សេដ្ឋកិច្ច

ការនាំចេញរបស់ថៃស្ទុះងើបឡើងវិញ ក្នុងកំណើន ៦,៨ ភាគរយនៅខែមេសា

បានផុស

៨ ខែ មុន

នៅ

ថ្ងៃសុក្រ ២៤ ឧសភា ២០២៤

ដោយ

ការនាំចេញរបស់ប្រទេសថៃបានស្ទុះងើបឡើងវិញក្នុងខែមេសា ដោយសារការធូរស្បើយនៃសេដ្ឋកិច្ចពិភពលោក និងការថយចុះនៃអត្រាអតិផរណាជាមធ្យមនៅទូទាំងពិលោក ក្រោយធ្លាក់ចុះយ៉ាងគំហុកដល់ ១០,៩ ភាគរយកាលពីខែមីនា។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងពាណិជ្ជកម្មថៃ បានបញ្ចេញទិន្នន័យកាលពីថ្ងៃព្រហស្បតិ៍ថា ការនាំចេញផ្អែកលើគយ បានកើនឡើង ៦,៨ ភាគរយក្នុងខែមេសា បើធៀបនឹងរយៈពេលដូចគ្នាកាលពីឆ្នាំមុន ស្មើនឹង ២៣,៣ ប៊ីលានដុល្លារ ខណៈការនាំចេញក្នុងវិស័យជាក់ស្តែង (មិនរាប់បញ្ចូលមាស ផលិតផលដែលទាក់ទងនឹងប្រេង និងអាវុធ) បានកើនឡើង ១១ ភាគរយ។ ផលិតផលកសិកម្ម កសិកម្មឧស្សាហកម្ម និងឧស្សាហកម្ម សុទ្ធតែកើនឡើងលើការនាំចេញ។

ចំណែកឯការនាំចូលវិញ បានកើនឡើង ៨,៣ ភាគរយ ក្នុងខែមេសា ស្មើនឹង ២៤,៩ ប៊ីលានដុល្លារ ដែលបណ្ដាលឱ្យមានឱនភាពពាណិជ្ជកម្មប្រចាំខែ ចំនួន ១,៦៤ ប៊ីលានដុល្លារ។

សម្រាប់រយៈពេល៤ខែដំបូងនៃឆ្នាំ ២០២៤ ការនាំចេញរបស់ថៃបានកើនឡើង ១,៤ ភាគរយ ស្មើនឹង ៩៤,៣ ប៊ីលានដុល្លារ ខណៈការនាំចូលកើនឡើង ៤,៩ ភាគរយ ស្មើនឹង ១០០ ប៊ីលានដុល្លារ បណ្ដលឱ្យមានឱនភាពពាណិជ្ជកម្មជាង ៦ ប៊ីលានដុល្លារ។

អគ្គនាយកនៃការិយាល័យគោលនយោបាយ និងយុទ្ធសាស្ត្រពាណិជ្ជកម្មថៃ លោក Poonpong Naiyanapakorn បានចាត់ទុកការកើនឡើងនៅខែមេសាថាមកពីការធូរស្រាលនៃអតិផរណាក្នុងចំណោមប្រទេសដៃគូពាណិជ្ជកម្ម បើធៀបនឹងឆ្នាំមុន ការពង្រីកផលិតកម្មឧស្សាហកម្មនៅទូទាំងពិភពលោក ដោយសារការបញ្ជាទិញកើនឡើង និងតម្រូវការផលិតផលកសិកម្មដែលជំរុញដោយការកើនឡើងតម្លៃទីផ្សារពិភពលោក។

លោកបន្តថា៖ «និន្នាការនេះ រំពឹងថានឹងបន្តកើនឡើងក្នុងខែឧសភា ជាពិសេសការនាំចេញផ្លែឈើ ព្រោះវាជារដូវសម្រាប់ទុរេន»។

លោក Poonpong បានគូសបញ្ជាក់ទៀតថា៖ «និន្នាការនាំចេញសម្រាប់ត្រីមាសទី២ រំពឹងនឹងកើនឡើង ០,៨១ ភាគរយ ហើយក្រសួងពាណិជ្ជកម្មរក្សាគោលដៅនាំចេញរបស់ខ្លួននៅកម្រិត ១-២ ភាគរយ ដោយមើលឃើញពីភាពតានតឹងភូមិសាស្ត្រនយោបាយនៅមជ្ឈិមបូព៌ាជាដើម»។

បើតាមមន្រ្តីដដែល កត្តាហានិភ័យដែលដាក់សម្ពាធលើការរំពឹងទុកនៃការនាំចេញ រួមមានលក្ខខណ្ឌអាកាសធាតុក្តៅ និងស្ងួតរបស់ប្រទេសថៃ ការធ្លាក់ចុះនៃសេដ្ឋកិច្ចនៅក្នុងប្រទេសចិន និងជប៉ុន និងជម្លោះនៅមីយ៉ាន់ម៉ាជាដើម។

ចំណែកឯលោក Chaichan Chareonsuk ដែលជាប្រធានក្រុមប្រឹក្សាអ្នកដឹកជញ្ជូនជាតិថៃ (TNSC) វិញ បានប្រាប់បាងកកប៉ុស្តិ៍ថា ការនាំចេញរបស់ថៃក្នុងត្រីមាសទី ២ រំពឹងនឹងកើនឡើង ១ ភាគរយ ដោយសារអង្ករ កៅស៊ូ គ្រឿងបន្លាស់រថយន្ត និងគ្រឿងបន្លាស់អេឡិចត្រូនិកបន្តជំរុញសន្ទុះ។ យ៉ាងណាមិញ លោកថា មានហានិភ័យដ៏សំខាន់មួយគឺបញ្ហាភូមិសាស្ត្រនយោបាយនៅក្នុងសមុទ្រក្រហម ដែលនាំឱ្យមានការប្រែប្រួល និងការកើនឡើងថ្លៃដឹកជញ្ជូន៕

Related Topics: