សេដ្ឋកិច្ច
កម្ពុជា-ឡាវចាប់ដៃគ្នាក្នុងការអភិវឌ្ឍវិស័យមូលបត្រ
ភ្នំពេញ៖ និយ័តករមូលបត្រកម្ពុជា-ឡាវបន្តសហការគ្នាលើកការអភិវឌ្ឍទីផ្សារមូលបត្រនៃប្រទេសសមាជិកអាស៊ានទាំងពីរនេះឱ្យកាន់តែមានភាពរីកចំរើនមួយកម្រិតទៀត ជាពិសេសគឺការចែករំលែកនូវព័ត៌មាននៃវិស័យនេះឱ្យគ្នាទៅវិញទៅមក។
![](https://www.kampucheathmey.com/wp-content/uploads/2024/05/SERC1-1024x614.jpg)
លោក ស៊ូ សុជាតិ អគ្គនាយនៃនិយ័តករមូលបត្រកម្ពុជា (ន.ម.ក.) កាលពីថ្ងៃទី១៦ ខែឧសភាបានដឹកនាំសហការីចូលរួមកិច្ចប្រជុំទ្វេភាគីលើកទី២ និងសិក្ឋាសាលាចែករំលែកបទពិសោធន៍ជាមួយគណៈកម្មការមូលបត្រឡាវ (LSCO) ដែលដឹកនាំដោយលោកស្រី Fongchinda Sengsourivong អគ្គលេខា-ធិការនៃ LSCO ដែលបានរៀបចំឡើងនៅស្រុកវ៉ាងវៀង ទីក្រុងវៀងចន្ទន៍ សាធារណរដ្ឋប្រជាធិបតេយ្យប្រជាមានិតឡាវ។
បើយោងតាមន.ម.ក. កិច្ចប្រជុំនេះ ត្រូវបានរៀបចំឡើងក្នុងគោលបំណងដើម្បីពង្រឹងទំនាក់ទំនងទ្វេភាគីរវាងនិយ័តករទាំងពីរ ដោយបានផ្លាស់ប្តូរព័ត៌មានអំពីស្ថានភាពបច្ចុប្បន្ននៃការអភិវឌ្ឍទីផ្សារមូលបត្រ និងទស្សនវិស័យ និងបានពិភាក្សាអំពីផែនការកិច្ចសហប្រតិបត្តិការក្នុងឆ្នាំ ២០២៤។
ន.ម.ក. បានចូលរួមចែករំលែកបទពិសោធន៍ ពាក់ព័ន្ធនឹងការលើកកម្ពស់ការអប់រំក្នុងវិស័យមូលបត្រ, ការបង្កើតភ្នាក់ងារវាយតម្លៃលទ្ធភាពសងនៅកម្ពុជា, ការពង្រីក និងការគ្រប់គ្រងវិនិយោគិនក្នុងស្រុក និងបរទេស និងការអនុវត្តច្បាប់ពាក់ព័ន្ធនឹងទណ្ឌកម្មផ្នែករដ្ឋបាល។
![](https://www.kampucheathmey.com/wp-content/uploads/2024/05/SERC2-1024x614.jpg)
លោក សុជាតិ បានថ្លែងក្នុងសិក្ខាសាសានោះថា៖ «ដោយកិច្ចសហប្រតិបត្តិការរវាងនិយ័តករទាំងពីរមានភាពជិតស្និទ្ធ យើងបង្កើតឡើងដោយស្មារតីបើកចំហ ការគោរពគ្នាទៅវិញទៅមក និងការប្តេជ្ញាចិត្តរួមគ្នាដើម្បីដោះស្រាយបញ្ហាប្រឈម និងចាប់យកឱកាស ខ្ញុំជឿជាក់ថា តាមរយៈទំនាក់ទំនងទ្វេភាគី កិច្ចខិតខំប្រឹងប្រែងរួមរបស់យើងនឹងត្រួសត្រាយផ្លូវឈានទៅរកការវិវត្តដ៏សំខាន់ និងអនាគតដ៏ប្រសើរសម្រាប់និយ័តករទាំងពីរ»។
លោកស្រី Fongchinda Sengsourivong បានថ្លែងថាជាមួយចំណេះដឹង និងបទពិសោធន៍ដ៏មានតម្លៃ ដែលបានចែករំលែករវាងនិយ័តករទាំងពីរ បានពង្រឹង និងផ្ដល់ឱ្យអ្នកចូលរួមនូវព័ត៌មានដែលអាចអនុវត្តក្នុងការអភិវឌ្ឍទីផ្សារមូលបត្ររបស់ប្រទេសទាំងពីរ។
