សេដ្ឋកិច្ច

ក្រុមអាជីវកម្មវៀតណាម អំពាវនាវឲ្យមានការគ្រប់គ្រងវិស័យទុរេនឲ្យតឹងរ៉ឹង

បានផុស

៩ ខែ មុន

នៅ

ថ្ងៃសៅរ៍ ២៥ ឧសភា ២០២៤

ដោយ

ក្រុមអាជីវកម្មរបស់ប្រទេសវៀតណាម កំពុងអំពាវនាវស្នើសុំឱ្យមានយន្តការគ្រប់គ្រងដ៏តឹងរ៉ឹងសម្រាប់ការអភិវឌ្ឍប្រកបដោយចីរភាពនៃកសិកម្មទុរេន ខណៈវិស័យនេះរីកចម្រើនយ៉ាងឆាប់រហ័ស។ នេះបើតាមការចុះផ្សាយរបស់កាសែត Vietnam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយទទួលបានការអនុញ្ញាតជាផ្លូវការឱ្យនាំចេញទុរេនវៀតណាមទៅកាន់ប្រទេសចិន ទុរេនបានជួញជំរុញឧស្សាហកម្មផ្លែឈើទាំងមូលរបស់វៀតណាម ដោយការនាំចេញផ្លែឈើប្រភេទនេះមានតម្លៃប្រមាណ ២,២ ប៊ីលានកាលពីឆ្នាំមុន។

យ៉ាងណាមិញ ទីផ្សារដែលកំពុងរីកចម្រើនមួយនេះ បានបង្កជាបញ្ហាទាក់ទងទៅនឹងការអនុលោមតាមបទប្បញ្ញត្តិទីផ្សារនាំចូល ដែលនាំឱ្យការដឹកជញ្ជូនទុរេនជាច្រើន រងការត្រួតពិនិត្យសម្រាប់ជំងឺរុក្ខជាតិ និងសុវត្ថិភាពចំណីអាហារ។ ការបំពានផ្សេងៗទៀត រួមមានកន្លែងវេចខ្ចប់ទិញទុរេនពីតំបន់ដាំដុះដោយគ្មានលេខកូដ នាំឱ្យផលិតផលមានប្រភពដើមមិនច្បាស់លាស់ ឬមិនអនុវត្តតាមដំណើរការវេចខ្ចប់ដែលត្រូវបានអនុម័តជាដើម។

លោកស្រី Ngô Tường Vy អគ្គនាយកក្រុមហ៊ុន Chánh Thu Fruit Import-Export Joint Stock Company បាននិយាយថា ការអភិវឌ្ឍន៍ឧស្សាហកម្មទុរេន កំពុងជួយកសិករទទួលបានប្រាក់ចំណេញយ៉ាងច្រើន។ យ៉ាងណាមិញ លោកស្រីថា អាជីវកម្មជាច្រើនបានខាតបង់លុយរាប់រយពាន់លានដុង ដោយសារកិច្ចសន្យាទិញត្រូវបានលុបចោល។ ពេលធ្វើការលើផ្នែកផ្គត់ឱ្យផ្សារទំនើប ការលុបចោលកិច្ចសន្យាតែមួយ អាចមានផលវិបាកយ៉ាងធំធេង។

ដោយបែបនេះហើយ លោកស្រី Vy ថ្លែងថា ចាំបាច់ត្រូវមានយន្តការច្បាប់ជាប្រព័ន្ធ សម្រាប់ការអភិវឌ្ឍប្រកបដោយចីរភាពក្នុងឧស្សាហកម្មទុរេន។

ជាឧទាហរណ៍ ប្រទេសថៃ ដែលជាដៃគូប្រកួតប្រជែងរបស់វៀតណាមក្នុងការផលិត និងនាំចេញទុរេន បានទទួលជោគជ័យក្នុងទីផ្សារពិភពលោក ដោយសារចំណែកនៃការដាក់ទណ្ឌកម្មយ៉ាងតឹងរ៉ឹងចំពោះការបំពាននៅគ្រប់ដំណាក់កាលនៃខ្សែសង្វាក់ផ្គត់ផ្គង់ទុរេន។ លោកស្រីថា ការអនុវត្តន៍បទប្បញ្ញត្តិបានរួមចំណែកមិនត្រឹមតែផលប្រយោជន៍របស់អ្នកដាំដុះបុគ្គលប៉ុណ្ណោះទេ ប៉ុន្តែថែមទាំងសម្រាប់ខ្សែសង្វាក់ផ្គត់ផ្គង់ទាំងមូល និងប្រទេសជាតិផងដែរ។

ចំណែកឯលោក Võ Quan Huy នាយកក្រុមហ៊ុន Huy Long An Co., Ltd. វិញ បានថ្លែងថា បញ្ហាមួយទៀតគឺការតាមដានប្រភពដើមនៃទុរេន។ លោកបន្តថា ក្នុងរយៈពេល ៥ ទៅ ១០ ឆ្នាំខាងមុខ ទីផ្សារនឹងចាប់ផ្តើមយកចិត្តទុកដាក់កាន់តែច្រើនទៅលើបញ្ហានេះ។

ជាមួយគ្នានេះ លោក Nguyễn Phong Phú នាយកបច្ចេកទេសនៃក្រុមហ៊ុន Vina T&T Import-Export Company បាននិយាយថា បញ្ហាសំខាន់បំផុតសម្រាប់ឧស្សាហកម្មទុរេននាពេលនេះ គឺការពង្រឹងខ្សែសង្វាក់ផ្គត់ផ្គង់។ យោងតាមលោក Phú បញ្ហាចម្បងនៃឧស្សាហកម្មនេះ គឺភាពវឹកវរតម្លៃ ការបំពានកិច្ចសន្យា និងខ្សែសង្វាក់ផ្គត់ផ្គង់ជាដើម។

គួរគូសបញ្ជាក់ថា វិស័យទុរេនវៀតណាមបានរីកចម្រើនយ៉ាងរហ័ស ដោយសារការងាកទៅដាំដំណាំប្រភេទនេះរបស់ប្រជាជនវៀតណាម នៅពេលទីផ្សារហក់ឡើង។ ការណ៍នេះបង្កជាការព្រួយបារម្ភផ្សេងៗទៀត រួមទាំងបរិមាណច្រើន ប៉ុន្តែកង្វះគុណភាពក្នុងការនាំចេញ៕

Related Topics: