ក្រុមហ៊ុនតំបន់សេដ្ឋកិច្ចពិសេសភ្នំពេញទទួលបានការអនុញ្ញាតលើការបោះផ្សាយលក់មូលបត្របំណុល

ផ្សារមូលបត្រកម្ពុជា (CSX) សម្រេចឯកភាពជាគោលការណ៍លើពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្របំណុល (សញ្ញាបណ្ណបៃតង) របស់ក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត (PPSEZ)  ​ ដែលជាការបើកផ្លូវដល់ក្រុមហ៊ុនធ្វើការកៀគរប្រភពទុនបន្ថែមតាមរយៈការបោះផ្សាយនេះដើម្បីយកទៅពង្រីកអាជីវកម្មរបស់ខ្លួន។

យោងតាមសេចក្តីប្រកាសព័ត៌មានរបស់ CSX ​ដែលចុះហត្ថុលេខាដោយលោក ហុង សុហួរ អគ្គនាយកនៃ CSX ផ្សារមូលបត្រកម្ពុជា ​សូមជម្រាបជូនដំណឹងដល់សាធារណជនថា ផមក បានសម្រេចឯកភាពជាគោលការណ៍លើពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្របំណុល (សញ្ញាបណ្ណបៃតង) របស់ក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក​ នៅថ្ងៃទី១០ ខែឧសភា ឆ្នាំ​២០២៤នេះ។

«ដើម្បីអាចចុះបញ្ជី និងជួញដូរជាផ្លូវការនៅ ផមក​ ក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក ត្រូវតែទទួលបានការអនុញ្ញាតឱ្យបោះផ្សាយលក់មូលបត្របំណុលជាសាធារណៈពី និយ័តករមូលបត្រកម្ពុជា (ន.ម.ក.) និងត្រូវបំពេញនូវលក្ខខណ្ឌផ្សេងៗមួយចំនួនទៀតពាក់ព័ន្ធនឹងការចុះបញ្ជីនៅ CSX »។ នេះបើយោងតាមសេចក្តីជូនដំណឹងរបស់ CSX។

សូមបញ្ជាក់ថា​កាលពីខែឧសភា ឆ្នាំ២០១៦កន្លងទៅនេះ PPSEZ បានចុះបញ្ជីលក់មូលបត្រកម្មសិទ្ធិលើកដំបូងជាសាធារណៈ ហើយបានធ្វើការចុះបញ្ជីលក់ភាគហ៊ុនបន្ថែមនៅឆ្នាំ២០១៨។ ក្នុងឆ្នាំ២០២២៤នេះ ក្រុមហ៊ុនបាននឹងកំពុងធ្វើការបោះផ្សាយលក់មូលបត្របំណុលជាធារណៈ(សញ្ញាបណ្ណបៃតង) បន្ថែមទៀត ក្នុងគោលដៅពង្រីកនូវសក្តានុពលអាជីវកម្ម។

ក្រុមហ៊ុនមានប្រតិបត្តិការអាជីវកម្មប្រមាណជា១៨ឆ្នាំនៅកម្ពុជា ដែលជាក្រុមហ៊ុនអភិវឌ្ឍន៍ និងប្រតិបត្តិករតំបន់សេដ្ឋកិច្ចពិសេស និងជាតំបន់សេដ្ឋកិច្ចពិសេសឈានមុខគេមួយនៅកម្ពុជា លើចំនួនវិនិយោគិនក្នុងតំបន់ជាមួយនឹងទំហំផ្ទៃដីប្រមាណ ៣៥៧, ៣២ ហិចតា៕