សហគ្រាសមួយ​កែច្នៃផលិតផលសមុទ្រ ១ តោន ក្នុងមួយថ្ងៃ​ នៅរដូវនេះ

លោក ជិន សំណាង ម្ចាស់សិប្បកម្ម សុគា ផលិតផលសមុទ្រសុខភាពខេត្តព្រះសីហនុ បានឱ្យដឹងថា នៅរដូវសម្បូរផលនេសាទសមុទ្រនេះ សហគ្រាសរបស់លោក ​អាចកែច្នៃផលសមុទ្របានប្រមាណ ១ តោន ក្នុងមួយថ្ងៃ។

ថ្លែងប្រាប់កម្ពុជាថ្មីនៅថ្ងៃទី ២៩ ខែឧសភា ឆ្នាំ ២០២៤ ម្ចាស់សិប្បកម្មរូបនេះ ប្រាប់ថា លោកមើល​ឃើញថា ផលិតផលសមុទ្រសម្បូរ ហើយលក់ស្រស់មិនអស់ ទើបលោកសុខចិត្តកែច្នៃ ដើម្បីទទួលបានតម្លៃបន្ថែម។

សិប្បកម្មរបស់លោក ជិន សំណាង កែច្នៃផលិតផលសមុទ្រ ​មានដូចជា មឹកងៀត ត្រីងៀត បង្គាក្រៀម ​បង្គាស្រស់ មឹកស្រស់។

ដំបូងលោកមានដើមទុនតិចតូចប៉ុណ្ណោះត្រឹម ២ លានរៀល ​ហើយអាចពង្រឹងអាជីវកម្មឱ្យមាននិរន្តរភាពរហូតមកដល់បច្ចុប្បន្ន ដែលមានរយៈពេល ១០ ឆ្នាំ មកហើយ។ ​

សិប្បកម្មរបស់លោកបានជួយទៅដល់ប្រជានេសាទជាង ៥០០ នាក់ឡើង តាមរយៈការទិញផលិតផលស្រស់ ហើយ​យកទៅបែងចែក ដើម្បីកែច្នៃ។ ​ចំពោះតម្លៃបង្គាក្រៀម ចន្លោះពី ១៥-២០ ដុល្លារ ទៅតាមប្រភេទបង្គា៕