយឱ្យបានត្រឹមត្រូវនោះទេ៕