ព័ត៌មានជាតិ

អ្នកឧកញ៉ា សុខ គង់ អះអាងគ្មានបំណងចង់លក់សណ្ឋាគារសុខានៅជ្រោយចង្វារនោះទេ

បានផុស

៧ ខែ មុន

នៅ

ថ្ងៃព្រហស្បតិ៍ ៣០ ឧសភា ២០២៤

ដោយ

ឆ្លើយតបទៅសំនួររបស់កម្ពុជាថ្មីក្នុងសន្និសីទកាលពីរសៀលម្សិលមិញនេះ ជុំវិញគម្រោងលក់សណ្ឋាគារសុខានៅជ្រោយចង្វារ អ្នកឧកញ៉ា សុខ គង់ បានឆ្លើយបញ្ជាក់ថា លោកគ្មានបំណងចង់លក់សណ្ឋាគារសុខានៅជ្រោយចង្វារនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងជំនួបជាមួយអ្នកសារព័ត៌មានចម្រុះមកពីជាង ៣០ ស្ថាប័ន ដែលបានចុះទៅទស្សនកិច្ចសិក្សាស្វែងយល់ពីសក្ដានុពលអភិវឌ្ឍនៅតំបន់ឧទ្យានជាតិព្រះមុនីវង្សបូកគោ អ្នកឧកញ៉ា សុខ គង់ បានគូសបញ្ជាក់ថា កន្លងមកមានការផ្សព្វផ្សាយពីការលក់ហូតែលសុខានៅភ្នំពេញ។

អ្នកឧកញ៉ាបានអះអាងថា ដោយសារមានការផុសផ្សព្វផ្សាយថាលក់មិនចេញ អីចឹងទើបលោករុញឲ្យខាងផ្នែកទីផ្សារដាក់លក់បណ្តោយទៅ។ តែលោកអះអាងថា គ្មានបំណងចង់លក់នោះទេ។

ជុំវិញការប្រកាសដាក់លក់សណ្ឋាគារសុខានៅភ្នំពេញ អ្នកឧកញ៉ាមិនបានផ្តល់ការបញ្ជាក់បន្ថែម មកដល់ពេលនេះគម្រោងនៅតែបន្ត ឬក៏មានអ្នកចចារទិញយ៉ាងណានោះទេ។

កន្លងទៅនេះ មានប្រភពព័ត៌មានក្នុងស្រុកបានផ្សព្វផ្សាយថា អ្នកឧកញ៉ា សុខ គង់ បានប្រកាសដាក់លក់សណ្ឋាគារសុខានិងដីនៅតំបន់ជ្រោយចង្វារដែលមានទំហំជាង ១០ ហិកតា ក្នុងតម្លៃប្រមាណ ១ ៥០០ លានដុល្លារ ដើម្បីយកទុនទៅវិនិយោគបន្ថែមនៅរមណីយដ្ឋានបូកគោ។

ជុំវិញការវិនិយោគនៅតំបន់ឧទ្យានជាតិព្រះមុនីវង្សបូកគោ អ្នកឧកញ៉ា សុខ គង់ បានឲ្យដឹងថា ក្រុមហ៊ុនបានចាយទុនវិនិយោគអស់ប្រមាណ ៨០០ លានដុល្លារ ហើយមកដល់ពេលនេះក្រុមហ៊ុននៅមិនទាន់រកប្រាក់ចំណេញបាននៅឡើយទេ។

ទោះបីផលចំណេញមិនទាន់អាចទូទាត់ការចំណាយ បើតាមអ្នកជំនួញចាស់វស្សារូបនេះនៅតែអះអាងថានឹងមិនបោះបង់គម្រោងអភិវឌ្ឍនៅឧទ្យានជាតិព្រះមុនីវង្សបូកគោកនិងនៅតែបន្តទៅតាមលទ្ធភាព។

អ្នកឧកញ៉ា សុខ គង់ បានបញ្ជាក់ថា ក្រុមហ៊ុននឹងនៅតែបន្តគម្រោងអភិវឌ្ឍនៅឧទ្យានជាតិបូកគោ។ អ្នកឧកញ៉ាបានលើកឡើងពីគម្រោងអភិវឌ្ឍធំៗចំនួនពីរដែលកំពុងដំណើរការ រូមមានគម្រោងស្ថាបនាផ្លូវថ្មីតភ្ជាប់ពីផ្លូវជាតិលេខ ៤ មកឧទ្យានជាតិបូកគោ ដែលចាយទុនវិនិយោគរាប់សិបលានដុល្លារ រួមទាំងគម្រោងសាងសង់ព្រះពុទ្ធប្បដិមាកកម្ពស់ ១០៨ ម៉ែត្រ ដើម្បីបម្រើដល់វិស័យព្រះពុទ្ធសាសនា និងទាក់ទាញទេសចរមកកម្សាន្ត។

នៅឆ្នាំ២០០៨ រាជរដ្ឋាភិបាលកម្ពុជា បានប្រគល់ឧទ្យានជាតិព្រះមុនីវង្សបូកគោឲ្យក្រុមហ៊ុនសុខាអូតែលវិនិយោគ ដើម្បីអភិវឌ្ឍជារមណីយដ្ឋានទេសចរណ៍ដ៏ទាក់ទាញរបស់ប្រទេសកម្ពុជា។

ក្រោយទទួលបានសិទ្ធិវិនិយោគ ក្រុមហ៊ុនបានចាប់ផ្ដើមដំណើរការសាងសង់ពង្រីកផ្លូវពីជើងភ្នំឡើងទៅលើកំពូលភ្នំដែលមានចម្ងាយជាង ៣៣ គីឡូម៉ែត្រ ជាអាទិភាពទីមួយ ដែលបានសម្ពោធបើកការដ្ឋានសាងសង់កាលពីថ្ងៃទី១៩ មករា ឆ្នាំ ២០០៨ និងសម្ពោធដាក់ឲ្យប្រើប្រាស់នៅឆ្នាំ ២០១២។

ក្រុមហ៊ុនបានចំណាយការសាងសង់ហេដ្ឋារចនាសម្ព័ន្ធផ្គត់ផ្គង់មានទឹក អគ្គិសនី និងប្រព័ន្ធផ្លូវខ្វាត់ខ្វែង ដើម្បីសម្រួលដល់ការធ្វើដំណើរកម្សាន្តរបស់ភ្ញៀវទេសចរ។ លើសពីនេះទៀត ក្រុមហ៊ុនក៏បានដំណើរការជួសជុសឡើងវិញ និងថែទាំសំណង់អគារចាស់ៗដែលបន្សល់ពីសម័យអាណានិគមបារាំង និងសង្គមរាស្ត្រនិយម មានដូចជា អាគារសាលាក្រុង និង អាគារកាស៊ីណូចាស់ជាដើម៕

Related Topics:អ្នកឧកញ៉ា សុខ គង់