សេដ្ឋកិច្ច

កក្តាខាងក្រៅពុំរារាំងដល់ការនាំចេញរបស់កម្ពុជាទៅកាន់ទីផ្សារអឺរ៉ុប ខណៈការនាំចេញរយៈពេល៤ខែសម្រេចបាន ១,១៧៥ ពាន់លានដុល្លារ

បានផុស

៤ ខែ មុន

នៅ

ថ្ងៃព្រហស្បតិ៍ ៣០ ឧសភា ២០២៤

ដោយ

ទោះបីជាបញ្ហាប្រឈមរវាងប្រទេសមហាអំណាច ការប្រកួតប្រជែងនៃភូមិសាស្រ្តនយោបាយ និងការបន្តអូសបន្លាយពេលនៃសង្រ្គាមរុស៊្សី-អ៊ុយក្រែន កម្ពុជាបាននាំចេញទំនិញដែលមានទំហំទឹកប្រាក់ ១,១៧៥ ពាន់លានដុល្លារក្នុងរយៈពេល៤ខែដើមឆ្នាំនេះទៅកាន់សហភាពអឺរ៉ុប កើនឡើង ៨,៥១ ភាគរយធៀបនឹង ១,០៨៣លានដុល្លារក្នុងរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍បានបន្ថែមថា ការនាំចូលរបស់កម្ពុជាពីសហភាពអឺរ៉ុបមានចំនួនជិត ២៧៨ លានដុល្លារ ធៀបនឹងរយៈពេល៤ខែដើមឆ្នាំនេះ ធ្លាក់ចុះ ១៨,២១ ភាគរយពីជិត៣៤០ លានដុល្លារ។ ខណៈដែរពាណិជ្ជកម្មទ្វេភាគីបានកើនឡើង ២,១៣ ភាគរយដល់ ១,៤៥៣ ពាន់លានដុល្លារ។

របាយការណ៍បានបញ្ជាក់ថា អាល្លឺម៉ង់ និងអេស្បាញជាដៃគូពាណិជ្ជកម្មអឺរ៉ុបធំបំផុតរបស់កម្ពុជាដែលមានទំហំពាណិជ្ជកម្មទ្វេភាគីចំនួន ២៥៤លានដុល្លារ និង ២៦០លានដុល្លាររៀងគ្នា។

បញ្ហាប្រឈមកត្តាខាងក្រៅពុំរារាំងដល់កំណើននៃការនាំចេញទៅអឺរ៉ុប

លោក លឹម ហេង អនុប្រធានសភាពាណិជ្ជកម្មកម្ពុជាប្រាប់កម្ពុជាថ្មីនៅថ្ងៃទី៣០ ខែឧសភាថា កំណើននៃការនាំចេញទៅទីផ្សារអឺរ៉បគឺដោយសារការកើនឡើងនៃតម្រូវការផលិតផលដែលផលិតក្នុងប្រទេសកម្ពុជា ដែលនាំឱ្យមានការបញ្ជាទិញ។

លោក លឹម ហេង បានមានប្រសាសន៍ថា៖« សម្រាប់ការកើនឡើងនៃការនាំចេញរបស់ប្រទេសកម្ពុជាយើងទៅកាន់សហភាពអឺរ៉ុបគឺវាបានបង្ហាញឱ្យយើងឃើញអំពីការបន្តកើនឡើងនៃតម្រូវការនៃប្លុកនោះមកលើទំនិញរបស់កម្ពុជាយើង។ ដូច្នេះហើយបានជាយើងសង្កេតឃើញថា ខ្សែច្រវ៉ាក់ផលិតកម្មក្នុងស្រុករបស់យើងជាពិសេសសំលៀកបំពាក់កាត់ដេរ ស្បែកជើង និងវាយនភ័ណ្ណនៅតែជាវិស័យដែលទាក់ទាញវិនិយោគថ្មី»។

ដំណើរទស្សនកិច្ចរបស់ថ្នាក់ដឹកនាំកម្ពុជាបង្កើនទំនុកចិត្តវិនិយោគពីអឺរ៉ុប

លោក ហុង វណ្ណៈ អ្នកជំនាញសេដ្ឋកិច្ចនៃរាជ្យបណ្ឌិតសភាកម្ពុជា បានប្រាប់កម្ពុជាថ្មីផងដែរថា ផលិតផលដែលកម្ពុជានាំចេញទៅកាន់ទីផ្សារអឺរ៉ុប ភាគច្រើន គឺប្រភេទទំនិញវាយនភណ្ឌដូចជា សម្លៀកបំពាក់ សម្ភារសម្រាប់ធ្វើដំណើរ ស្បែកជើង កង់ និងប្រភេទកសិផលមួយចំនួនដែលនៅតែមានតម្រូវការនៅទីផ្សារអឺរ៉ុប ទោះបីជាមានសម្ពាធនៃការប្រកួតប្រជែងភូមិសាស្រ្តនយោបាយ ការបន្តអូសបន្លាយនៃសង្រ្គាមរវាងរុស្ស៊ីនិងអ៊ុយក្រែនក្តី។

លោកបានថ្លែងបញ្ជាក់ថា៖« នៅឆ្នាំ២០២៤នេះ ស្ថានភាពរនៃការនាំចេញរបស់កម្ពុជាទៅកាន់ទីផ្សារអឺរ៉ុប នឹងវិលមករកភាពល្អប្រសើរ ដោយអឺរ៉ុបនឹងមានតម្រូវការ និងបញ្ជាទិញទំនិញពីកម្ពុជាឡើងវិញ។

