រដ្ឋជំរុញការបិទស្លាកតម្លៃទំនិញជាប្រាក់រៀល ដើម្បីលើកកម្ពស់ចរាចរណ៍រូបិយប័ណ្ណជាតិ

ភ្នំពេញ៖ក្រសួងពាណិជ្ជកម្ម និងធនាគារជាតិនៃកម្ពុជានឹងសហការគ្នាក្នុងការលើកកម្ពស់ការប្រើប្រាស់ប្រាក់រៀលតាមរយៈយន្តការនានា ជាពិសេសការបិទស្លាកតម្លៃទំនិញនៅតាមហាងទំនិញនានា ជាប្រាក់រៀល។

យោងតាមកិច្ចប្រជុំរវាងលោកស្រី សេរី បូរាពេជ្រ រដ្ឋលេខាធិការក្រសួងពាណិជ្ជកម្ម និងលោក  យឹម លាត ទេសាភិបាលរង ធនាគារជាតិនៃកម្ពុជាកាលពីថ្ងៃអង្គារ ទី២១ ខែឧសភា ឆ្នាំ២០២៤ បានពិភាក្សាគ្នាអំពីការរៀបចំកិច្ចសហប្រតិបត្តិការរវាងស្ថាប័នទាំងពីរដើម្បីលើកកម្ពស់ការប្រើប្រាស់ប្រាក់រៀល។

ជាមួយនឹង​ផែនការសកម្មភាពរបស់ធនាគារជាតិនៃកម្ពុជា ព្រមទាំងវិធានការនិងគោលនយោបាយ ដែលក្រសួងពាណិជ្ជកម្មអាចអនុវត្តបន្ថែមទៀត នឹងចូលរួមលើកកម្ពស់ការប្រើប្រាស់ប្រាក់រៀលឱ្យបានកាន់តែទូលំទូលាយ។

លោក យឹម លាត បានចាត់ទុកថា​កិច្ចសហការនិងការខិតខំប្រឹងប្រែងរបស់ក្រសួងពាណិជ្ជកម្ម ដែលបានរួមចំណែកយ៉ាងសំខាន់នៅក្នុងការលើកកម្ពស់ការប្រើប្រាស់ប្រាក់រៀលកន្លងមក ជាពិសេស ការតម្រូវឱ្យមានបិទស្លាកតម្លៃទំនិញនៅតាមហាងទំនិញនានា ជាប្រាក់រៀល។

លោកបានបញ្ជាក់បន្ថែមថា៖« ធនាគារជាតិនៃកម្ពុជាក៏បានដាក់ចេញនូវមធ្យោបាយទូទាត់តាមប្រព័ន្ធអេឡិចត្រូនិក ដែលជាការរួមចំណែកដល់ការលើកកម្ពស់ការប្រើប្រាស់ប្រាក់រៀលផង និងធ្វើឱ្យការទូទាត់នៅក្នុងពាណិជ្ជកម្មជារួមប្រព្រឹត្តទៅដោយប្រសិទ្ធភាពផង»។

កាលពីថ្ងៃទី២២ ខែមីនា ឆ្នាំ២០២៣ ក្រសួងពាណិជ្ជកម្មនាក៏ធ្លាប់បានចេញផ្សាយនូវសេចក្ដីជូនដំណឹងមួយអំពីការបិទ​ស្លាកតម្លៃលើមុខទំនិញ និងសេវាកម្មគ្រប់ប្រភេទ ជាពិសេសនៅតំបន់ទេសចរណ៍។ ការចាប់អនុវត្តរបស់ក្រសួងពាណិជ្ជកម្មបែបនេះក្នុងគោលបំណងជួយសម្រួលដល់ភ្ញៀវទេសចរក្នុងស្រុក និងក្រៅស្រុក លើការទិញទំនិញ ឬប្រើប្រាស់សេវាកម្មផ្សេងៗ ដោយមានតម្លៃស្រាប់ៗ។

​យោងតាមរបាយការណ៍របស់​ធនាគារជាតិនៃ​កម្ពុជា​​ ទំហំចរាចរប្រាក់រៀល​បានកើនឡើង​ជាមធ្យម ​១៥ ភាគរយ ក្នុងមួយឆ្នាំ ​នាអំឡុង ២ ទសវត្សរ៍ចុងក្រោយ ខណៈឥណទាន​ និងប្រាក់បញ្ញើក្នុងប្រព័ន្ធធនាគារជារៀលក៏បានកើនឡើងលឿន ក្នុងអត្រា ៣៥ និង ៣០ ភាគរយ។

ក្នុងឆ្នាំ ២០២៣ ប្រតិបត្តិការទូទាត់ប្រាក់រៀលតាមប្រព័ន្ធអេឡិចត្រូនិកបាន​កើន​ឡើង ៤៤ ភាគរយ ធៀបនឹងឆ្នាំ ២០២២ និងខ្ពស់ជាកំណើននៃប្រតិបត្តិការទូទាត់តាម​ប្រព័ន្ធ​អេឡិកត្រូនិក ដែលកើន​ឡើង ៣,១ ភាគរយ៕