សេដ្ឋកិច្ច

ធនាគារ J.P. Morgan តម្លើងការព្យាករណ៍កំណើនសេដ្ឋកិច្ចចិន ដល់ ៥,២ ភាគរយ

បានផុស

៤ ខែ មុន

នៅ

ថ្ងៃសុក្រ ២៤ ឧសភា ២០២៤

ដោយ

ប្រធានសេដ្ឋវិទូចិនរបស់ធនាគារវិនិយោគអាមេរិក J.P. Morgan លោក Zhu Haibin បានប៉ាន់ប្រមាណថា សេដ្ឋកិច្ចរបស់ប្រទេសចិននឹងកើនឡើង ៥,២ ភាគរយនៅឆ្នាំ ២០២៤ ដោយតម្លើងពីការព្យាករណ៍ ៤,៩ ភាគរយកាលពីលើកមុន។ នេះបើតាមការចុះផ្សាយរបស់សារព័ត៌មានរដ្ឋចិនស៊ីនហួ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Zhu បានបង្ហាញការព្យាករណ៍ថ្មីរបស់លោក ក្នុងអំឡុងកិច្ចប្រជុំកំពូល J.P. Morgan Global China ដែលធ្វើឡើងនៅក្រុងសៀងហៃ កាលពីថ្ងៃពុធ។

លោកថ្លែងថា កំណើនសេដ្ឋកិច្ចដ៏រឹងមាំ ៥,៣ ភាគរយក្នុងត្រីមាសទី១ឆ្នាំ បើធៀបនឹងរយៈពេលដូចគ្នាកាលពីឆ្នាំមុន បានលើសកម្រិតរំពឹងទុក និងបង្ហាញពីការចាប់ផ្ដើមសេដ្ឋកិច្ចរឹងមាំសម្រាប់ឆ្នាំនេះ។

លោកបានកត់សម្គាល់ថា ចំណុចសំខាន់៣របស់សេដ្ឋកិច្ចចិននៅក្នុងត្រីមាសទី១នៃឆ្នាំនេះ គឺការកើនឡើងនៃតម្លៃឧស្សាហកម្ម ការធ្វើពិពិធកម្មនៃផលិតផលនាំចេញ និងទិសដៅនាំចេញ និងការកើនឡើងនៃបច្ចេកវិទ្យា និងឧស្សាហកម្មថ្មីៗ ដែលជាកត្តាជំរុញកំណើនសេដ្ឋកិច្ច។

លោក Zhu បានបន្តថា៖ «ទោះបីជាប្រាក់យន់ប្រឈមមុខនឹងសម្ពាធនៃការធ្លាក់ថ្លៃរយៈពេលខ្លីធៀបនឹងប្រាក់ដុល្លារអាមេរិកក៏ដោយ សម្ពាធធ្លាក់ចុះនឹងបានធូរស្បើយ ខណៈធនាគារកណ្តាលអាមេរិកទំនងជានឹងកាត់បន្ថយអត្រាការប្រាក់នៅឆមាសទី២នៃឆ្នាំនេះ»។

គួរគូសបញ្ជាក់ថា កិច្ចប្រជុំកំពូល J.P. Morgan Global China គឺជាកិច្ចប្រជុំប្រចាំឆ្នាំដ៏ធំបំផុត និងមានឥទ្ធិពលបំផុតមួយរបស់មេដឹកនាំអាជីវកម្មក្នុងប្រទេសចិន ដោយភ្ជាប់សហគមន៍វិនិយោគពិភពលោកជាមួយនឹងទីផ្សាររបស់ប្រទេសចិន៕