ជាមួយគ្នានេះដែរ លោកក៏បានលើកឡើងថា កន្លងមកសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជាក៏បានបំពេញទស្សនកិច្ចទៅកាន់ប្រទេសបារាំង និងអឺរុប ដែលបង្ហាញពីកិច្ចសហការដ៏ល្អប្រសើរ រវាងភាគីទាំងពីរ។ លោកថា ការណ៍នេះក៏នឹងជំរុញឱ្យបណ្តាក្រុមហ៊ុននានាពីអឺរ៉ុបនឹងចាប់អារម្មណ៍ក្នុងការសិក្សាអំពីសក្តានុពលវិនិយោគនៅកម្ពុជាផងដែរ។

ការប្តេជ្ញារបស់អឺរ៉ុបចំពោះកម្ពុជា

សហភាពអឺរ៉ុប បានរំលឹកឡើងវិញនូវការប្តេជ្ញាចិត្តរបស់ខ្លួនក្នុងការគាំទ្រដល់ការចាកចេញរបស់កម្ពុជាពីស្ថានភាពប្រទេសអភិវឌ្ឍន៍តិចតួច ដោយលើកឡើងថា ខ្លួនត្រៀមខ្លួនជាស្រេចដើម្បីពិភាក្សាជាមួយភាគីកម្ពុជាលើប្រព័ន្ធអនុគ្រោះពន្ធទូទៅថ្មី។

លោកស្រីJutta Urpilainenស្នងការអឺរ៉ុបសម្រាប់ភាពជាដៃគូអន្តរជាតិបានថ្លែងក្នុងសន្និសីទសារព័ត៌មានក្នុងរាជធានីភ្នំពេញកាលពីថ្ងៃទី១៤ខែមីនាបាននិយាយថា៖ «ប្រទេសកម្ពុជាឥឡូវបានឈានដល់ចំណុចសំខាន់មួយ។ សហភាពអឺរ៉ុបបានប្តេជ្ញាចិត្តចំពោះភាពជាដៃគូរបស់ខ្លួនជាមួយកម្ពុជា ដោយផ្អែកលើគុណតម្លៃ និងគោលការណ៍សិទ្ធិមនុស្សរបស់យើង ដើម្បីគាំទ្រដល់ប្រទេសកម្ពុជាក្នុងអំឡុងការផ្លាស់ប្តូរដ៏ទន់ភ្លន់»។

នៅឆ្នាំ២០២០ សហភាពអឺរ៉ុបបានដកប្រព័ន្ធអនុគ្រោះពន្ធEBA ប្រហែល ២០ភាគរយពីកម្ពុជា។ ការណ៍នេះមានន័យថាផលិតផលនាំចេញចម្បងរបស់កម្ពុជាមួយចំនួនមានដូចជា សម្លៀកបំពាក់ ស្បែកជើង និងផលិតផលធ្វើដំណើរ ពេលនេះត្រូវជាប់កាតព្វកិច្ចពន្ធគយរបស់សហភាពអឺរ៉ុប។

អង្ករល្អប្រណិតនិង អង្ករសិរីរាង្គកម្ពុជាកំពុងទទួលបានការពេញនិយម និងពង្រីកចំណែកទីផ្សារនៅអឺរ៉ុប

លោក សុង សារ៉ន ប្រធានក្រមហ៊ុន Amru Rice (Cambodia) Co.ltd បានថ្លែងថា នាពេលបច្ចុប្បន្នការនាំចេញប្រភេទអង្ករល្អប្រណិត និង អង្ករសិរីរាង្គរបស់ក្រុមហ៊ុនលោកទទួលបានការចាប់អារម្មណ៍និងទទួលស្គាល់លើគុណភាពពីសំណាក់អតិថិជននៅប៉ែកអឺរ៉ុបកាន់តែច្រើនឡើងៗ។ លោកបានថ្លែងថា៖«ចាប់តាំងពីយើងបានពង្រីកការនាំចេញនូវប្រភេទអង្ករល្អប្រណិត និង អង្ករសិរីរាង្គនេះទៅកាន់បណ្តាប្រទេសនានានៅប្រទេសក្នុងសហគមន៍អឺរុប (EU)»។

ភាគច្រើនកម្ពុជានាំចេញ ផលិតផលវាយនភណ្ឌ ស្បែកជើង កង់ គ្រឿងឧបភោគបរិភោគ អង្ករ និងផលិតផលកសិកម្មផ្សេងទៀតទៅកាន់សហភាពអឺរ៉ុប ក្រោមប្រព័ន្ធអនុគ្រោះពាណិជ្ជកម្មអ្វីៗគ្រប់យ៉ាងលើកលែងតែអាវុធ (EBA)។

ពាណិជ្ជកម្មសរុបកម្ពុជា-សហភាពអឺរ៉ុបមានតម្លៃ៤,៦១ពាន់លានដុល្លារក្នុងឆ្នាំ២០២៣ ធ្លាក់ចុះជិត៥ភាគរយពី៤,៨៥ពាន់លានដុល្លារក្នុងឆ្នាំ២០២២។ ក្នុងនោះ កម្ពុជាបាននាំចេញទំនិញដែលមានទំហំទឹកប្រាក់ ៣,៦៦ ពាន់លានដុល្លារទៅសហភាពអឺរ៉ុប ធ្លាក់ចុះ ៩ ភាគរយធៀបនឹង ៤,០៤ពាន់លានដុល្លារក្នុងឆ្នាំ២០២២។ នេះបើតាមក្រសួងពាណិជ្ជកម្ម។៕