សេដ្ឋកិច្ច

តម្លៃមាសនៅកម្ពុជា នឹងហក់ឡើងដល់ជាង ៣ ពាន់ដុល្លារក្នុងមួយតម្លឹង

បានផុស

១០ ខែ មុន

នៅ

ថ្ងៃចន្ទ ២៧ ឧសភា ២០២៤

ដោយ

តម្លៃមាសនៅកម្ពុជានឹងបន្តហក់ឡើងរហូតដល់ជាង៣ពាន់ដុល្លារក្នុងមួយតម្លឹង ដោយសារបញ្ហាប្រឈមនៅតំបន់មជ្ឈឹមបូព៌ា និងការធ្លាក់ចុះនៃអត្រាការប្រាក់សហរដ្ឋអាមេរិក។

ម្ចាស់ហាងមាសពេជ្រទីមង្គល បានឱ្យដឹងថា ហាងឆេងមាសនៅថ្ងៃទី ២៧ ខែឧសភា ឆ្នាំ ២០២៤ ២៨៤ ដុល្លារក្នុងមួយជី។ ម្ចាស់ហាងរូបនេះ បញ្ជាក់ថា ទីផ្សារទិញ-លក់ មាសបច្ចុប្បន្នមិនសូវល្អទេ ដោយសារហាងឆេងមាសប្រែប្រួលចុះឡើងរហ័ស ដែលធ្វើឱ្យបាត់ទំនុកចិត្តអតិថិជន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន Golden FX Link Capital បានឱ្យដឹងថា ហាងឆេងមាសរយៈពេល ២ ថ្ងៃនេះ មានការធ្លាក់ចុះបន្តិច ប៉ុន្តែជារួមនៅឆ្នាំ ២០២៤ តម្លៃមាសបានហក់ឡើងយ៉ាងគំហុក ជាពិសេសនៅក្នុងខែមេសា និងខែឧសភានេះ ដែលឡើងដល់ ២ ៩៥០ ដុល្លារ ក្នុងមួយតម្លឹង។

អ្នកជំនាញរូបនេះ អះអាងថា កត្តាដែលធ្វើឱ្យតម្លៃមាសនៅកម្ពុជា និងពិភពលោកមានការកើនឡើងដោយសារតែអាមេរិកមានគម្រោងកាត់បន្ថយអត្រាការប្រាក់ ទើបធ្វើឱ្យទំនុកចិត្តអតិថិជនមានការធ្លាក់ចុះនៅក្នុងការប្រើប្រាស់លុយដុល្លារ។ ម្យ៉ាងទៀតការធ្លាក់ចុះនៃអត្រាអតិផរណា ក៏ជាដើមចមធ្វើឱ្យមាសឡើងថ្លៃដែរ។

លោក ឡុង សំណាង បញ្ជាក់ថា៖ «ពេលដែលអតិផរណាធ្លាក់ចុះក្នុងរង្វង់ ២ ភាគរយ អាមេរិកនឹងកាត់បន្ថយអត្រាការប្រាក់ អញ្ចឹងតម្លៃមាសនឹងឡើងនៅពេលខាងមុខទៀត»។

លោក ឡុង សំណាង បានបន្តថា កត្តាភូមិសាស្ត្រនយោបាយមានភាពតានតឹង និងទំនុកចិត្តរបស់អតិថិជនដែលដាក់លុយដុល្លារក្នុងធនាគារដើម្បីទទួលយកប្រាក់ចំណេញធ្លាក់ចុះ ដោយពួកគាត់យល់ឃើញថា ពេលដែលអត្រាការប្រាក់ថយចុះ អញ្ចឹងគាត់លែងដាក់លុយក្នុងធនាគារ ហើយដកលុយទៅវិនិយោគខាងក្រៅវិញដូចជាវិនិយោគទៅលើមាសជាដើម ខណៈប្រទេសមួយចំនួនក៏មានការទិញមាសច្រើនដែរ ដែលធ្វើឱ្យតម្លៃមាសហក់ឡើងខ្លាំង។

លោក ឡុង សំណាង បញ្ជាក់ថា ក្នុងស្ថានភាពបច្ចុប្បន្នតម្លៃមាសអាចធ្លាក់ចុះបន្តិច អំឡុងខែមិថុនា រហូតដល់ខែ កញ្ញា ឆ្នាំ ២០២៤ អាចនឹងមានការកើនឡើងវិញលើសពី ៣ ពាន់ដុល្លារ នៅពេលខាងមុខ៕