សេដ្ឋកិច្ច

ថៃគ្រោងសុំឱ្យអ៊ីស្រាអែលបង្កើនកូតាទទួលពលករចំណាកស្រុកខ្លួន ខណៈសង្រ្គាមនៅហ្គាហ្សាបន្តរ៉ាំរៃ

បានផុស

១ ខែ មុន

នៅ

ថ្ងៃចន្ទ ២៧ ឧសភា ២០២៤

ដោយ

រដ្ឋមន្ត្រីក្រសួងការងារថៃ លោក ភីផាត រ៉ាតចាក់គីតប្រាកន (Phiphat Ratchakitprakarn) គ្រោងនឹងស្នើឱ្យអ៊ីស្រាអែល ដំឡើងកូតាទទួលពលករចំណាកស្រុកថៃ ក្នុងអំឡុងដំណើរទស្សនកិច្ចផ្លូវការរយៈពេល៤ថ្ងៃរបស់លោកទៅកាន់ប្រទេសមជ្ឈិមបូព៌ា ដែលកំពុងធ្វើសង្រ្គាមនៅតំបន់ហ្គាហ្សាមួយនេះ។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ភីផាត ត្រូវបំពេញទស្សនកិច្ចនៅអ៊ីស្រាអែលថ្ងៃទី២៦-២៩ ខែឧសភា តាមការអញ្ជើញរបស់រដ្ឋាភិបាលអ៊ីស្រាអែល ដោយលោក និងមន្ត្រីកំពូលៗផ្សេងទៀតនៅក្រសួង នឹងជួបជាមួយរដ្ឋមន្ត្រីក្រសួងការងារ កសិកម្ម និង មហាផ្ទៃរបស់អ៊ីស្រាអែល ដើម្បីចរចាសុំការបង្កើនពលករថៃ ដែលអ៊ីស្រាអែលអនុញ្ញាតឱ្យចូលធ្វើការ។

រដ្ឋមន្ត្រីដដែលបន្តថា និយោជនវិស័យសំណង់របស់អ៊ីស្រាអែល ចង់ជ្រើសរើសកម្មករចំណាកស្រុកជាង ២០ ០០០ នាក់ ខណៈអ៊ីស្រាអែលក៏ត្រូវការកម្លាំងពលកម្មបន្ថែមក្នុងវិស័យកសិកម្មផងដែរ។ កិច្ចប្រជុំរវាងមន្រ្តីនៃប្រទេសទាំង២ នឹងផ្តោតលើការបង្កើនឱកាសការងារសម្រាប់ប្រជាជនថៃ ដោយធានាថា ពួកគេទទួលបានប្រាក់ឈ្នួលសមរម្យ និងថ្លៃធ្វើដំណើរទាប។

ដោយគ្រោងនឹងជួបសំណេះសំណាល និងស្តាប់ពីជីវភាព និងការងាររបស់ពលករថៃ លោក ភីផាត បានថ្លែងថា៖ «ជនជាតិថៃត្រូវតែធ្វើការតែនៅក្នុងតំបន់សុវត្ថិភាព ឬតំបន់បៃតង ដែលបញ្ជាក់ដោយអាជ្ញាធរអ៊ីស្រាអែល និងស្ថានទូតថៃប្រចាំក្រុងតែវអាវីវ»។

គួរគូសបញ្ជាក់ថា ការស្នើសុំរបស់ថៃឱ្យអ៊ីស្រាអែលបង្កើនកូតាទទួលពលករថៃ ធ្វើឡើងខណៈដែលជម្លោះអ៊ីស្រាអែល-ហាម៉ាស់ នៅតែបន្តអូសបន្លាយ ដោយជនជាតិថៃប្រមាណ ៣៩ នាក់ត្រូវបានសម្លាប់មកទល់ពេលនេះ។ ជាមួយគ្នានោះ មានជនជាតិថៃ ៦ នាក់នៅឡើយ ដែលស្ថិតនៅក្រោមការឃុំខ្លួនជាចំណាប់ខ្មាំងរបស់ក្រុមហាម៉ាស់ ដែលពួកគេត្រូវបានចាប់យកទៅនៅពេលក្រុមប្រដាប់អាវុធប៉ាឡេស្ទីនមួយនេះ បើកការវាយឆ្មក់ចូលអ៊ីស្រាអែលថ្ងៃ ៧ តុលា ឆ្នាំមុន ដោយបញ្ឆេះសង្រ្គាមបច្ចុប្បន្ន។

ជុំវិញបញ្ហានេះ លោក ភីផាត បានគូសបញ្ជាក់ថា ក្រសួងការបរទេសថៃ កំពុងសម្របសម្រួលជាមួយប្រទេសផ្សេងទៀតដូចជាម៉ាឡេស៊ី អេហ្ស៊ីប និងកាតា ដើម្បីធានាសុវត្ថិភាព ការដោះលែងជាបន្ទាន់ និងការវិលត្រឡប់ចូលស្រុករបស់ជនរងគ្រោះទាំង៦រូប។

ខណៈមានការព្រួយបារម្ភពីសុវត្ថិភាពពលករធ្វើការនៅអ៊ីស្រាអែល កាលពីដើមខែឧសភានេះ នាយកដ្ឋានការងារថៃ (DoE) បានដកការរឹតត្បឹតលើការបញ្ជូនពលករថៃទៅអ៊ីស្រាអែល បន្ទាប់ពីការវាយតម្លៃយ៉ាងម៉ត់ចត់ ដោយបានពិភាក្សាជាមួយទីភ្នាក់ងារផ្សេងទៀត អំពីស្ថានភាពទាក់ទងនឹងជម្លោះអ៊ីស្រាអែល-ហាម៉ាស ។ នាយកដ្ឋានបានទទួលការធានាពីស្ថានទូតអ៊ីស្រាអែលថា កម្មករថៃនឹងត្រូវធ្វើការតែក្នុងតំបន់សុវត្ថិភាពប៉ុណ្ណោះ ហើយផែនការឆ្លើយតបគ្រាអាសន្ន រួមទាំងនីតិវិធីជម្លៀសផងដែរ នឹងត្រូវអនុវត្ត ប្រសិនបើគ្រោះថ្នាក់កើតឡើង៕

Related Topics:ប្រទេសថៃ