លោកស្រីបានថ្លែងថា៖«ខ្ញុំជឿជាក់ថា ទំនាក់ទំនងដ៏រឹងមាំ និងកិច្ចសហប្រតិបត្តិការប្រកបដោយផ្លែផ្ការវាងនិយ័តករទាំងពីរ នឹងអភិវឌ្ឍ និងរីកចម្រើនបន្ថែមទៀត ដើម្បីផលប្រយោជន៍នៃប្រទេសទាំងពីរ ក៏ដូចជាការអភិវឌ្ឍនៃកិច្ចសហប្រតិបត្តិការ ក្នុងតំបន់ និងអន្តរជាតិ»។
![](https://www.kampucheathmey.com/wp-content/uploads/2024/05/CSX1.jpg)
បើយោងតាមសេចក្តីប្រកាសព័ត៌មានដដែល ន.ម.ក. នឹងទទួលរៀបចំកិច្ចប្រជុំទ្វេភាគីលើកទី៣ រវាង ន.ម.ក. និង LSCO នៅក្នុងឆ្នាំ ២០២៥ ផងដែរ។
យោងតាមរបាយការណ៍របស់ន.ម.ក. ចាប់ពីឆ្នាំ ២០១១ គិតដល់ពេលបច្ចុប្បន្ន ទីផ្សារនេះមានក្រុមហ៊ុនចំនួន ២២ បានបោះផ្សាយលក់មូលបត្រក្នុងផ្សារមូលបត្រកម្ពុជា ដែលប្រមូលសាច់ប្រាក់ប្រមាណ ៤០០ លានដុល្លារ។ ក្នុងចំណោមក្រុមហ៊ុនទាំង ២២ មានក្រុមហ៊ុនចំនួន ១១ បានបោះផ្សាយលក់មូលបត្រកម្មសិទ្ធិ និង ១១ ផ្សេងទៀតបោះផ្សាយលក់មូលបត្របំណុល។
មកដល់ពេលបច្ចុប្បន្ន និយតករមូលបត្រកម្ពុជាបានផ្តល់អាជ្ញាប័ណ្ណអនុញ្ញាតទទួលស្គាល់ដល់ក្រុមហ៊ុនធ្វើអាជីវកម្ម និងផ្តល់សេវាវិស័យមូលបត្រប្រហែល ១៣០ ក្រុមហ៊ុន ក្នុងនោះមានក្រុមហ៊ុនមូលបត្រ ក្រុមហ៊ុនទីប្រឹក្សាហិរញ្ញវត្ថុ ក្រុមហ៊ុនទីប្រឹក្សាវិនិយោគ ក្រុមហ៊ុនចែកចាយលក់មូលបត្រ ក្រុមហ៊ុនសមភាគីកណ្តាល ឈ្មួញជួញដូរទីផ្សារនិស្សន្ទ ក្រុមហ៊ុនគ្រប់គ្រងមូលនិធិ ក្រុមហ៊ុនថែរក្សាទ្រព្យសម្បត្តិជំនួស ក្រុមហ៊ុនចែកចាយលក់ទិញត្រឡប់មកវិញឬទូទាត់សង ក្រុមហ៊ុនអភិបាលមូលនិធិ រួមទាំងក្រុមហ៊ុនផ្តល់សេវាផ្សេងទៀតដែលបម្រើវិស័យមូលបត្រកម្ពុជា៕
-
សន្តិសុខសង្គម៦ ថ្ងៃ ago
ជនដៃដល់ បាញ់មនុស្ស២នាក់ស្លាប់ នៅបុរីប៉េងហួត មានគោរម្យងារជា ឧកញ៉ា
-
សន្តិសុខសង្គម៦ ថ្ងៃ ago
សមត្ថកិច្ច ចាប់បានបុរសដែលបាញ់មនុស្ស២នាក់ឱ្យស្លាប់ និងរបួស នៅបុរីប៉េងហ៊ួតបឹងស្នោ
-
សន្តិសុខសង្គម៦ ថ្ងៃ ago
Update៖ សមត្ថកិច្ចចាប់ខ្លួនជនសង្ស័យម្នាក់ ក្នុងហេតុការណ៍ផ្ទុះអាវុធ នៅក្នុងបុរីប៉េងហួតបឹងស្នោ
-
ព័ត៌មានជាតិ៥ ថ្ងៃ ago
សមាគមឧកញ៉ា នឹងស្នើបញ្ចប់ងារឧកញ៉ាពីឈ្មោះ ស្រី ស៊ីណា ក្រោយបាញ់ឱ្យមនុស្សស្លាប់
-
អត្ថាធិប្បាយ៥ ថ្ងៃ ago
សមត្ថកិច្ចប្រើពេល៣ម៉ោង ក្របួចកឧកញ៉ាប្រើកាំភ្លើងផ្ដាច់ជីវិតគូរស្នេហ៍មួយគូរ
-
KPT+៣ ថ្ងៃ ago
១០ ប្រទេស កំពូលគ្រោះថ្នាក់ខ្លាំង ចំពោះស្រ្តី
-
ព័ត៌មានជាតិ៥ ថ្ងៃ ago
ព្រះភិក្ខុ អុឹង ប៊ុនហ៊ូវ ប្រគេនដី២០០ហិកតាក្នុងខេត្តកំពង់ឆ្នាំង ដើម្បីសង់ពុទ្ធិកសាកលវិទ្យាល័យព្រះសីហនុរាជ
-
ព័ត៌មានជាតិ២ ថ្ងៃ ago
ក.ប.ប រកឃើញថាឈ្មួញនាំចូលផ្លែទុរេនពីប្រទេសជិតខាង និងមានជ្រលក់ថ្នាំ ហើយលក់បន្លំថាជាទុរេនក្នុងស្រុក