ខេត្តត្បូងឃ្មុំ កសិករសម្រុកដាំដំឡូងមី បានជាង ៥០ភាគរយហើយ

បន្ទាប់ពីមានភ្លៀងធ្លាក់ជិត១០មេមក ក្នុងពាក់កណ្តាលខែឧសភា ឆ្នាំ២០២៤នេះ ប្រជាកសិករក្នុងខេត្តត្បូងឃ្មុំ បាននាំគ្នាចុះបង្កបង្កើនផល ដាំដំឡូងមីលើផ្ទៃដីជាង ៥ម៉ឺនហិកតា បច្ចុប្បន្នដាំបានជាង៥០ភាគរយ ហើយការដាំដុះទទួលបានផលជោគជ័យនាឆ្នាំកន្លងមក គឺដោយមានការណែនាំពីមន្រ្តីជំនាញកសិកម្ម រុក្ខាប្រមាញ់ និងនេសាទខេត្ត ជាមួយទិន្នផលជាមធ្យម ១៨តោន ក្នុង ១ហិកតានោះ។

តាមការរៀបរាប់របស់លោក ដុក សារឿន ប្រធានការិយាល័យមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានឲ្យដឹងថា លើផ្ទៃដីជាង ៥ម៉ឺនហិកតា ក្នុង៧ស្រុកក្រុង ស្រុកដែលដដំឡូងមីច្រើនជាងគេគឺ ស្រុកត្បូងឃ្មុំ និងស្រុកតំបែរ។
យោងតាមផែនការ ឆ្នាំ២០២៤នេះ ក្នុងភូមិសាស្ត្រខេត្តត្បូងឃ្មុំ ត្រូវបន្តធ្វើបង្ហាញពីផលិតកម្មពូជដំឡូងមី ចំនួន ៧ប្រភេទ គឺ 1.ពូជ Rayong1, 2.ពូជ Rayong72, 3.ពូជ ម៉ាឡេKU50, 4.ពូជ UY Bong60, 5.ពូជ KM419, 6.ពូជ HLS11 និងទី7 គឺ ពូជ KM98 ដែលជាពូជមានសុខភាពល្អ ធន់នឹងជំងឺ ធន់នឹងអាកាសធាតុ និងផ្តល់ផលល្អ។ គោលបំណងនៃការធ្វើបង្ហាញ៖ ១.ជំរុញអនុវត្តបង្គុំបច្ចេកទេសកសិកម្មថ្មី ដើម្បីបង្ហាញពីប្រសិទ្ធភាពនៃបច្ចេកទេសដាំដុះដំឡូងមី ២.ជំរុញឲ្យកសិករមានការយល់ដឹងពីការជ្រើសរើសពូជល្អ តាមរយៈការផ្តល់ពូជដំឡូងមីដែលមានគុណភាពល្អ ធន់នឹងជំងឺ ទទួលទិន្នផលខ្ពស់ ហើយធន់ទៅនឹងអាកាសធាតុ និង ៣.ចូលរួមចំណែកក្នុងការពង្រឹងប្រពន្ធ័ផលិតកម្មពូជនិងការផ្គត់ផ្គង់ពូជដំឡូងមីប្រកបដោយនិរន្តរភាព។ ៤.តម្រង់ទិសឲ្យកសិករចេះផលិតពូជល្អសម្រាប់ខ្លួនឯងនិងផ្សព្វផ្សាយចែកចាយបន្តដល់កសិករក្នុងសហគមន៍ និងតំបន់ខ្លួនឯង ដើម្បីបង្កើនចំណូលនិងកាត់បន្ថយចំណាយផលិតកម្ម។

ក្នុងនោះក៏មានការចែករំលែកបទពិសោធន៍ជោគជ័យរបស់កសិករអនុវត្តបង្ហាញផលិតកម្មពូជដំឡូងមី ឆ្នាំ ២០២៣ ផងដែរ បន្ថែមទៀតនោះ អ្នកជំនាញបានផ្តល់បច្ចេកទេសបានណែនាំជាប្រចាំកសិករត្រូវកត់ត្រាពេលវេលាដាំដុះ ការប្រើប្រាស់ជី បាញ់ថ្នាំសម្លាប់ស្មៅ សត្វល្អិត ជំងឺ និងបញ្ហាផ្សេងៗ ដែលកើតឡើង៕

អត្ថបទ៖ សាន វិឡែម